METIAS 26
26
Emoʼo ya wôé Yésus
(Mk 14:1-2; Lk 22:1-2; Yoa 11:47,49,53)
1A nga bo na, éyoñe Yésus a maneya kobô mam mete mese, a nga jô beyéʼé bé na: 2Mia yeme na éyoñe môse mibaé mi lôteya, Pak a ye boban, a mona môt a ye koñeban asu ya na a tyeléban e krôa .
3Ane bivete betuni bi nga sulan a bemvendé ya ayoñ e ndaa ntuni nnen ba loone na Kaif, 4a bo ésok ane be ne bi Yésus e mvôle yôp a wôé nye; 5be mbe be jôʼô na: Saa ke éyoñ abôk é né, éngôngôm é za boban e be bôt.
Minga a woʼo Yésus Olobinda e nyô
(Mk 14:3-9; Yoa 12:1-8; Lk 7:36-50)
6Yésus a mbe Bétani, e ndaa Simon nkone zam , 7nde minga éziñ a subu nye bebé a bili ndeʼe albata é bili ôlobinda a ne beta tañ, nye ve sôé nye nye nlô a too tawôlô. 8Eyoñe beyéʼé be nga yene jame te, be nga yene de abé a jô na: Amu jé aval éndamane di? 9Ôlobinda nyô a be kuabane beta tañ asu bingôngole bi bôt. 10Eyoñe Yésus a yemeya ôsimesane viap, a nga jô be na: Amu jé mia dutu éndeñelaʼa e be minga nyô? Ke a te bo ma mbamba jam; 11mia be bingôngole bi bôt mi too éyoñ ése; ve bia be mia mi nji tabe éyoñ ése; 12a te sôé ôlobinda e nyôle jam asu njambane soñe wom. 13Ma jô mia bebela na e vôm ase Mbamba Foé nyô a ye kateban e si nyôna ése, ba ye fe kobô ajô ya jam a te bo a simesane nye.
Yudas a koñe Yésus
(Mk 14:10,11; Lk 22:3-6; Nk 12:3)
14Ane wua ya beyéʼé awôm a bebaé, jôé na Yudas Iskariôt a nga ke e be bivete betuni 15a jô na: Mia ye ve ma jé ane-me ne koñe mia nye? Nde be nga veʼe nye bifase bi moné mewôm melaa.
16Ataté éyoñe te a mbe a jeñek mbamba éyoñ ya koñe nye.
Nkômesane ndiane Pak
(Mk 14:12-21; Lk 22:7-18,21-23; Yoa 13:1-30)
17E môs ôsu ya ba di belet é ne te mvusan, beyéʼé be Yésus be nga sili nye na: Wo kômbô na bi ke kôme wo vôme ya di Pak e vé? 18Nye be na: Kelan e tison, be môt éziñ, a jôʼane nye na: Masa a jô na: Eyoñe jam é ntoo bebé, nne ma lôte Pak e be wo bia beyéʼé bam. 19Ane beyéʼé be nga bo ane Yésus a nga bendé be: be nga kôme Pak. 20Eyoñe ngôʼé é nga kui, a nga too tawôlô ba be beyéʼé awôm a bebaé. 21Be jaʼak, nde a jô be na: Ma bele ane ma jô mia na: Wua ya be mia a ye koñe ma. 22Njalan a abui ôlun, nde ba taté nye nsilan, môt ase mfaʼa wé na: Ye ma a Nti? 23A nga yalan a jô na: E môt bia nye bia kee wo e beʼe été, nye ate a ye koñe ma. 24Mona môt a ke ane e nga tiliban ajô dé ve bidim e be môt a beʼe ayeme ya nkoñane mona môt: e nga ye dañe mvaé e be môt ate na a bo te bialé. 25Yudas, nyô a nga koñe nye a nga yalan a jô nye na: Ye ma a Rabi? Yésus na: Wo wo jô nalé.
Bidi bi Zambe
(Mk 14:22-25; Lk 22:15-20; 1 Ko 11:23-26)
26Be jaʼak, nde Yésus a nyoñe fembé a éyoñ a maneya botane je, a nga beʼe je a ve je beyéʼé nye na: Nyoñan, jaʼan, jôme jina é ne nyôle jam. 27Eyoñ a nyoñeya élaé a ve akéva, a nga kalane be je a jôʼô na: Nyaʼan élaé ji bese, 28jôme ji é ne metyi mam yʼélat asu jama bôt, mme me nga sôéban asu njamane mam abé . 29Ma jô mia bebela na: Ataté éyoñe ji, ma ye bo te beta nyu jôme ya ébuma ndiʼi ji, akekui e môse bia be mia bia ye nyu je mfefé éjôé Esaa wom.
