Sawal la giled’a 144
144
Tchenda hamul ma ngolîd’a
1Ni sawal la gile d’a David mi hlata.
An subur Ma didina ahina manda,
kayam mi han ad’enga á durâ,
mi minin lovota á dur ayîna mi.
2Mam mi ma lan djivid’ina,
mam mi yima ad’eng ma ngei tana,
mam mi gulumun ma kana,
mam mi man ma suta, ni mbarei manda,
mam mi yima an ngei tan kuana,
mam mi ma hulongôn yam sum mana kä avorona.
3Ma didina, sana ni nge ba, ang wum ge?
sana goroma ni nge ba, ang djib’er kam ge?
4Sana mi ni d’igi fo d’a avun sanid’a na,
burumî d’igi angusâ nga mi pret na mi.
5Ma didina, ang hud’ï akulo manga kä go,
ang tchugï aseng kä, ang do ahuniyôna kabongû,
ar azi fo akud’a.
6Ang ar alona mi wile mi b’rau man suma djangûna woyo,
ang yed’ï yeû manga ti b’rau azigar mazina woi yayak mi.
7Ang mad’ï abong akulo, ang pad’an ndeyo,
ang sud’un ndei aduk mbiyo ma nglona,
abo angoyogei
8suma a nga de zla d’a irat tuo
suma a nga hlabozi ma ndjufâ akulo
á gun tazi ir gurzulina.
9Alo mana, an mba ni gileng ki sawal la awilid’a,
an mba ni gileng kading ma ziyom dogona.
10Ang ma nga sut amuleinina,
ang sud’un an azong mangâ David woi
avun mbigeu d’a fiyak ka tchi matna.
11Ang sud’un ndeyo,
ang prud’un ndei abo angoyogei
suma a nga de zla d’a irat tuo
suma a nga hlabozi ma ndjufâ akulo
á gun tazi ir gurzulina.
12Ar gromi suma ndjofâ a ka’î
d’igi agu ma pe ma wul abom keina na.
Ar gromi suma aropma a ka’î
d’igi ahle suma a d’udjozi huyok
gonga hamulîd’a á mbud’ut djifina na mi.
13Ar avurei mamina a oyâ,
a sulul kä woi avunazi mbûmbû
kandjaf awu ma lara ge pet.
Ar d’uwar mami ma gureina
mi zul dubu dubu,
mi zul dudubud’a dogo kel aziyami mi.
14Ar amuzlei mamina a zula.
Ar suma a pleyêmi woi d’i,
ar azi yomi magomba d’i,
ar sa mi tchi avo hatami d’uo mi.
15Suma a lazi hina na a le furîd’a;
suma Ma didina nAlo mazinina a le furîd’a.
Currently Selected:
Sawal la giled’a 144: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
