Sawal la giled’a 50
50
Alona mi nde tam mbei á ka sariyad’a
1Ni sawal la Asaf mi hlata.
Ma didina Alo ma yam alona petna, mi de zlad’a,
nga mi yï suma yam andagad’ina ei abo ma yorogona dei
gak abo ma fladegena.
2 Siyon nazì ma djif ma kal teglesâ;
Alona nga mi wileï kuru.
3Alo meina nga mi djïya,
nga mi kak ki vunam ma du’â d’i,
aku d’a b’lak yina nga d’i ngal avoromu,
babar ma ngolâ mi nguyumu.
4Nga mi yi akulod’a kandagad’a á le glangâsâ
kayam mam ka sariyad’a yam sum mama.
5Mi dala: Agi togogï man suma d’engzeng
suma a djin vunazi ki sed’en ki buzu ma ngatina.
6Ar akulod’a ti tak d’ingêr mamba woyo,
kayam mam mi ma ka sariyad’a.
Tchol ndjö
7Alona mi dala: Agi humugiya;
agi sum mana, an nga ni dagi zlad’a;
agi Israel-lâ, an nga ni gagi humagiya,
an nAlona, Alo magina.
8Ni yam ahle magi suma ngat buzuna ba, an nga ni ngobogi d’i,
kayam agi nga han he d’a hawa magi d’a ngala teteu.
9An mba ni vamuhl ma avo hatagi tu d’i,
d’oze mbekmbere ma kur kang magi tu d’uo mi,
10kayam ahle suma ari suma aduk agud’ina pet ni mana,
ahle suma ari suma yam ahuniyô suma dubuna pet ni mana mi.
11An waluwei suma yam ahuniyôna pet;
ahle suma abageina pet ni mana mi.
12Ladjï meid’a tchan ni tchiya pî,
an mba ni dagi ni agi mbeî d’i,
kayam duniyad’a ni manda
kahle suma a nga oîd’a kurutna pet mi.
13Na ni an te hliwa amuhlâ zu?
Na ni an tche buzuwa mbekmberena zu?
14Agi hagi vama ngat buzu ma le mersid’a mi an Alo magina,
agi ndagagi vun vun ma hle ma agi hlandji
mi an Ma sä akulo ma kal teglesâ.
15Ata yima agi nga kur ndakina, agi yanu.
Hina wani, an mba ni sud’ugiya, agi mba suburun mi.
16-17Wani Alona mi de mi sama asa’atna ala:
Ang ma noî ngop manda woina,
ang ma tchuk zla manda woi kazigangâ,
le ang ndum gat manda woi avok suma,
le ang nga ki vun man ma djinda navunang go ni,
djivi mata ni me ge?
18Le ang we sama kula ni, ang ve banad’a ki sed’emu;
ang nga le darigïd’a ki suma le mizeuna mi.
19Vunang belemet á de zla d’a tchod’a,
sinang nga d’i par papar á ka zlad’a mi.
20Ang nga min tang á de zla d’a tchod’a yam wiyengâ,
ang nga las wiyeng ma asungâ tamba.
21Wana nahle suma ang lazina, an nga kaka mudjuk.
Kayam ndata, ang djib’er ala an ni d’igi ang na.
Wani an nga ni ngobongû,
an mba ni tagangzi woi irang pid’ak mi.
22Agi suma maragi kana, agi wagi djiviya,
le d’uo ni, an mba ni kizagagi woi kikizak
bei sa mi prud’ugi woi abon ba.
23Sama nga mi he vama ngat buzu ma le mersid’ina,
mi suburun ni anu;
sama nga mi ngom tam kur tit mambina,
an mba ni tagam sut manda mi.
Currently Selected:
Sawal la giled’a 50: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
