Sawal la giled’a 48
48
Siyon nazina hAlonina
1Ni sawal la Kore groma a hlata.
2Ma didina ni ma ngol ma mi ndak á giled’a
kur azì mam ma ngol ma yam ahina mam
mba a tinit irat vatina.
3Nahina d’a djif fa suma
yam andagad’ina pet a nga le furîd’a kata.
Siyon nahina d’a nga abo ma norîd’a,
nazì ma ngolâ hamul ma ngolîna.
4Alona mi nga kaka kur azì máma,
mam mi ad’enga hazì mámid’a.
5Amuleina a tok taziya,
a nga i ad’u tazi á dur azì ma Siyon-na.
6Ata yima azi goloma, azi le atchap,
a le mandarâ, a ringâ.
7Ata yi máma a nga zlaga,
a zlak d’igi atchad’a nga d’i zlak abo vuta na,
8d’igi bato d’a nglo d’a Tarsis-sa nga d’i kus sei
abo babar ma ngol ma abo ma yorogonina na mi.
9Ahle suma ei humizina, ei weizi ki irei
kur azina hi Ma didin ma ad’engêm kal petna,
kur azina hAlo meinina.
Alona mba mi ngom azì máma burâ ki burâ.
Tchol ndjö
10Alo mamina, ami nga djib’eremi yam o manga
kur gong mang nga kud’ora.
11Alo mamina, subur manga ti b’rau woi
avun dabid’a handagad’id’a
d’igi simiyêng mi nde ata yina na;
ang nga tamula ki d’ingêra.
12Kayam sariya mang nga kad’a
suma Siyon-na a le furîd’a,
suma kur azì ma Juda-na a aî ki hur ma hapma mi.
13Agi tid’igi nguyugi gulumun ma Siyon-na,
agi ndumugi azì mam ma fiyak ma ndjola.
14Agi gologi gulumun mama,
agi gologizi ad’eng mamba djiviya.
Hina wani, agi mba dagizi zlam mbei
mi suma kur atchogoi d’a nga d’i mba bugola, ala:
15Alo meina nAlo ma didina;
nga mi ndjuni gak mat meina mbeî.
Currently Selected:
Sawal la giled’a 48: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
