Sawal la giled’a 105
105
Alona ki sum mama
(Ni yam verse ma 1-15-hlâ, ang gol 1 Sun hAm 16.8-22)
1Agi gilegi Ma didina, agi dagi woi yam ngol mamba,
agi tagam sun mamba woi aduk andjaf suma dingâ mi.
2Agi hlagizi sawala, agi gilem ki sawala,
agi dagi woi yam sun mam mba ndandala mi.
3Ar agi suburugi tagi yam simiyê ma bei tchod’a ba na.
Agi suma nga halagi Ma didinina,
agi lagi furîd’a kurugi krovo.
4Agi halagi Ma didin ma ad’engêm kal petna,
agi halagi á wum iram teteu mi.
5-6Agi andjafâ hazong mama Abraham-ma,
agi andjafâ hi Jakob ma mam manama,
agi djib’eregi yam sun mam mba ndandal la mam lata,
yam ahle suma yoyouna ki sariya d’a nga mi kata mi.
7Mam mi Ma didina Alo meina,
sariya mam mba kad’a ti nga yam andagad’a pet mi.
8Mam nga mi djib’er teteu yam vun mam ma djinda,
yam vun mam ma he ma mam hum yam atchogoi d’a dubud’ina.
9Mi nga mi djib’er
yam vun ma djin ma mam djinim ki Abraham-ma,
ki gun nda mam gun tam mi Isak-ka mi.
10Ni gat mam mba mi tinit mi Jakob-pa,
mi tinit mandjafâ hi Israel-lîna
tala ti ka’î hina gak didinu d’a.
11Mi dala: An mba ni hang ambas sa Kanan-nda
d’igi djo mang ma ted’a na.
12Kur atchogoi ndata, azi ni hina kendjine,
azi suma mbeid’a a ni hina kap mbà ganang.
13Azi nga i aduk andjaf ma hî, aduk andjaf ma hî,
kur leu d’a hî, kur leu d’a hî mi.
14Wani Alona ar nga lovota mi sa á lazi ndaka d’i,
nga mi ngop amuleina kazi mi.
15Mi dazi ala: Agi dogi man suma an manazina d’i,
agi lagi man suma djok vuna vama tcho d’uo mi.
16Alona mi ar baktarad’a ti nde yam andagad’a,
mi d’el vun ahle mazi suma tena pet.
17Mi sun sana avorozi tu.
Ni Josef ma azi guzum mbei d’igi magoma na na.
18Azi gum aleina asemu,
azi djinim ki kindjingâ,
19gak bur ma zla mamba nda’â,
gak zlad’a hi Ma didinid’a tak kei kam ala zla nga kam mbi.
20Amulâ Faron mi he vuna ala azi gum akulo;
amul ma te yam sumina, mi gum akulo.
21Mi tinim ngola yam aziyamu,
mi tinim á te yam ahle mama pet,
22á ngop mam suma nglona kur min mamba,
á had’azi ned’a mi.
23Bugol ahle ndazina Israel mi i yam ambas sa Ezipte-d’a;
Jakob mi kak angeina yam ambasa hi Ham-mba.
24Ma didina mi zul sum mama ablaud’a;
ad’engêzi kal mazi suma djangûna mi.
25Mi mbut hur Ezipte-na tchod’a ataziya;
a nde noî sum mama,
a nde mbut ir azungeî mam ndazina mi.
26Mi sun azong mama Moise
azi ki Aron ma mam manama ataziya.
27A ndak vun sun mam mba mi tagazizi woi
adigazi kad’eng mambid’a,
a tak ahle mam suma ndandalâ woi
kur ambasa hi Ham-mba.
28Mi sunï nduvunda yam ambasa,
ambasa ti mbut nduvunda i’îlik.
Azi nga kak djangûna ki zla mamba d’i.
29Mi mbut alum mazina buzuna,
mi tchazi kuluf mazina woi mi.
30Andaga mazid’a ti oî ki greneûna o’odjo,
mi tchuk klavi hamulei mazina mi.
31Alona mi he vuna; aro ma tchona mi mba,
vurutna mi oî yam andaga mazid’a pet mi.
32Mi ar zla d’a mi sazi alona kazid’a ta,
mi sazi ni mogoina kazi
kaku d’a ngal bibiliud’a yam ambas mazid’a zang.
33Mi b’lagazi guguzlu mazid’a ki tulum mazina woyo,
mi kuzuzi agu mazi ma nglona woi ndjondjom mi.
34Alona mi he vuna kua; djera ti buzuga,
djer ra ndjongâ ti zul ablaud’a;
sana mi ndak á ndumut tuo mi.
35Ti dap hum asu mazina ted’a kakaf,
ti dap vud’agu mazina ted’a kakaf mi.
36Mi tchi grozi suma a vud’uzi avo’â woi yam ambasa,
grozi sumala nad’engêzi d’a avoka na.
37Mi buzuk sum mama woi ki kawei ma hapma
ki lora oîd’a aboziya.
Sa aduk sum mama tu pî mi it nga d’i.
38Ezipte-na a le furîd’a yam buzuk mazid’a,
kayam mandar ma azi lum yam Israel-lîna mi vaziya.
39Mi tin d’ugula á zlubuzi yaziya,
mi tin akud’a á b’o yina andjege mi.
40Yam tchen mazid’a, mi hazi tcheged’a,
mi hobozi kavu ma ndeï akulona mi.
41Mi mal ir ahinad’a, mbina buzuk keyo,
mi djang hur ful ma gangrasâ d’igi aluma na.
42Kayam mi djib’er yam vun mam ma hle ma irat
ma mi hlum mi azong mama Abraham-ma,
43mi buzuk sum mama woyo, a le furîd’a;
suma mi manazina a hle sawala.
44Mi hazi andagad’a handjaf suma dingîd’a,
mi hazi ahle suma sum ndazina a le sunda kazina hawa,
45kayambala azi mba ngom vun mam ma hed’a
a tin irazi yam gat mamba mi d’a.
Agi gilegi Ma didina!
Currently Selected:
Sawal la giled’a 105: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
