Sawal la giled’a 119
119
Sawal la gile d’a yam zlad’a hAlonid’a
1Suma a nga tit kur lovot mazi d’a d’ingêr
suma a nga tit yam gata hi Ma didinid’a
a le furîd’a.
2Suma a nga ngom vun mam ma hed’a
suma a nga halam ki huruzi petna,
a le furîd’a mi.
3Gagazi, a nga le vama tcho d’i,
a nga tit kur lovot mamba.
4Ang hami gat manga
tala ami tid’imi kat ki hur ma tuna d’a.
5Ar tit manda ndak memet
kayambala an ngom gat manga d’a.
6Hina wani, ata yima an mba ni djib’er
yam vun mang ma hed’a petna,
zulona mba mi lan ndi.
7Ata yima an mba ni hat nga hur mang ma iratnina,
an mba ni gileng ki hurun ma tuna.
8An min ni tit yam gat manga;
ang aran ndei ki irang fafat ti.
9Ni nana ba, azongâ mba mi tit tit ta irata ge?
Nata yima nga mi ngom zla mangina.
10An nga ni halang ki hurun pet;
ar an d’es sei yam vun mang ma hed’a d’i!
11An nga ni ngom zla manga kurun
kayambala an le tchod’a avorong nguo d’a.
12Ma didina, an nga ni suburungû!
Ang had’an gat manga.
13Nga hur mang ma ndeï avunangâ,
an mba ni ndumum mbei ki vunan tutu pet.
14An mba ni le furîd’a
yam tit ta ni tit yam gat mangid’a
d’igi an nga ni kahle suma ndjondjoîna na.
15An nga ni djib’er yam vun mang ma hed’a,
iran nga tinda yam lovot manga mi.
16An nga ni le furîd’a yam gat manga,
an nga ni mar yam zla manga d’i.
17Ang lan an azong mangâ djivid’a,
kayam an kak karid’a, an ngom zla manga mi.
18Ang malan iran ndeyo,
kayam an wahle suma ndandal
suma a nga kur gat mangina.
19An nakoina yam andagad’a ka hî;
ar ang ngeyen vun mang ma hed’a d’i.
20Hurun nga mi hat yam nga hur mang
ma ang nga ngam teteuna.
21Ang ngop suma yam mba ad’enga suma ang gazi vuna
suma a vit tei yam vun mang ma hed’ina.
22Ang hlan ngula ki gol la a golon isa woi kanu,
kayam an nga ni ngom gat manga.
23Le suma nglona a tok nga kä
á de zla d’a tchod’a kan pî,
an azong mangâ ni ngomî gat manga.
24Vun mang ma hed’a ni furî manda;
ni mam ba, mi dan d’alâ.
25An nga ni ged’a kä aduk andaga d’a gugud’upa;
yam zla manga ang tcholon akulo.
26An vang ad’u zla manda; ang humunu,
ang had’an gat manga.
27Ang had’an á wäd’u gat manga;
an mba ni de woi yam ahle mang suma ndandalâ.
28Kur ndak manda an nga ni tchiya;
yam zla manga ang tcholon akulo.
29Ang walan ndei ki zla d’a kad’a,
yam djivi manga ang tagan gat manga.
30An man lovot ta irata,
an ge yan kä ad’u nga hur mangâ mi.
31An nga ni reîd’a ki vun mang ma hed’a;
Ma didina, ar ang mbud’un zulona d’i.
32An nga ni ring kur lovota hi vun mang ma hed’id’a,
kayam ang b’lengên hurunu.
33Ma didina, ang had’an lovota hi gat mangid’a
kayambala an ngomot gak dabi manda d’a.
34Ang han ned’a kayambala an tit yam gat manga,
an ngomot ki hurun pet mi d’a.
35Ang tinin á tit yam vun mang ma hed’a,
kayam an hurun vumu.
36Ang tinin hurun yam ahle suma fed’a d’i,
wani ang tinin hurun ni yam vun mang ma hed’a.
37Ang mbud’un iran ndei yam ahle suma hawa ya’â,
ar an tit ni kur lovot ta lang tang djivid’id’a.
