Sawal la giled’a 49
49
Tin hur ma yam ndjondjoîd’ina ni lilid’a
1Ni sawal la Kore groma a hlat a hat mi ma ngolâ hi suma hle sawalina.
2-3Agi suma pet, ar agi humugiya!
Agi suma nga kaka yam andagad’ina,
agi suma bei subura ki agi suma subura,
agi suma ndjondjoîna ki agi suma houd’a mi,
ar agi tinigi humagiya!
4Zla d’a nga d’i ndavunanda ni zla d’a irata,
djib’er manda ni djib’er ra djivid’a.
5An nga ni hum hata hi sama ned’id’a,
an nga ni vat ad’ut tei kading ma bud’a.
6Ni kayam me ba, an le mandarâ kur bur ma ndaka
ata yima man suma djangûna a nguyuna ge?
7Azi tin huruzi ni yam ndjondjoî mazid’a,
azi subur tazi ni yam djivi mazid’a go.
8Sana mi ndak á wurak Alona yam ndrama á sud’um mbi,
mam tam mi ndak á wurak yam tam mbuo mi.
9Kayam gusa hi sanid’a ti kal ngola heî;
sana mi ndak á fe va á gus tam mbi.
10Mi ndak á kak didin ndi,
mi ndak á kak bei matna d’uo mi.
11Ei nga wei suma ned’a a nga bo,
suma lilid’a ki suma yazi nga d’uo na pî, a nga bo mi.
A nga ar bege mazid’a woi mi suma dingâ.
12Djib’er mazid’a ala aziyazi mba mi kak didin,
yi mazi ma kaka mba mi ka’î kur atchogoi d’a lara ge pet,
ni na ba, azi yi andaga mazid’a ki simiyêziya.
13Wani sana kur subur mamba hina pet pî,
nga mi kak didin ndi,
mba mi mit ni d’igi ahle suma abageina a bo na mi.
14Wana ni zlad’a hi suma a nga tin huruzi yam azi tazi go na,
ki zlad’a hi suma tazi lazi djivid’a
á hum zla mazid’ina mi.
Tchol ndjö
15Azi ni d’igi ades tumiyô suma a izi á ngad’azina na;
matna mba mi te kaziya,
ar go suma d’ingêrâ a mba mired’ezi kä kaseziya.
Djif mazina mba mi kal leyo,
yima azuleina mba mi mbut ni yi mazi ma kaka.
16Wani Alona mba mi prud’un ndei ata yima azuleina,
kayam mam mba mi pad’an ndei abomu.
Tchol ndjö
17Ata yima sana bege mamba nga d’i zulâ
d’oze ndjondjoî mamba nga d’i i avogovo’â,
ang hat hurung kat ti.
18Kayam me fata mba mi mita, nga mi i ki va abom mbi,
ndjondjoî mamba nga i blogom mbuo mi.
19Kid’a mi nga ki iramba, nga mi subur tamu,
ata yima mi nga kur haheî mambina, suma a suburum mi.
20Wani mba mi i ad’u abuyom ngolo ata yima azulei
ma azi ndak á we b’od’a d’uo gak didina.
21Wani sana kur subur mamba hina pet
ma nga ki wed’a d’uo na,
mba mi mit ni d’igi ahle suma abageina a bo na.
Currently Selected:
Sawal la giled’a 49: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
