Sawal la giled’a 31
31
Tchenda hi sama nga kur kukina
1Ni sawal la David mi hlat mi hat mi ma ngolâ hi suma hle sawalina.
2Ma didina, an ngei tan atangû,
ang aran an mbut zulona yan tu d’i;
ang sud’un ndei yam d’ingêr manga.
3Ang tin humang humunu,
ang mbeï atogo ndjununu,
ang mbut nahina man nda ngei tanda,
ang mbut ni gulumun ma ad’eng ma sud’una.
4Kayam angî ahina manda,
angî gulumun man ma ad’engâ,
kayam simiyêng ang mba tinin kur lovota,
ang mba d’obon mi.
5Ang mba sud’un ndei kur dau ma azi gunum kä gumun avorona,
kayam angî sama ngomona.
6An hang muzugan abongû;
Ma didina Alo ma gagazina, ang sud’un wa woyo.
7An noî suma a min filei ma hawa ya’îna woyo,
an deng tan nata ang Ma didina.
8Yam djivi manga, an mba ni le furîd’a ki hur ma hapma,
kayam ang wan hohou manda,
ang we a’alî d’a atan krovod’a mi.
9Ang han nga abo man ma djangûna d’i,
ang tcholon ndei ata yima pid’a’â.
10Ma didina, ang wan hohowonu, kayam an nga kur yor tad’a,
iran zal wa woi abo tchina, muzugan b’lak wa, an kau wa mi.
11An nga kur pupuluka,
an nga ni zam tan bizad’a ki bizad’a,
ad’engên dap wa woi abo tcho manda,
asogon mi kus wa d’ad’ameî mi.
12An mbut ni vama ngula ir man suma djangûna pet,
an mbut ni vama kraka ir ndrona,
vama mandarâ avor buniyôna;
suma a nga golon ndei abuna a nga ring ngei abonu.
13Azi mar kan d’igi sama mit teina na;
an mbut ni d’igi vama ba woina na.
14An hum zla d’a tcho d’a suma ablaud’a a nga minit kanda;
mandarâ mi nguyun ata yina pet.
Ata yima azi nga ndjak vunazi kana,
a nga hal lovota á tchan ndeyo.
15Wani Ma didina, an nga ni deng tan natangû,
an nga ni dala: Angî Alo mana!
16Bur mana pet nabongû,
ang pad’an ndei abo man suma djangûna,
abo suma a nga djobon vunana mi.
17Ang tin irang kan an azong mangâ djiviya,
ang sud’un ndei yam djivi manga.
18Ma didina, ata yima an nga ni yangâ,
ang aran an mbut zulona d’i;
ar suma asa’atna a mbut zulona,
ar azi i kä azulei ki vunazi ma du’â.
19Ar ang duk vun suma ka zla
suma a nga de zla d’a tchod’a mi suma d’ingêrâ
ki tum didi’â ki gol isina.
20Djivi mang nga ang nga ngomot yam suma
a nga lang mandarangîd’a ti ngola heî,
ni d’a ang lat ki suma a ngei tazi atangâ avok suma peta.
21Ang ngei suma a nga lang mandarangâ kä avorong
abo suma a ndjak vunazi kazina,
ang ngeyezi kä ad’u gong manga
abo suma a nga halazi ki zlad’ina.
22An nga ni subur Ma didina!
Ata yima man suma djangûna a nguyun
d’igi azì ma ngol ma a nguyum
ki gulumun ma ad’eng ma ngunguna na na,
mi tagan djivi mamba.
23Kur mandar mana an dala:
An wal lei dei ki sed’engû,
wani ata yima an tchi kangâ,
ang hum tchen man nda hud’a.
24Agi suma d’ingêrâ hi Ma didinina, agi lagi kamu.
Ma didina nga mi ngom suma a hum gagazid’ina,
nga mi gat suma yam mba ad’enga gat ta tchod’a.
25Agi pet suma tinigi hurugi yam Ma didinina,
agi tchologi ngingring, agi vagi hurugi ad’enga mi.
Currently Selected:
Sawal la giled’a 31: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