38Ar ang ndak vun vun mang ma hle
ma ang hlum mi suma a nga lang mandarangâ
ki an azong mangâ mi na.
39Ang hlan ngul la an nga ni lat mandarata woi kanu,
kayam nga hur mangâ mi djivid’a.
40Gola! Tan nga d’i lan djivid’a yam gat manga,
ang han arid’a yam d’ingêr manga mi.
41Ma didina, ar ang tagan o mang nga didinda,
ar ang sud’un d’igi ang hle vunang na.
42Hina wani, an mba ni hulong ded’a
mi sama nga mi mbud’un zulonina,
kayam an tin hurun ni yam zla manga.
43Ang pat zla d’a gagazid’a woi avunan ndi,
kayam an nga ni djup sariya mang
nga kad’a ki hur ma tinda.
44An mba ni ngom gat manga bei ara ba,
an mba ni ngomot gak didin mi.
45An mba ni tit ki halasa,
kayam an nga ni hal ad’u gat manga.
46An mba ni le glangâsâ woi
yam vun mang ma hed’a avok amuleina;
zulona mba mi lan nduo mi.
47An nga ni le furîd’a
yam vun mang ma he ma an hurun vuma.
48An nga ni yo abon akulo á tchenda
yam vun mang ma he ma an hurun vuma,
an min ni djib’er yam gat manga mi.
49Ang djib’er yam zla d’a ang dat mi an azong mangâ
d’a ang tinin hurun kata.
50Wana ni b’leng hur man ma kur ndak mandina:
Kayam vun mang ma hled’a mi han arid’a.
51Suma yam mba ad’enga a nga san ad’unu,
wani an wal nga woi ki gat manga d’i.
52Ma didina, an nga ni djib’er
yam sariya mang nga ka d’a dedeid’a,
nga d’i b’lengên hurun mi.
53An ka guruta yam suma asa’at
suma a ar gat manga woina.
54Gat manga ti mbut ni sawal man nda hled’a
kur azì ma an nga mbeid’a kuana.
55Ma didina, andjege dangâla
an nga ni djib’er yam simiyêng
á ngom gat manga.
56Wana ni vama an ndak á luma,
an ni ngomî gat manga.
57Ma didina, an dala:
Sun man nda an lata ni ngomî zla manga.
58An nga ni halang ki hurun pet á lang tang djivid’a;
ar ang b’e vunang kan d’igi ang hle vunang na.
59An djib’er yam tit manda,
an hulongî á tit yam vun mang ma hed’a.
60An nga ni le lilinga d’i, an nga ni b’at tan
á ngom vun mang ma hed’a.
61Dauna hi suma asa’atnina mi vanu,
wani an nga ni mar yam gat manga d’i.
62Aduk andjege d’a dangâlad’a an nga ni tchol akulo
á gileng yam sariya mang nga ka d’a d’ingêra.
63An zlap tu ki suma a nga lang mandarang
suma a nga ngom gat mangina.
64Ma didina, o mang nga didinda ti oî yam andagad’a;
ang had’an gat manga.
65Ma didina, ang nga le djivid’a ki an azong mangâ
d’igi ang hle vunang na.
66Ang had’an wad’ud’a ki ned’a,
kayam an tin hurun ni yam vun mang ma hed’a.
67Avok ka an bei ge yan kä tua d’a, an vit teyo;
ki tchetchemba, an nga ni ngom zla manga.
68Angî ma djivi ma le suma djivid’ina;
ang had’an gat manga.
69Suma yam mba ad’enga a nga togon zla d’a kad’a kanu,
wani an nga ni ngom gat manga ki hurun pet.
70Azi huruzi mi ni b’ala d’igi mbul ma b’ala na,
wani an nga ni le furîd’a yam gat manga.
71Ata yima an nga kur ndakina
ni vama djivina kanu,
kayam an tin ad’ud’a á hat gat manga.
72Gat ta ti ndeï avunanga, ti djivid’a kan an
kal lora ki bege d’a hap pa dudubud’a.
73Nabong ba, mi lanu, mi siran ni mam mi;
ang han ned’a kayam an hat vun mang ma hed’a.
