Sawal la giled’a 34
34
David mi gile Alona yam djivi mamba
1Ni sawal la David mi hlat ata yima mi mbut tam d’igi sama lilid’a na avok Abimele’â. Abimelek#34.1 Abimelek: Kur 1 Sam 21.11-16 a yum ala Akis. mi digim mbei avoromu, mi ge tam mi i mi.
2An mba ni subur Ma didina ata yima lara ge pet,
an mba ni gilem ki vunan burâ ki burâ.
3An mba ni subur tan yam Ma didina;
agi suma lulumana, agi humunu, agi lagi furîd’a mi.
4Agi hagi ngola mi Ma didina zlapa ki anu;
ei pet suburum simiyêm mi.
5An hal Ma didina;
mam hulongôn humba,
mam ndan ndei kur mandar mana pet mi.
6Suma a hle irazi á goloma, irazi b’o woyo,
azi nga mbut zulona d’i.
7Ata yima sama hohoud’a mi tchi yam Ma didinina,
mam hulongôm humba,
mam sud’um mbei kur ndak mamba pet mi.
8Malaikana hi Ma didinina nga mi kak ndjola
yam suma a lum mandarama,
mi nga mi sud’uzi woi mi.
9Agi djugumu, agi mba wagi
Ma didina djivi mamba tua d’uo zu?
Sama hal yam ma ngeid’a atama,
mi le furîd’a.
10Agi suma hi Ma didinina, agi lum mandaramu,
kayam suma lum mandarama, va nga mi kid’agazi d’i.
11Azlona groma ahlena a nga kid’agaziya,
meid’a nga d’i tchazi mi,
wani suma a nga hal Ma didinina,
vama djivi ma bei azi fuma nga d’i.
12Grona, mbeï humun-ngiya,
an mba ni had’agi á le mandara Ma didina.
13Ni nge ba, mi min á kak ki iram bei matna,
mi min burum i fiyaka á we djivid’a ge?
14Ar mi d’el sinam á de zla d’a tchod’a,
ar mi d’el vunam á lop suma mi;
15mi wal lei ki tchod’a,
mi le ni djivid’a;
mi hal b’leng nga halasa,
mi tit blogot mi.
16Ma didina iram nga tinda yam suma d’ingêrâ,
humam nga tinda á hum tchi mazina mi.
17Ma didina mi mbut iram á kak djangûna ki suma asa’atna,
á hled’ezi woi yam andagad’a
tala sa djib’er kazi bugol luo d’a.
18Ata yima suma d’ingêrâ a nga tchi ala mi ndjunuziya na,
Ma didina nga mi humuziya,
nga mi pad’azi woi kur ndak mazid’a pet mi.
19Ma didina mi nga go ki suma huruzi b’la’â,
nga mi sut suma huruzi nga mi vazi yam tcho mazid’ina mi.
20Sama d’ingêrâ nga mi fe ndaka teteu,
wani Ma didina nga mi sud’um mbei kurut burâ ki burâ,
21nga mi ngomom asogom pet,
asogom tu pî nga mi kus sei d’i.
22Sama asa’atna mba mi mit yam asa’at mamba,
suma a kak djangûna ki sama d’ingêrîna,
Ma didina mba mi kazi sariyad’a kaziya.
23Ma didina nga mi sut azungeî mama,
nga mi prut suma pet suma a ngei tazi atama woi kur sariyad’a.
Currently Selected:
Sawal la giled’a 34: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
