Sawal la giled’a 143
143
Ma didina, ang kan sariyad’a kan ndi
1Ni sawal la gile d’a David mi hlata.
Ma didina, ang hum tchen manda,
ang hum tchen man nda hud’a,
ang hulongôn humba yam d’engzeng manga
yam d’ingêr manga mi.
2Ang ka sariyad’a yam an azong mangâ d’i,
kayam sama d’ingêr nga yam andagad’a avorong ngi.
3Ma djangûna nga mi diginu,
nga mi mired’en kä andaga,
nga mi zud’un kur yima nduvunda
d’igi suma a bo adjeu dedeina na.
4Djib’er manda nga ata yat ti,
hurun b’lak kurun krovo mi.
5An nga ni djib’er yam bur ma adjeuna,
an hulong nga ni djib’er yam sun manga,
an nga ni djib’er yam sun nda ang lat kabonga mi.
6An yo abon akulo avorong á tchenengû,
an nga ni hat hurun kang
d’igi andaga d’a sod’a nga d’i hat hurut yam mbina na.
Tchol ndjö
7Ma didina, ang hulongôn humba atogo zak,
kayam an nga ni lá bad’a,
ang ngei tang iran ndi,
ar an mbut d’igi suma a tchuk kä kur zulina na d’i.
8Ki yorogod’a ang aran
an hum zla o mang nga bei dabid’a ba d’a,
kayam an tin hurun ni kayam angû.
Ang tagan lovot ta ndak an tit kuad’a,
kayam an he tan ni mi angû.
9Ma didina, ang prud’un ndei abo man suma djangûna;
an ngei tan natangû.
10Ang had’an á le min manga,
kayam angî Alo mana.
Ar Muzuk mang ma djivina
mi tinin yam andaga d’a abo tat tud’a.
11Ma didina, yam simiyêngû, ang sud’unu;
yam d’ingêr manga, ang pad’an ndei kur ndaka.
12Yam o mang nga didinda,
ang duk vun man suma djangûna akulo,
ang tchi suma a nga tchan iran tata ki zlad’ina woi pet,
kayam an nazong mangâ.
Currently Selected:
Sawal la giled’a 143: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