74Suma a ringîng mandarangâ a wanu, a le furîd’a,
kayam an tin hurun ni yam zla manga.
75Ma didina, an wala sariya mang nga kad’a ni d’ingêr;
ni kur gagazid’a ba, ang hulongôn yan kä.
76Ar o mang nga didinda ti b’lengên hurun
d’igi ang hle vunang mi an azong mangâ na.
77Ar ang wan hohowon ndala an kak ki iranu d’a;
kayam tan nga d’i lan djivid’a yam gat manga.
78Ar suma yam mba ad’eng suma a nga lan ndaka
bei ad’ut ba na, a mbut zulona,
wani an nga ni djib’erî yam gat manga.
79Ar suma a nga ringîng mandarang
suma a we vun mang ma hed’ina,
a mbeï gevenu.
80Ar an kak d’ingêr á tit yam gat manga,
kayam an mbut zulona avorong ngi.
81An kau wa abo djup pa an nga ni djup sut mangid’a,
an tin hurun ni yam zla manga mi.
82Iran ndi kau wa abo gol
la an nga ni gol vun mang ma hled’id’a,
an dala: Ni mindja ba, ang mba b’lengên hurun nge?
83An ni d’igi mbumbul ma a gabam akulo ad’u andosîna na,
wan pî, an nga ni mar yam gat manga d’i.
84An azong mangâ burun mi ni ga ge?
Ni mindja ba, ang mba ka sariyad’a
yam suma a nga djobon vunana ge?
85Suma yam mba ad’eng
suma a nga tit yam gat manga d’uo na,
a djugot nga zula kä avoronu.
86Vun mang ma hed’a pet ni ma iratna;
azi nga digin bei ad’u zlad’a ba;
ang mbeï ndjununu.
87Ar hina nde azi tchan ndeyo,
wani an ar nga gat manga woi d’i.
88Yam o mang nga didinda ang aran an kak ki iran
á ngom vun mang ma he ma mi ndeï avunangâ.
89Ma didina, zla manga ti nga ni teteu;
yat ma kak ma didina mi sä nakulo.
90D’engzeng manga ti nga
ni kur atchogoi d’a lara ge pet.
Ang landagad’a; ti nga kaka mi.
91Ni kayam nga hur mangâ ba,
ahlena a nga kaka wana;
azi pet a nga lang sunda mi.
92Ladjï gat manga ni furî manda d’uo ni,
an ba wa woi kur ndak manda.
93An mba ni mar yam gat manga yan tu d’i;
ni kayam ndat ba, an nga kaka ki iran wana.
94An ni mangâ, ang sud’unu,
kayam an nga ni halî gat manga.
95Suma asa’atna a nga djubun á ban ndeyo,
wani an ni nga kaka tchugot á hum vun mang ma hed’a.
96An we dabid’a hahle suma djivinid’a pet,
wani vun mang ma hed’a, dabi mamba nga d’i.
97Ni yan ga ba, an le yam gat manga ge?
Ni ndat ba, an nga ni djib’er kat burâ ki burâ.
98Vun mang ma hed’a nga mi han ned’a
kal man suma djangûna,
kayam an nga ki sed’em teteu.
99Ne manda ti kal la hi suma a had’anid’a pet,
kayam an nga ni djib’er yam vun mang ma hed’a.
100D’al mana mi kal ma hi suma momorogeinina,
kayam an nga ni ngom gat manga.
101An nga ni d’el tan á tit kur lovot ta tchod’a,
kayam an tin hurun ni yam zla manga.
102An nga ni wal lei ki nga hur mangâ d’i,
kayam ni ang ba, nga had’anu.
103Vun mang ma hled’a nadjib’eta avunanu,
ma adjib’eta avunan kal mbul ayuma.
104Ni yam gat manga ba, an mbut sama d’alâ.
Ni kayam ndata ba, an nga ni noî zla d’a kad’a woi pet wana.
105Zla manga ni lalam mba b’o yina avoronda,
naku d’a b’o hur lovot mandid’a mi.
106An gun tanu, an nga tchola yam zla ndata
á ngom nga hur mang ma d’ingêrâ.
107An nga kur ndaka ngola.
