Sawal la giled’a 27
27
Go kAlona mandarâ nga d’i
1Ni sawal la David mi hlata.
Ma didina ni b’o manda ni ma sud’una;
ni nge ba, an mba ni lum mandaram nge?
Ma didina ni ma ngomona;
ni nge ba, an mba ni zlak abom nge?
2Ata yima suma asa’atna a mba ndan ayîna
á kizagan hliwin ndeina,
ni azi suma noyôna ki suma djangû mana ba,
a mba dap asezi a puk kä.
3Le b’ranga ndjar á dur ki sed’en pî,
an mba ni le mandar ri;
le azi tchol á dur ayîna ki sed’en pî,
vunadigan mba d’i tumun nduo mi.
4An nga ni tchen Ma didina
yam vama an nga ni halam ki hur ma hatina:
Nala, an min kak kur gong nga kud’ora
hi Ma didinid’a teteu gak mat mana
á gol subur mamba,
á gol gong mam mba kud’ora ki furîd’a mi.
5Kayam mam mba mi ngomon kur gong mamba kur bur ma tchona,
mam mba mi ngeyen kur zlub’u mamba,
mba mi hlan akulo yam ahinad’a mi.
6Ki tchetchemba, an hle yan akulo
yam man suma djangû suma a nguyuna,
an mba ni he vama ngat buzuna
ki furîd’a ngola kur zlub’u mamba,
an mba ni ge sawala, an mba ni gile Ma didina mi.
7Ma didina, ang humun delenu, an nga ni yangû;
ang wan hohowonu, ang hulongôn humba.
8An djib’er yam zla d’a ang dat ala:
Agi halagi á wan iranu d’a.
Ni kayam ndata ba, Ma didina,
an nga ni hal á wang irangû.
9Ang ngei irang avoron ndi,
ang zut azong mangâ woi kayîna d’i.
Angî ma ndjununa,
ang aran ndei d’i, ang gan ndei d’i,
kayam angî Alo ma sud’una.
10Le abun azi kasun a aran ndei pî,
ang Ma didina mba van atangû.
11Ma didina, ang had’an á tit kur lovot manga,
ang tinin kur lovot ta d’ingêra
abo man suma djangûna.
12Ar ang han ndei abo man suma djangûna d’i,
kayam azi nga le glangâs ma aboina kanu,
azi ni suma a halî murud’um mba led’a tuna.
13Hina pet pî, an we woi tetet ala
an mba ni we djivid’a hi Ma didinid’a
yam andagad’a ka hî!
14Ang tin hurung yam Ma didina,
ang ve tang ad’enga, ar tang tchuk lus si.
Ang tin hurung yam Ma didina.
Currently Selected:
Sawal la giled’a 27: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
