1 CRONICAS 15
15
David tsi' c'axtesa tilel jini Arca ti Jerusalén
(2 S. 6.12-23)
1David tsi' wa'choco i yotot tac ti Jerusalén. Tsi' chajpa jump'ejl tsiji' bʌ Tabernáculo cha'an jini Arca i cha'an bʌ Dios. 2David tsa' caji i yʌc' jini mandar: Che' mi laj c'axtesan tilel jini Arca, cojach jini levíjob mi mejlel i q'uechob tilel, come wa'chocobilob jini levíjob cha'an mi' q'uechob jini Arca, cha'an mi' melbeñob i ye'tel ti pejtelel ora, che'en. 3David tsi' laj wets'eyob tilel pejtelel jini israelob ya' ti Jerusalén, cha'an mi' tem c'axtesañob tilel jini Arca ti tsiji' bʌ Tabernáculo. 4-10David tsi' pʌyʌ tilel i p'olbalob Aarón yic'ot jini levíjob. Jiñobʌch iliyi:
120 loq'uemo' bʌ ti' p'olbal Coat, Uriel jiñʌch i yum. 220 loq'uemo' bʌ ti' p'olbal Merari, Asaías jiñʌch i yum. 130 loq'uemo' bʌ ti' p'olbal Gersón, Joel jiñʌch i yum. 200 loq'uemo' bʌ ti' p'olbal Elizafán, Semaías jiñʌch i yum. 80 loq'uemo' bʌ ti' p'olbal Hebrón, Eliel jiñʌch i yum. 112 loq'uemo' bʌ ti' p'olbal Uziel, Aminadab jiñʌch i yum.
11Che' jini David tsi' pʌyʌ tilel jini motomajob, Sadoc yic'ot Abiatar, yic'ot jini ñuc bʌ motomajob, yic'ot i yumob levíjob: Uriel, Asaías, Joel, Semaías, Eliel, Aminadab. 12David tsi' subeyob: Jatetla i yumetla levíjob. Sʌq'uesan la' bʌ, temel yic'ot pejtelel la' pi'ʌlob, cha'an mi la' c'axtesan tilel jini Arca ti' yajñib tsa' bʌ c chajpa. 13Lac Yum tsi' jats'ʌyonla ti yambʌ ora, come ma'anic tsa' la' q'ueche tilel, che'en David. 14Che' jini tsa' caji i sʌq'uesañob i bʌ jini motomajob yic'ot jini levíjob cha'an mi' ch'ʌmbeñob tilel jini Arca i cha'an bʌ lac Yum i Dios israelob. 15Jini levíjob tsa' caji i q'uechob tilel jini Arca ti' quejlab yic'ot cha'ts'ijt te', che' bajche' tsi' wʌn subu Moisés cha'an ti' mandar lac Yum.
16David tsi' subeyob jini año' bʌ i ye'tel ti' tojlel levíjob, cha'an mi' wa'chocoñob jini yujilo' bʌ c'ay yic'ot yujilo' bʌ i ñijcʌntel música, yic'ot salterio, yic'ot arpa, yic'ot címbalo, cha'an mi' ñijcañob cha'an i tijicñʌyelob i pusic'al. 17I yumob jini yujilo' bʌ música jiñobʌch Hemán (i yalobil Joel), Asaf (i yalobil Berequías), Etán (i yalobil Cusaías). Loq'uemob ti' p'olbal Merari. 18I yaj coltayajob i yumob música jiñobʌch iliyi:
Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, Obed Edom, Jeiel, jini xcʌntati' templojob.
19Tsa' wa'chocontiyob Hemán, yic'ot Asaf, yic'ot Etán cha'an mi' ñijcañob címbalo tac melbil bʌ ti bronce. 20Tsa' wa'chocontiyob Zacarías, Aziel, Semiramot, Jehiel, Uni, Eliab, Maasías, Benaía cha'an mi' cha'leñob c'ay che' woli' ñijcʌntel arpa. 21Jini xñijca arpajob jiñobʌch: Matatías, Elifelehu, Micnías, Obed Edom, Jeiel, Azazías. 22Jini tsa' bʌ i cʌntesa c'ay jiñʌch Quenanías, i yum levíjob. Wen yujil música. 23Jini xcʌntayajob cha'an Arca jiñobʌch Berequías yic'ot Elcana. 24Tsa' yajcʌntiyob motomajob mu' bʌ i ñijcañob trompeta cha'an ñaxan mi' majlelob ti marcha. Jiñobʌch iliyi: Sebanías, Josafat, Natanael, Amasai, Zacarías, Benaía, Eliezer. Obed Edom yic'ot Jehías tsi' cʌntayob jini Arca.
25Che' jini David yic'ot jini año' bʌ i ye'tel ti Israel yic'ot jini ñuc bʌ yumʌlob cha'an soldadojob tsa' majliyob ti' tijicñʌyel i pusic'al ya' ti' yotot Obed Edom cha'an mi' ch'ʌmob majlel jini Arca ti Jerusalén. 26Dios ma'anic tsi' jisa jini levíjob tsa' bʌ i q'uecheyob majlel jini Arca. Jini cha'an tsi' yʌq'ueyob Dios wuccojt tat wacax yic'ot wuccojt tiñʌme' cha'an tsʌnsʌbil bʌ i majtan.
27David lʌpbil i cha'an lino bʌ bujcʌl, yic'ot jini levíjob woli bʌ i q'uechob majlel Arca, yic'ot jini xc'ayob, yic'ot Quenanías mu' bʌ i tech c'ay. Lʌpbil i cha'an David ja'el jump'ejl efod melbil bʌ ti lino bʌ pisil. 28Che'ʌch tsi' ch'ʌmʌyob tilel jini Arca ti Jerusalén jini año' bʌ i ye'tel ti Israel. Tsi' cha'leyob c'am bʌ t'an ti' tijicñʌyel i pusic'al. Tsi' wusuyob trompeta tac. Tsi' jats'ʌyob címbalo tac, yic'ot arpa tac, yic'ot salterio. 29Che' woli' c'otel jini Arca ti Jerusalén, jini Mical i yixic'al Saúl, tsi' ñajtʌ q'uele ti ventana che' bʌ woli ti ñuqui tijp'ejl David. Che' jini Mical tsa' caji i ts'a'len ti' pusic'al.
Currently Selected:
1 CRONICAS 15: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.