Ma didina, ang han arid’a yam zla manga.
108Ma didina, ang ve tchen manda
d’igi he d’a hawad’a na,
ang had’an nga hur mangâ.
109An nga navun matna teteu,
wani an mar nga yam gat manga d’i.
110Suma asa’atna a gun nga dauna avoron kä,
wani an wal nga woi ki gat manga d’i.
111Vun mang ma hed’a ni djo man ma te ma gak didina,
kayam mam mi furî manda.
112An tin hurun á le sunda yam gat manga,
kayam ndat ni wurak man nda gak didinda.
113An noî suma mbàmbàd’a woyo,
wani hurun ve ni gat manga.
114Angî yan ma ngeid’a, angî mbarei manda;
an tin hurun ni yam zla manga.
115Agi suma asa’atna,
agi hud’ugi sä woi dei ki sed’enu,
kayam an ngomî vun ma hed’a hAlo manina.
116Ang ndjunun yam vun mang ma hled’a,
kayam an kak ki iranu.
Ar an mbut zulona yam hur man ma tinda d’i.
117Ang ka’î ma ndjununa á sud’un
ndala an tin djib’er manda
yam gat manga tetewu d’a.
118Ang dik suma a wal lei dei
ki gat mangina woyo,
kayam mbut ir mazid’a zlat nga d’i.
119Ang nga yo suma asa’at suma yam andagad’ina woi
d’igi a yo sud’o tchafa woi na.
Kayam ndata, an nga ni le yam vun mang ma hed’a.
120Hliwin nga mi zlak ki mandarâ djidjik avorongû,
an nga ni ring mandara sariya mang nga kad’a mi.
121An nga ni le sun nda d’ingêr ra irata;
ar ang han abo suma a nga djobon vunana d’i.
122Ang gaban an azong manga
yam djivi mang nga kanda;
ar suma yam mba ad’enga a lan ndaka d’i.
123Iran ndi kau wa abo gol la an nga ni gol sut mangid’a;
abo hal la an nga ni hal
d’ingêr mang nga ang he vuna kata mi.
124Yam o mang nga didinda
ang wan hohowon an azong mangâ,
ang had’an gat manga mi.
125Ang han an azong mangâ d’alâ
tala an we vun mang ma hed’a d’a.
126Ma didina, yina ndak wa ang le va,
kayam suma a nga tchila yam gat manga.
127Ni kayam ndata ba,
an min vun mang ma hed’a kal lora;
gagazi, an minim kal lor ra kal teglesa.
128An gol gat manga pet ni d’ingêr.
Ni kayam ndat ba,
an nga ni noî zla d’a kad’a woi pet wana.
129Vun mang ma hed’a ni vama ndandalâ.
Ni kayam ndata ba, an nga ni ngomomu.
130Ndäd’u zla mang nga woid’a nga d’i b’o yina,
nga d’i he d’alâ mi suma bei wäd’u zlad’ina mi.
131An ngo vunan ndei hagak á hum zla manga,
kayam vun mang ma hed’a zlam nga d’i lan heî.
132Ang mbud’ï irang kanu,
ang wan hohowon d’igi ang hle vunang
mi suma a nga le yam simiyêngâ na.
133Ang siran ad’enga yam zla manga,
ar tchod’a ti te kan ndi.
134Ang prud’un ndei abo suma a nga djobon vunana
kayambala an ngom gat manga d’a.
135Ang tin irang kan an azong mangâ,
ang had’an gat manga.
136Iran nga d’i djang simina d’igi mbina na,
kayam suma a nga ngom gat manga d’i.
137Ma didina, angî ma d’ingêrâ;
sariya mang nga kad’a ni d’a irata mi.
138Ang tin vun mang ma hed’a ni ki d’ingêra
ni ki gagazi d’a ngola mi.
139Hur man ma hata, mi kal wa kanu,
kayam man suma djangûna
a mar wa woi yam zla manga.
140Vun mang ma hled’a ad’um mbi nde woi tetet.
Ni kayam ndata ba, an azong mangâ nga ni le kamu.
141Suma a nga golon ni d’igi vama hawana na,
a golon is mi.
Wani an nga ni mar yam gat manga d’i.
