METIAS 25
25
Nkana bengon awôm
(Mt 24:42,44; Lk 12:35-45; 1 Tes 5:1-11; Nli 3:1-5; 19:6-9)
1Nde éjôé ya yôp ja ye funane bengo be binga awôm mbe be nga nyoñe belambe bap a ke tôbane môt a luk. 2Betane yʼété be mbe mekut betane ke mimfefek. 3Ba be mbe mekut, éyoñ be nyoñeya belambe bap, be nga vuane nyoñe mbon. 4Ve ba be mbe mimfefek, be nga nyoñe mbon e mendek a belambe bebien. 5Amu nluʼu minga a nga bo te jiʼa so, nde bese be nga bili atek a ke ôyo. 6E zañ alu, ôyenga ô nga jô: Nluʼu minga a soya, kuan atan, mi ke tôbane nye! 7Ane bengo be binga bete bese be nga vee a kôme belambe bap. 8Mekut me nga jô mimfefeʼe na: Vaʼane bia ngabe ya mbone wônan, amu belambe bangan be nga dim. 9Mimfefek mi nga yalan a jô na: Teke foʼo! Ô se nguleya yiane bia be mia; ve kelan e be bebo makit mi kus asu denan. 10Eyoñe bana be keya kuse mbon, nde nluʼu minga a so, ane ba be mbe nkômesan be nga nyiin e abôʼô éliʼiti, a mbé ô nga feteban.
11Ayap e lôteya, bengo be binga bevoʼo fe be nga so a jô na: A Nti, a Nti, diʼi bia mbé ! 12Nde a yalan a jô be na: Ma jô mia bebela na me nji yeme mia. 13Ajô te mombaʼan, amu mi nji yeme môs nge awolo.
Nkana betalañ
(Lk 19:12-27; Rm 14:7-8)
14Da ye bo ane môt éziñ, nye ate a nga bo na, a zaʼa ke dulu, ve loone bebo bisaé bé a ve be akume dé. 15A nga ve wua betalañ betan, nyô mbok bebaé a nyô mboʼo wua, môt ase ane ngule jé é né; mvus éte a nga ke. Eté été, 16nyô a nga nyoñe betalañ betan a nga ke bo makit a yene betalañ befe betan. 17Avale te fe nyô ya betalañ bebaé a nga bi bebaé befe nsenge. 18Nyô a nga nyoñe ve talañ wua, a nga ke, ve faʼa ébé e si a solé moné masa wé. 19Ayab éyoñ é lôteya, nde masa bebo bisaé bana a ke so a nga bo be sitoʼo.
20Nyô a nga nyoñe betalañ betan a nga tebe a liti befe betan a jôʼô na: A masa, ô nga ve ma betalañ betan ô lôô me yeneya befe betan nsenge. 21Masa wé a nga jô nye na: Mvaé, ô ne mbamba mbo ésaé a nyô ya buni, ô litiya zôsôô mfaʼa ya tyôtyoé biôm, ma ye telé wo ô baʼale biôm abui; zaʼa vak mia masa wôé. 22Nyô ya betalañ bebaé a nga tebe éyoñe jé a jô na: A masa, ô nga ve ma betalañ bebaé; ô lôô me yeneya befe bebaé nsenge. 23Masa wé a nga jô nye na: Mvaé, ô ne mbamba mbo ésaé a nyô ya buni, ô litiya zôsôô mfaʼa ya tyôtyoé biôm, ma ye telé wo ô baʼale biôm abui, zaʼa vak mia masa wôé. 24Nyô ya talañ wua fe a nga tebe éyoñe jé a jô na: A masa, me mbe me yeme na ô ne ayete môt: Wo kôan e vôm ô nji mias, wo toʼé e vôm ô nji bôé; 25amu woñ, nde me nga ke solé talañ wôé e si été: akume dôé te nde di ô bili. 26Ve masa wé a nga yalane nye na: Ô ne mbia mbo ésaé a nleles! Ô nga yeme na ma kôan e vôm me nji mias a toʼé e vôm me nji bôé. 27O nga yiane futi moné wom e bañ; éyoñe me soya, me nga ye bulane nyoñ akume dam a nsenge. 28Nyoñane ñhe nye talañ wé a kee nye môt a bili betalañ awôm. 29Amu môt ase a bili, nye ba ye ve a a ye bi abui abui; ve nyô a nji bi, ba ye vaa jaʼane jôm a bili. 30Ve mfaʼa mbo ésaé a ne tee mfi, wuʼane nye e dibi e ne atan: e wé nye a ye bo miñyôn a nlatane mesôñ.
Môse ntyiʼane mejô
(Yoa 5:22,23,26-29; Nli 20:11-15; 2 Tes 1:6-10; Ga 6:7-10)
31Eyoñe mona môt a ye so étôtoʼo jé ba be beéngele bé bese, a ye tabe étôtoʼo éto njôane jé. 32Meyoñ mese ma ye sulan asu dé, a ye kandé bôt bana a ba bevok ane mbaʼale biyem a kandé mintômba a bikela. 33A ye telé mintômba e mbo nnôme wé a bikela e mbo ngale wé. 34Eyoñe te njô bôt a ye jô ba ba ye tebe nye mbo nnôme na: Zaʼan, mia bôt Esaa wom a nga botan, nyoñane ngab éjôé é nga kômban asu denan ataté ane émo é nga téban: 35Amu me nga wôʼô zaé a mi nga ve ma bidi; me nga wôʼô évé a mi nga nyuu ma mendim; me mbe nneñ a mi nga nyoñe ma; 36soé a mi nga jalé ma ngômesan; me nga kon a mi nga jome ma; me mbe mimbôk ane mi nga zu yene ma. 37Eyoñe te bezôsôô be bôt ba ye yalane nye na: A Nti, bi nga yene wo éyoñ évé ô wôʼô zaé a ve wo bidi, ô wôʼô évé a nyuu wo mendim? 38Bi nga yene wo éyoñ évé ô too nneñ a nyoñe wo, ô too soé a jalé wo ngômesan? 39Eyoñ évé bi nga yene wo ô too nkôkon nge e nda mimbôk a zu yene wo? 40Njô bôt a ye yalane be na: Bebela ma kate mia na: éyoñ ése mi nga bo wua ya ayôme bôt da dañe tyôtyoé di jam mbe be ne bobejañ, ma ñhe le mi nga bo de.
41Wôna a ye jô ba ba ye tebe nye mbo ngale na: Kelan ma ôyap, mia bôte biyoʼé, e nduane ya nnôm éto nje é nga kômban asu diable a beéngele bé. 42Amu me nga wôʼô zaé mi te ve ma bidi; me nga wôʼô évé, mi te nyuu ma mendim; 43me mbe nneñ, mi te nyoñe ma; me mbe soé, mi te jalé ma ngômesan; me nga kon a me mbe mimbôk mi te zu jome ma! 44Nde be fe ba ye yalane na: A Nti éyoñ évé bi nga yene wo ô wôʼô zaé, nge évé, ô too nneñ nge soé, ô too nkôkon nge nda mimbôk bi te zu volô wo? 45A ye yalane be na: Bebela ma jô mia na, e vôme mi nga bo te bo wua ya ayôme bôt da dañe tyôtyoé dina jam, vôm ate mi nga bo te bo ma. 46Balé bete ba ye tôbane melebe ya nnôm éto, ve bezôsôô be bôt ba ye nyoñ ényiñe ya nnôm éto.
Currently Selected:
METIAS 25: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009