Sawal la giled’a 9
9
Alona nga mi sut suma kur ndakina
1Ni sawal la David mi hlat kahle suma bud’a mi hat mi ma ngolâ hi suma hle sawalina.
2Ma didina, an mba ni gileng ki hurun pet,
an mba ni dugot ded’a woi yam sun mang nga ndandala.
3An mba ni le furîd’a, tan mba d’i lan djivid’a kangû;
an mba ni ge sawala ki simiyêngû,
angî Alo ma sä akulo ma kal teglesâ.
4Man suma djangûna a didak kazigaziya,
a hiram tak a puka avorongû.
5Kayam ang nga ndjunun yam d’ingêr manda,
yam zla manda mi,
ang nga kaka yam zlam manga á kan sariya d’a d’ingêra.
6Ang nga ngop andjaf suma bei wangâ,
ang nga b’lak suma asa’atna woyo,
ang nga tchazi simiyêzi woi ki irang fafat gak didin.
7Suma djangûna a nga d’uo d’a,
b’lak mazid’a ni ki irazi fafat.
Ang pleyêzi aziyazi ma nglona woyo,
sa dok mi djib’er kazi d’uo d’a.
8Ma didina, ang nga tamula gak didin,
ang tin zlam manga á ka sariyad’a.
9Ang nga ka sariyad’a yam suma kur duniyad’ina ki d’ingêra,
ang nga ka sariyad’a yam andjaf suma ki d’engzeng manga mi.
10Ma didina, angî yima ngeid’a hi suma suma a nga lazazina;
ata yima ndaka nga na, angî yima ngeid’a hi sumina.
11Ma didina, suma a wang simiyêngâ,
a nga deng tazi atangû,
kayam ang nga ar suma a halangâ woi d’i.
12Agi gagi sawala ki simiyê Ma didin
ma nga kaka kur Siyon-na,
agi dagi sun mam mba ngol la mi lata woi aduk suma.
13Mam mi sama sä atchugul suma a tchazina,
nga mi djib’er kazi mi,
nga mi mar yam tchina hi suma hohoud’ina d’i.
14Ma didina, ang wan hohowonu,
ang we ndak ka man suma djangûna a nga ndaganda,
ang prud’un ndei abo matna,
15kayam an i tagang subur manga woi kua pet
avok suma Siyon-na
tala an le furîd’a yam sut manga d’a.
16Andjaf suma bei wAlona a puk kä kur zul la azi tazi djugud’ota,
asezi mi tchuk kur dau ma azi tazi ngeyem kä na.
17Ma didina mi tak tam mbeyo,
mi ka sariya d’a d’ingêra;
sama asa’atna nga mi ve tam ki dau ma mam tam gunuma.
Tchol ndjö
18Ar suma asa’atna a i ata yima azuleina,
nala, andjaf suma bei wAlo ndazina pet suma a mar rei yam Alonina.
19Alona nga mi mar yam sama houd’a d’uo burâ ki burâ;
tin hurâ hi suma hohoud’ina mba mi dap pei d’i gak didin.
20Ma didina, ang tchol akulo, ar sana mi kus ayîna d’i,
ar andjaf suma bei wangâ sariya manga ti vaziya.
21Ma didina, ang mbud’uzi mandarâ,
ar andjaf suma bei wangâ a wala
azi ni suma hawa.
Tchol ndjö
Currently Selected:
Sawal la giled’a 9: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