142D’ingêr manga ni d’a didinda;
gat manga ni d’a gagazid’a mi.
143An nga kur ndaka ki djop vuna,
wani vun mang ma hed’a nga mi lan tan djivid’a.
144Vun mang ma hed’a ni ma d’ingêr ma didina.
Ni kayam ndata ba,
ang han d’alâ kua á kak ki iranu.
145Ma didina, an nga ni yang kad’engên pet;
ang humunu, kayam an ngom gat manga.
146An nga ni yangû; ang sud’unu,
kayam an ngom vun mang ma hed’a.
147Kid’a yina bei fo tua d’a,
an nga ni yangû,
an nga ni tin hurun yam zla manga.
148Kur ler ra andjeged’a pet
an nga kaka ki iran
á djib’er yam vun mang ma hled’a.
149Ma didina, yam o mang nga didinda
ang humun delenu;
ang aran an kak ki iran yam nga hur mangâ.
150Suma a djobon vunan suma murud’umba,
a hud’ï wa go gevenu;
ni suma a wal lei dei ki gat mangina.
151Ma didina, ang nga go,
vun mang ma hed’a ni ma gagazina mi.
152An we woi adjeu dei ala
vun mang ma hed’a ang tinimî á kak gak didin.
153Ang wan ndak manda, ang prud’un ndeyo,
kayam an mar nga yam gat manga d’i.
154Ang ve zla manda abongû, ang ndjununu,
ang aran an kak ki iran yam vun mang ma hled’a.
155Suta ti ni woi dei ki suma asa’atna,
kayam azi nga hal ad’u gat manga d’i.
156Ma didina, we hohou manga ti ngola heî;
ang aran an kak ki iran yam nga hur mangâ.
157Man suma a djobon vunan
suma djangûna a nablaud’a;
wan pî, an wal nga woi dei
ki vun mang ma hed’a d’i.
158An nga ni gol suma mbut ira is,
kayam a ngom nga vun mang ma hled’a d’i.
159Ma didina, ang wala an hurun ve gat manga;
ang aran an kak ki iran yam o mang nga didinda.
160Zla manga sideyet ni gagazid’a,
nga hur mang ma d’ingêrâ pet ni ma gak didina mi.
161Suma avok sumina a nga djobon vunan
bei zlad’a kan ba,
wani an nga ni ringî mandara zla manga.
162An nga ni le furîd’a yam vun mang ma hled’a
d’igi sama mi hurumï ahlena ablaud’a
ata yima ayînina na.
163An noî zla d’a kad’a woyo,
an golot ni vama ndjendjed’a,
wani an hurun ve ni gat manga.
164Kur bur tu, an nga ni gileng yan kid’iziya,
yam nga hur mang ma d’ingêrâ.
165Suma huruzi ve gat mangina
a mba kak ki halasa ngola;
vama dabazi asezi nga d’uo mi.
166Ma didina, an tin hurun ni yam sut manga,
an tit ni yam vun mang ma hed’a mi.
167An nga ni ngom vun mang ma hed’a,
hurun vum heî mi.
168An nga ni ngom gat manga ki vun mang ma hed’a,
kayam tit manda pet navorongû.
169Ma didina, ar ang hum tchi mana,
ar ang han d’alâ yam zla manga mi.
170Ar ang hum tchen man nda hud’a,
ar ang prud’un ndei yam vun mang ma hled’a mi.
171Ar an de woi ki vunan yam subur manga,
kayam ang nga had’an gat manga.
172Ar an hle sawala yam vun mang ma hled’a,
kayam vun mang ma hed’a pet ni d’ingêr.
173Ar ang mad’ï abong ang ndjununu,
kayam an man ni gat manga.
174Ma didina, an nga ni le d’od’oka yam sut manga,
tan nga d’i lan djivid’a yam gat manga mi.
175Ar an kak ki iran á gilengû,
ar sariya mang nga kad’a ti ndjunun mi.
176An vit tei d’igi timi ma vit teina na;
ang halan an azong mangâ,
kayam an mar nga yam vun mang ma hed’a d’i.
Currently Selected:
Sawal la giled’a 119: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
