Sawal la giled’a 118
118
We hohoud’a ki djivid’a hi Ma didinid’a
1Agi gilegi Ma didina,
kayam mam mi ma djivina,
kayam o mamba, ti nga ni hina gak didin!
2Ar Israel-lâ a dala:
Kayam o mamba nga d’i dap pi!
3Ar andjafâ hi Aron-na mi dala:
Kayam o mamba nga d’i dap pi!
4Ar suma a ringîm mandarama a dala:
Kayam o mamba nga d’i dap pi!
5Kid’a an nga kur ndakid’a,
an yi Ma didina;
Ma didina mi humunu,
mi pad’an ndei kuru.
6Ma didina mi nga kanu;
an nga ni ring mandar ri.
Suma a mba lan ni me ge?
7Ma didina ni man ma ndjununa;
an mba ni we kus sa Ma didina
mi kus yam suma a noyônid’a.
8Vama kalâ, ang hal yima ngeid’a ata Ma didina,
kal la ang tin hurung yam sanid’a.
9Vama kalâ, ang hal yima ngeid’a ata Ma didina,
kal la ang tin hurung yam suma nglonid’a.
10Andjaf suma dingâ pet a nguyunu;
ki simiyê Ma didina an pleyêzi woi yayak.
11Azi nguyun ata yina pet;
ki simiyê Ma didina an pleyêzi woi yayak.
12Azi ngruvun d’igi ayuma mi ngruf yam sana na;
azi nga mit tei d’igi aku d’a ti ngal aweid’id’a na,
ki simiyê Ma didina an pleyêzi woi yayak.
13Azi zud’un ad’enga vir á gan kä,
wani Ma didina mi ndjununu.
14Ma didina nad’eng manda,
ni sawal manda bangâna mi.
Mba mi sud’un ndeyo.
15Sawal la furîd’a ki d’a bangâna,
a nga humut navo hi suma d’ingêrâ;
Ma didina abom ma ndjufâ
nga mi le sunda kad’enga;
16Ma didina abom ma ndjufâ
mi nga zid’a akulo zi;
Ma didina abom ma ndjufâ
nga mi le sunda kad’enga.
17An mba ni mit ti, an mba ni kak ki iranu,
an mba ni de woi yam sunda hi Ma didinid’a.
18Ma didina mi ngobonu,
wani mi han nga abo matna d’i.
19Agi malan vun agre’â hi suma d’ingêrîna woyo;
an kal kua, an gile Ma didina.
20Wana ni vun agre’â hi Ma didinina;
natam mam ba, suma d’ingêrâ a kal kua.
21An mba ni gilengû,
kayam ang humunu,
ang mba sud’un ndeyo.
22Ahina d’a suma djak gonga a gat teid’a,
ti mbut ta djik gonga akulod’a.
23Ahle ndazina a tcholï nata Ma didina;
ni vama ndandalâ irei eya.
24Wana ni bur ma vun til ma Ma didina mi luma;
ar ei erei ad’ui akulo
ki furîd’a ki hur ma hapma mi!
25Ma didina, ang sud’umiya!
Ma didina, ang b’e vuna kamiya!
26Ar Ma didina mi b’e vunam
yam sama nga mi mba ki simiyê Ma didinina;
ami suma kur gong nga kud’ora hi Ma didinid’ina,
ami nga b’ami vunami kagi mi.
27Ma didina tu nAlona,
ni mam ba, nga mi b’o keya.
Agi tinigi luna, agi yogi hum aguna abogiya,
agi igi ki sed’em gak ata yi
ma ngal ahle suma ngat buzuna.
28Angî Alo mana, an mba ni gilengû;
Alo mana, an mba ni hang ngola!
29Agi gilegi Ma didina,
kayam mam mi ma djivina,
kayam o mamba nga d’i dap puo mi.
Currently Selected:
Sawal la giled’a 118: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
