Sawal la giled’a 103
103
Od’a hAlonid’a
1Wana ni sawal la gile d’a David mi hlata.
An min gile ni Ma didina,
an min gile Alo man ma bei tchod’ina ki hurun pet.
2An min gile ni Ma didina,
an nga ni mar yam djivi mam mba led’a tu d’i.
3Mam mi ma vat hurum mbei yam tcho mandina;
mam mi ma sud’un ndei kur tugud’ei mandina.
4Mam mi ma nga mi prud’un ndei ata yima azuleinina,
ni ma mi oyôn ki o mam mba didinda ki we hohoud’ina mi.
5Ni ma hobon kahle suma djivina kur mamarana,
ni ma mbud’un azongôn d’igi b’arauna na na.
6Ma didina ni ma mi ka sariya d’a d’ingêrina,
ni ma mi ka sariya d’a irata
mi suma a nga djobozi vunazina.
7Mi tak lovot mamba woi mi Moise,
mi tak sun mam mba ndandala woi
mi Israel-lâ mi.
8Ma didina ni ma mi we hohowa sumina,
ni ma sumad’a,
ni ma hurum nga mi zal atogo d’uo na,
ni ma nga oîd’a ki o mam mba didindina mi.
9Ni ma nga mi ngop teteu d’uo na,
ni ma nga mi ve sa kurum ki iram fafat tuo na mi.
10Ni ma nga mi toi yam tcho meid’a d’uo na,
ni ma nga mi wuragei yam tchila meid’a d’uo na mi.
11O mam mba didinda kal lei akulo
yam suma a nga lum mandarama,
d’igi akulod’a ti kal lei akulo yam andagad’a na mi.
12Mi wal tcho mei d’a led’a woi dei ki sed’ei
d’igi mi wal abo ma yorogona kabo ma fladegena woi na mi.
13Ma didina nga mi le yam mam suma d’engzengâ
d’igi abud’a nga mi le yam groma na mi.
14Mi we vama mi lei ki na,
mi djib’er ala ei nandaga d’a gugud’upa.
15Sana burum ni d’igi asuna na,
mi ni d’igi b’od’a hasu ma abageinid’a na mi.
16Ata yima simetna mi sir kama, mi felem mbeyo;
blangâm mi ar kä hawa papana mi.
17Wani od’a hi Ma didinid’a
ti nga ni yam suma a nga ringîm mandarama
hina gak didin;
d’ingêr mamba
ti nga yam grozina ki grozi ngolona,
18yam suma a nga ngom vun mam ma djindina,
yam suma a nga djib’er yam gat mamba á ndagat memetna mi.
19Ma didina mi tin nga zlam mam mba amula sä akulo,
nga mi tamula yam ahlena pet mi.
20Agi malaikana hi Ma didina
suma ad’eng suma kal papa
suma nga lagi sunda yam zla mamba
suma nga gagi yagi kä ad’u zla mam mba ded’ina,
agi gilemu!
21Agi b’rang nga akulod’a hi Ma didina
suma nga lum sunda suma nga lagi min mambina,
agi gilemu!
22Agi ahle suma Ma didina mi lagi
ata yima nga mi te leud’a kuana pet,
agi gilemu!
An tan pî ni min gilem mi!
Currently Selected:
Sawal la giled’a 103: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
