Sawal la giled’a 10
10
Ma didina nga mi b’lak suma tchona woyo
1Ma didina, ni kayam me ba, ang tchol sä woi hina dei ge?
Ni kayam me ba, ata yima ndaka nga na ang ngei tang nge?
2Suma asa’atna ki yam mba ad’eng mazid’a a nga b’at ahlena abo suma hohoud’a;
suma hohoud’a a nga puk kä kur dau ma suma asa’atna a gunum kä avorozina.
3Sama asa’atna nga mi subur tam yam tamu,
sama hal ahlena hi sumina nga mi ngulung ang Ma didina,
nga mi golong is mi.
4Wana ni djib’era hi sama asa’atnid’a
ki yam mba ad’eng mamba nga mi dala:
Alona mba mi van ki zlad’a d’i!
Kur djib’er mamba pet mi dala:
Alona mi nga d’i!
5Ahle suma mi lazina nga mi fazi tatap;
sariya nga d’i vum mbi;
nga mi gol mam suma djangûna is mi.
6Nga mi de kurum ala: An mba ni giget ti,
vama tcho mba mi lan nduo burâ ki burâ.
7Zla d’a ndeï avunamba nahle suma yid’a,
mbut ira ki zla d’a kad’a;
zla mam mba ded’a ni zla d’a tchod’a,
ni zla d’a ata yat tuo d’a mi.
8Nga mi ngei tam huyok azina,
nga mi tchi suma bei zlad’a kazi ba na,
iram nga d’i d’us dudurup ata suma hohoud’a.
9Mi nga ngeid’a gumun d’igi azlona mi nga ngeid’a ata yam ma domina na,
mi nga ngeid’a á ve suma hohoud’a,
nga mi lop vun suma hohoud’a á ve kabei mamba.
10Mi grif kä, mi bur kä,
suma hohoud’a a ndabomu.
11Nga mi de kurum ala: Alona mi mar wa,
mi tchok wa yam kä, nga mi we d’i.
12Ma didina, ang tchol akulo,
Alona, ang ndjunumiya,
ang mar yam suma hohoud’a d’i.
13Ni kayam me ba, sama asa’atna nga mi golong hina is ke?
Ni kayam me ba, nga mi de kurum ala
ang mba djobom yam sun mamba d’uo ge?
14Wani ang tang nga we suma ndaka
ki suma a nga kid’eyêzi irazina,
ang nga tin irang kazi á ndjunuziya.
Sama hohoud’a mi deng tamî atangû;
angî ma ndjun sama hokuyod’ina.
15Ang kus yam sama asa’atna,
ang ngobom yam tcho mam mba mi lata
gak irang wat tuo#10.15 wat tuo: D’oze, wum mbuo. d’a.
16Ma didina, angî amulâ burâ ki burâ gak didin;
andjaf suma a mba dap pei yam andaga manga.
17Ma didina, ang nga hum zla d’a suma lulumana huruzi minita,
ang nga hazi ad’enga,
ang nga tin humang
18á hum zlad’a hi suma hokuyod’a
ki d’a hi suma a nga kid’eyêzi irazinid’a,
á kazi sariya d’a d’ingêra.
Ar sama yam andagad’a ka hina,
mi mbut suma mandarâ d’uo d’a.
Currently Selected:
Sawal la giled’a 10: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
