Sawal la giled’a 35
35
David mi tchen Ma didina á ndjunumu
1Ni sawal la David mi hlata.
Ma didina, ang nde man suma djangûna ayîna,
ang dur ayîna ki suma a nga dur ayîna ki sed’ena.
2Ang hle mbarei manga abongû,
ang tchuk kongrong mangâ atangû,
ang tchol akulo á ndjununu.
3Ang hlasap manga ki djam manga akulo,
ang dur suma a nga djobon vunana,
ang dan ala: An ni ma sud’ungâ!
4Ar suma a min á tchan ndeina
a mbut zulona, a mbut vama lasa;
ar suma a hal á lan tchod’ina
a hulong bugol ki zulona.
5Ar azi mbut ni d’igi bra d’a simetna mi felet teina na,
ar malaika mangâ mi digizi woi mi.
6Ata yima malaika mangâ mi digizina,
ar lovot mazid’a ti mbut nduvunda,
ti mbut azlard’eid’a mi.
7Kayam ni bei zlad’a ba, azi gun abei mazid’a kä á vanu;
ni bei zlad’a ba, azi djugot zula kä kan á tchanu.
8Ar b’laka ti mba kazi dumuzi,
ar azi ve kabei d’a azi tazi gunut kä d’a,
ar azi puk kä kur zul la azi djugud’ota, a ba woyo.
9An mba ni le furîd’a yam Ma didina,
an mba ni le hur ma hapma yam sut mamba.
10An mba ni de zlad’a ki hurun pet ala:
Ma didina, ni nge ba, mi ndak d’igi ang na ge?
Angî ma sut sama hohoud’a woi
abo sama ad’eng mamba kalama,
ang nga sut ma hohoud’a ki ma houd’a woi
abo suma a nga hurumuzi ahle mazinina.
11Suma glangâs suma ka zlad’a a tchol akulo,
a nga djobon yam vama an wum nga d’uo na.
12Azi nga hulongôn tchod’a yam djivid’a.
Gola! An arî van tu.
13Wani ata yima azi nga tugud’eid’ina,
an tchuk dodora atanu,
an mbut tan hohoud’a,
an d’el tan bei te tena,
an tchen Alona kazi ki yan tchoka kä.
14An le hina kazi
d’igi an le ni yam banana d’oze wiyena na,
an tchok yan kä nga ni yor tan
d’igi sana mi tchi hor asum na.
15Wani ata yima an puk kä na,
azi tok tazi á le furîd’a,
azi tok tazi kan á lan tchod’a bei an we ba,
azi nga ton a nga kizagan ndei bei aran ba.
16Ata yima an nga ni i á pukina,
azi nga kiger sanda ad’unu,
azi nga et siyazi atanu.
17Salad’a, ang golon hina tä ni nana ge?
Ang ngomonu, ar azi b’lagan ndi,
ang ngomonu, ar azlo máma mi van ndi.
18An mba ni suburung aduk tok ka ngola,
an mba ni gileng aduk suma ablau ndazina.
19Ar suma a kak djangûna ki sed’en hawa ya’â
a le furîd’a kan ndi,
ar suma a noyôn hawa ya’â
a fon avilid’a d’i.
20Kayam azi nga de zla d’a djivi d’i,
azi nga mbut ir suma halas
suma a nga kaka kur ambasina.
21Azi mal vunazi woi atanu,
a dala: Âhâ! Âhâ!
Irei wum wa!
22Ma didina, ang wahle ndazina, ang kak mudjuk ki;
Ma didina, ang wal lei dei ki sed’en nduo mi.
23Ma didina, ang tchol akulo!
Alo mana, ang zlit akulo á ngomon yam d’ingêr manda,
ang kan sariya manda d’ingêr mi.
24Ma didina, Alo mana, ang ka sariyad’a yam d’ingêr manga,
ar azi le furîd’a kan nduo mi.
25Ar azi de kuruzi ala: Âhâ!
Wana ni vama ami minima d’i;
ar azi dala: Ami ligim wa da’ d’uo mi.
26Ar suma a nga le furîd’a yam ndak mandina
a mbut zulona seseleu;
ar suma a tchol djangûna ki sed’ena
a mbut ndjendjed’a, zulona mi lazi mi.
27Ar suma tazi lazi djivid’a yam d’ingêr mandina
a le furîd’a ki hur ma hapma burâ ki burâ,
ar suma a min halasa hazong mangîd’ina
a de bei ara ba ala: Ei suburi Ma didina!
28Kayam ndata, an mba ni de woi yam d’ingêr manga,
an mba ni gileng burâ ki burâ.
Currently Selected:
Sawal la giled’a 35: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
