Sawal la giled’a 104
104
Ei gilei Alo ma ad’engêm kal petna
1An min gile Ma didina!
Ma didina Alo mana, angî ma ngol ma kal teglesâ,
angî ma nga ki subura ki b’o d’a ngal wiwilikina.
2angî ma tchuk b’od’a atang
d’igi sana mi tchuk baruna atam na na,
ang gang akulod’a
d’igi sana mi gang azid’a akulo na mi.
3Ang nga min aziyang akulo yam mbina,
ang mbut d’ugula d’igi pusâ hakulumeinina na,
ang nga dal akulo yam simetna.
4Ang mbut simetna ni d’igi sama ang sunuma na,
ang mbut sin akud’a ni d’igi sama lang sundina na mi.
5Ang tin andagad’a ni yam ad’ut ta ged’a;
ti nga ni kaka hina ngingring bei gigeta ba gak didin.
6Ang zlubut yat kä ki mbiyo ma ngolâ
d’igi sana mi zlup baruna atam na;
mbina mi mba mi tchol yam ahuniyôna.
7Kid’a ang ngobomba, mi ringâ,
mi b’at tam á ring abo breî manga.
8Mbina mi djang kä angra ahuniyôna,
mi djak i kur hora,
mi i gak ata yima ang ngamzina.
9Ang tinim nga haga mamba tala mi tchila kat ba,
mi mba mi hlup yam andagad’a d’uo d’a.
10Ang sunï mbiyo ma djangâ kur toliyonda,
nga mi djang angra ahuniyôna.
11Ahle suma abageina pet a nga tchumu,
koro ma abageina nga mi ndak vun lau mamba ni ki mam mi.
12Aluweina a nga min aziyazi ata agu ma avunama,
a nga tchi hum agu máma teteng mi.
13Ata yang ma kak ma sä akulona,
ang nga se alona yam ahuniyôna;
ahlena oî andagad’a ni yam sun nda ang lata.
14Ang nga deî asuna yam d’uwarâ,
kahle suma sana nga mi zumuzina,
kayam azi fe te mazina yam andagad’a.
15Ang hazi süm guguzlud’a kayam mi lazi tazi djivid’a,
ang hazi mbulâ kayam tazi d’i mbut aklongîd’id’a,
ang hazi avuna kayam azi fad’enga mi.
16Ma didina, agu mang ma nglona,
mbina ndagamu;
agu sedre ma Liban ma ang puma,
mbina ndagam mi.
17Ni kua ba, aluweina a nga min aziyaziya,
alei sïna nga mi min aziyamî hum agu siprena mi.
18Ahuniyô suma fuyogeina ni yima kaka hahu abeid’ina,
ahuniyô suma djodjohlâ ni yima ngeid’a hahînina.
19Ang le tilâ á tak yina,
ang le afata, nga d’i we yi mat ma nika mi.
20Ang le nduvunda; ni ndata ba, andjeged’a nga;
ni kur nduvun ndata ba, ahle suma abageina a yo tita.
21Azlo ma azongâ nga mi tchi á hal vama mam vuma,
nga mi hal te mama nata ang Alona.
22Ata yima afata deîna,
mi hulong burâ kä kur domi mama.
23Ata yi máma sana mi nde á le sun mamba,
mi le sun nda kaud’a gak fladege.
24Ma didina, sun mang nga ang lata ti zul heî;
ang lat pet ni ki ned’a,
andagad’a ti oî kahle suma ang lazina.
25Gola! Alum ma ngol ma bendenga heî
ma sana mi ndak á wum gongôd’i mamba d’uo na,
ahle suma gureina kahle suma nglo
suma sana mi ndak á ndumuzi d’uo na,
a nga nus kä kuru.
26Batod’a nga d’i djang kuru,
ambur ma ngol ma a yum ala Leviyatan#104.26 Leviyatan: Mi hle tamî d’igi huruma d’oze gariyama na. Ki tchetchemba, mi nga d’i. ma ang luma,
nga mi lü kurum mi.
27Ahle ndazina pet a nga tin djib’er mazid’a ni kang ang
kayambala ang hazi te mazina ata yamu d’a.
28Ang nga haziziya, azi nga te;
ang nga lazi djivid’a, azi nga hop kahle suma djivina mi.
29Le ang mbud’uzi azigangû ni,
azi mbut mandarâ;
le ang d’el muzuk mazid’a ni,
azi mba bo, azi hulong mbut nandaga d’a gugud’upa.
30Ang hazi muzuk manga, ang lazi le d’a dinga,
ang mbut ahlena awilid’a pet yam andagad’a.
31Ma didina, ar subur manga ti ka’î hina gak didin,
ar ang le furîd’a yam sun nda ang lata.
32Ang gol andagad’a, andagad’a ti zlaga,
ang do ahuniyôna, andosâ rip kaziya.
33Ma didina, kur kak manda yam andagad’id’a pet,
an min gileng ki sawala;
Alo mana, ata yima an nga ki iran tua na,
an mba ni gilengû.
34Ar djib’er manda ti lang tang djivid’a.
Ma didina, an min le furîd’a kangû.
35Ar suma le tchod’a a vit tei yam andagad’a,
ar suma asa’atna a dap pei ki irazi fafat.
An min gile Ma didina!
Agi gilegi Ma didina mi!
Currently Selected:
Sawal la giled’a 104: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
