Sawal la giled’a 33
33
Sawal la kud’ora
1Agi suma d’ingêrâ,
agi eregi ad’ugi akulo ki furîd’a yam Ma didina;
ni djivid’a yam suma d’ingêrâ á gilemu.
2Agi gilegi Ma didina kadingâ,
agi gilem kading ma ziyom dogona.
3Agi gilem ki sawal la awilid’a,
agi bugi ading magina djivid’a,
agi eregi ad’ugi akulo mi.
4Kayam zla d’a ded’a hi Ma didinid’a ni d’ingêr,
sun mam mba led’a pet nata yat mi.
5Hurum ve ni d’ingêra ki gagazid’a;
od’a hi Ma didinid’a ti oî yam andagad’a.
6Ma didina mi lakulod’a ni ki zla mam mba ded’a,
mi lahle suma kurutna pet ni ki zla d’a ndeï avunamba.
7Mi tok mbiyo alum ma ngolâ akulo yam tam ata yima tuna,
mi tin zul la yiyika á togom kua.
8Ar suma yam andagad’ina pet a le mandara Ma didina,
ar suma kur duniyad’ina pet a zlak avorom mi.
9Mi de zlad’a, va máma mi mba;
mi he vuna, va máma mi nga mi.
10Ma didina nga mi b’lak zla d’a andjaf suma a minita woyo,
nga mi b’lak vama suma a ngam kuruzi á led’ina woi mi.
11Wani nga hurâ hi Ma didinina mi nga burâ ki burâ,
djib’er ra kurum krovod’a ti nga ni kur atchogoi d’a lara ge pet mi.
12Andjaf suma Ma didina nAlo mazinina a le furîd’a;
suma mi manazi d’igi djo mama na na a le furîd’a mi.
13Ma didina nga mi golï kur akulod’a,
nga mi we suma pet;
14ata yam ma kaka,
nga mi gol suma yam andagad’ina pet;
15Mam ma lazi huruzi petna,
nga mi gol sun mazi d’a led’a pet mi.
16B’rang nga ngola hamulîd’a ti ndak á sud’um mbi;
ad’enga hi grangîd’a ti ndak á sud’um mbuo mi.
17Akuluma mi nga kad’enga á sut sa d’i;
ad’eng mamba pet ti ndak á sut sa d’uo mi.
18Wani Ma didina iram nga tinda yam suma a lum mandarama,
yam suma tin huruzi yam o mam mba didinda
19á sud’uzi woi avun matna,
á ndjunuzi á kak karid’a ata yima baktarad’ina mi.
20Ei tini huri ni yam Ma didina;
mam mi ma ndjunina,
mam mi mbarei meid’a mi.
21Kayam ndata, ei nga lei furîd’a kuri krovo kamu,
kayam ei dengeî tei ni yam simiyêm Ma bei tchod’ina.
22Ma didina, ar ang lami djivid’a
d’igi ami tinimi hurumi kang na!
Currently Selected:
Sawal la giled’a 33: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
