Sawal la giled’a 145
145
Amul mang nga ted’a ni d’a didinda
1Ni sawal la gile d’a David mi hlata.
Alo mana, amul mana, an mba ni hang ngola,
an mba ni gileng simiyêng teteu gak didin.
2An mba ni suburung burâ ki burâ,
an mba ni gileng simiyêng teteu gak didin.
3Ma didina, angî ma ngol ma ndak á suburina;
ngol manga dabi mata nga d’i.
4Ar suma kur atchogoi d’a lara ge petna
a suburung sun manga,
ar a de woi yam sun nda ad’eng nga ang lata.
5An mba ni de woi yam ngol manga,
wile mata ki subur mata,
an mba ni djib’er yam sun mang nga ndandala.
6Azi mba de woi yam ad’eng mang nga kal teglesa,
an mba ni hulong de woi yam ngol manga mi.
7Ar azi de woi yam djivi mang nga ngola,
ar azi de woi yam d’ingêr manga mi.
8Ma didina, angî ma sumad’a,
angî ma we hohowa sumina;
hurung nga mi zal atogo d’i,
wani angî ma o manga nga d’i dap puo na mi.
9Ma didina, angî ma le djivid’a mi suma petna,
angî ma we hohou ahlena pet suma ang lazina.
10Ma didina, ahlena pet suma ang lazina a mba gilengû;
mang suma d’engzengâ a mba suburung mi.
11Azi mba de woi yam te mang nga subura,
azi mba de woi yam sib’ik manga mi.
12Azi mba tak suma yam andagad’ina sun nda ad’eng nga ang lata,
ki subur ra kal papa d’a ang nga te ki yambid’a mi.
13Amul mang nga ted’a ni d’a didinda;
ang nga tamula ni kur atchogoi d’a lara ge pet.
14Ma didina, ang nga vabo suma pet suma a puk kä na akulo,
ang nga d’op suma a gun kä na woi mi.
15Ahlena pet a tin huruzi ni kangû,
a tin irazi ni kang angû;
ni ang ba, nga hazi tena ata yamu.
16Ang nga he tena mahle
suma a nga ki irazi yam andagad’ina;
azi nga hop mi.
17Ma didina ni ma d’ingêrâ kur lovot mamba pet,
mam mi ma djivina kur sun mam mba led’a pet mi.
18Ma didina, mi nga go ki suma a nga yuma,
mi nga go ki suma a nga yum ki hur ma tunina.
19Mi nga ndak vun minda hi suma a nga lum mandarama,
nga mi hum tchi mazina, nga mi sud’uzi mi.
20Ma didina nga mi ngom suma a nga le kama pet,
nga mi b’lak suma asa’atna woi pet mi.
21Ar vunan mi de woi yam giled’a hi Ma didinid’a,
ar suma pet a suburum simiyêm
ma bei tchod’a ba na teteu gak didin.
Currently Selected:
Sawal la giled’a 145: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