Alu ebiene di wo ye kate ma
(Mk 14:26-31; Lk 22:33-34,39; Yoa 13:37-38)
30Eyoñ be maneya yia bia, be nga ke e nkole beôlivié. 31Ane Yésus a nga jô be na: Mia bese mia ye koleban ôbak alu di amu ma: Amu e nga tilibane foʼo na: Ma ye bibi mbaʼale a mintômba ya mbam mia ye tyamelan.
32Eyoñe me wômeya, ma ye ke mia ôsu e Galilé. 33Pierre a nga yalan a jô nye na: Nge bese ba ye kolôban ôbak amu wo, ve ma ma ye bo te koleban ôbak. 34Yésus a nga kate nye na: Ma jô wo bebela na alu di, te na nnôme kup a loñé, wo ye kate ma biyoñe bilaa. 35Pierre a nga jô nye na: Toʼo na me nga yiane wu bia wo, teke foʼo na me nga ye kate wo. Bebé avale te fe beyéʼé bese be nga jô.
Yésus a yeʼelan e Gétsémané
(Mk 14:32-42; Lk 22:40-46)
36Ane ba be Yésus be nga kui e vôm ba loone na Gétsémané, nye beyéʼé na: Tabaʼane si valé, nté ma ke ôbe nté na me yeʼelan. 37A nga nyoñe Pierre baa bone be Zébédé bebaé; a nga taté na a wôʼô ôlun a biyebe. 38Nye be na: Nsisime wom wo wôʼô ôlun étua abui a kui awu; likaʼane va a mombaʼan fufulu a ma. 39Nde a subu ôsu mone nté, ve ku asu dé é butu si, a nga yeʼelan a jôʼô na: A Esaa wom, nge é ne ngule ya bo nalé na élaé ji é ke ma ôyap; ve da saa ane ma kômbô ve ane wo kômbô. 40Ve zu mfaʼa beyéʼé be mbe a koone be ôyo, nye na: A Pierre nalé a ne na mi nji bi ngule ya mombô fufulu a na toʼo ve awolo da? 41Mombaʼan a yeʼelaʼan, nalé mia ye bo te nyiin e mebôbelaʼa été; mfaʼa wu nsisim ô ne ngu, mfaʼa mbok minsôn mi ne atek. 42A nga beta ke éyoñe baa asu ya yeʼelan a jôʼô na: A Esaa wom nge élaé ji é se nguleya lôt te na me nyaʼa je, nkômbane wôé ô bobaʼan! 43Mvus éte a nga beta zu a koone be be too ôyo, amu mise map me mbe adit. 44Ve liʼi be a beta ke ôyap asu ya yeʼelan éyoñe lale, a baʼalaʼane ke avale bifia da. 45Ane a nga zu e be beyéʼé a jô be na: Kelan ôsu a ke ôyo a wokaʼan! Mi lôô éyoñ é ntoo bebé nje mona môt a yiane keeban e mo bebo abé . 46Kôlaʼane si! Nkean! Mi lôô môt a koñe ma a soya.
Nkoñan a mbiane Yésus
(Mk 14:32-42; Lk 22:39-46; Yoa 18:1; Hé 5:7)
47A ngenan a kobôʼô, éyoñe te Yudas, wua ya beyéʼé awôm a bebaé a nga suan a ngume nsamba bôt be beʼe minkpwaté mekôn a mimbeñ. Bivete betuni a bemvendé ya ayoñe beyude mbe be nga lôme be. 48E môt a nga koñe nye, a nga ve be ndem a jôʼô na: Môt ma ye latane nye anyu, nye le, biane nye. 49Eté été a nga subu Yésus bebé a jô na: Mbôlô a Rabbi, ve latane nye anyu. 50Yésus a nga jô nye na: A Mvôé jam, ô ne va amu nalé. Ane be nga zu bebé a wua Yésus mo nyô a bi nye. 51Ane wua ya ba ba be Yésus be mbe a nga same wo a té nkpwaté mekône wé abam a baʼé mbo ésaé njôô betuni a tyiʼi nye alo. 52Nde Yésus a nga jô nye na: Some nkpwaté mekône wôé e vôme wé; amu ba bese ba nyoñe nkpwaté mekôn, ba ye fe wu ve a nkpwaté mekôn. 53Nge na ye wo simesane na me se nguleya yeʼelan Esaa wom éyoñ ébiene ji, nye ke a telé fefele jam éto ji beéngele mewosan a dañe bizuʼu awôm a bibaé? 54Nne mintilan mi ne nguleya tôéban aya te na avale di da boban? 55Awolo te nde Yésus a nga jô minsamba mi bôte na: Mia te kui mi bili minkpwaté mekôn a mimbeñ asu ya bi ma ane zee mimfaka. Môs ôse, e nda Zambe été, me mbe me tabeʼe si a yeʼele, mi nji bi ma. 56Jame dina ese é kuiya asu ya na mintilane bekulu mejô mi tôéban. Ane beyéʼé bese be nga liʼi nye a tup.
Yésus a tele asu betyiʼi mejô
(Mk 14:53-65; Lk 22:54,63-65; Yoa 18:12,13,19-24)
57Eyoñe be biya Yésus, be nga kee nye e be Kayif, ntuni nnen, e vôme beyeme bekalate a bemvendé be nga too nsulan. 58Pierre, nye a mbe a zaʼa ôyap a kui e nseñe ntuni nnen, a éyoñ a nyineya mfaʼa ya été, a mbe a too ba be ayôme bôt asu ya yen asuʼulan ya mam. 59Betuni benen a ékôan ja kobô mejô ése be mbe be jeñek ékotekote jame ya boʼolô Yésus ane be ne wôé nye. 60Ve be nji yen, akôsa bo na bikotekote bengaa bi mbe valé. Ayap é lôteya, nde bebaé ya été ba subu bebé a jô 61na: Môte nyô a mbe a jôʼô na: Me ne tyame nda Zambe, a beta lôñe je môse milaa. 62Ntuni nnen a nga tebe tetele a jô nye na: Ye wo te yalan toʼo jame da ya mam ba boʼolô wo nga? 63Yésus a nga too évô. Ntuni nnen a nga jô nye na: Ma vuu wo soñ ane Zambe a vee na ô kate bia nge ô ne Krist e mona Zambe. 64Yésus a nga jô nye na: Wo wo jô. Ve da ma jô mia na: ataté éyoñe ji, mia ye yene mona môt a too e mbo nnôme ya éto njôan a a zaʼa minkute ya yôp. 65Eyoñe te ntuni nnen a nga nyap mengômesane mé a jô na: A kobôya ébiasé nkobô, amu jé bia beta yi bengaa? Mi lôô éyoñe ji, mi maneya wôʼô nkobô ébiasé. 66Mia yen aya? Be nye na: A yiane wu. 67Nde be nga tui nye menden asu a bibi nye mebaé. Bevok be nga bibi nye minkasa 68be jôʼô na: Kuliʼi bia mejô a Krist, za a te bibi wo?
Pierre a kate Yésus
(Mk 14:66-72; Lk 22:55-62; Yoa 18:25-27)
69Pierre a nga too si atan, e nseñ été; nde mbo ésaé minga éziñ, a zu nye bebé a jô na: Wo fe ô mbe nsamba Yésus môte ya Galilé. 70Nde a nga kat asu bese a jôʼô na: Me nji yeme jam wo jô. 71Eyoñ a kui atan a kele mfaʼa mbé akak ô mbe, nde minga mfe a yene nye a jô na: Môte nyô a mbe nsamba Yésus môte ya Nazarét. 72A nga beta kat a kaneʼe ngana na: Me nji yeme môt ate; 73Ôbe nté ô lôteya, bôte be nga tele valé be nga subu Pierre bebé a jô nye na: Bebela na wo fe ô ne wua ya be be, nkobô wôé ôbien wo liti vôme wo so. 74Nde a taté na a fôtan a kane mengana na: Me nji yeme môt ate. Eté été ane nnôme kup a nga loñ. 75Ane Pierre a nga simesane nkobô Yésus a nga kobô na: Te na nnôme kup a loñ, wo ye kate ma biyoñe bilaa; nde a nga kui atan a dañe yi.
Currently Selected:
METIAS 26: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009