Sawal la giled’a 102
102
Ndaka ki tin hurâ
1Wana ni tchenda hi sama nga kur ndaka ma mi nga mi tcha tata ma mi de zla mamba avok Ma didinina.
2Ma didina, ang hum tchen manda,
ar tchi mana mi ndeza humangû!
3Kur bur ma an nga kur ndakina,
ar ang ngei irang avoron ndi!
Kur bur ma an yangâ, ar ang tin humang humunu,
ar ang hulongôn humba atogo zak mi!
4Burun nga mi kal lei d’igi andosâ mi valei na;
hliwin mi gakud’a kekeng mi.
5An mbut ni d’igi asu ma a ngad’am mi so woina na,
an mar yam te mana mi.
6Suma a nga hum zam ta manda,
asogon mi ar tchuka woi abu ni mam tcha.
7An mbut ni d’igi bud’uf fa hur fulîd’a na,
an mbut ni d’igi tchohô d’a hur djonid’a na.
8An nga ni fo yina ki iranu,
ni mbut ni d’igi alei ma vam tu
ma nga kaka akulo yam azid’ina na.
9Burâ ki burâ man suma djangûna
a nga halan ki zlad’a kanu,
huruzi nga mi zal kanu,
azi nga gun tazi kan mi.
10An te butna ni d’igi avuna na,
an tche ahlena ni ki simina aduk mi.
11Kur ayî mangâ ki hur mang ma zal ma gugulu’â,
ang hlan gan ndei dei ki sed’engû.
12Burun nga mi pret d’igi angusâ mi pret na;
an ni mbut ni d’igi asu ma so woina na.
13Wani Ma didina, ang namul ma nga kaka gak didina,
ang nAlo ma nga kur atchogoi d’a lara ge petna.
14Ang mba tchol akulo á we hohowa Siyon,
kayam ni bur ma wat hohowotna.
Gagazi, bur matna ndak wa da’!
15Kayam ami azungeî mangâ hurumi ve ahuniyô matna,
b’lak mazid’a hohoud’a ti vami ad’uziya.
16Andjaf suma yam andagad’ina pet
a mba ring mandara simiyêng ang Ma didina;
amulei suma yam andagad’ina pet
a mba ring mandarâ abo subur manga mi.
17Fata Ma didina mi min Siyon akulod’a,
mba mi tak tam mbei kur subur mamba.
18Mba mi hum tchenda hi suma hohoud’id’a,
mba mi gol tchen mazid’a is suo mi.
19Ar a b’ir ahle ndazina mi suma
kur atchogoi d’a nga d’i mbad’a
tala suma a vud’uzi kur atchogoi ndatina
a gile Ma didina d’a.
20Ei akulo dei Ma didina mi mbud’ï iram á gol yina.
Ei kur yi mam ma bei tchod’a ba na,
mi mbud’ï iram kä yam andagad’a
21á hum tchina hi suma a yozi magombina,
á tchuk suma a kazi sariya d’a matna kazina akulo.
22Ata yi máma azi mba de woi
yam simiyê Ma didina avo Siyon,
azi mba gilem ki sawala avo Jerusalem.
23Kur bur máma andjaf suma pet a mba toga,
suma kur leud’ina pet a mba kud’or Ma didina.
24Mi mbud’un amangeîd’a
kur kak man nda yam andagad’id’a,
mi didagan burun ndei bugol mi.
25An dala: Alo mana,
ang ma nga kaka kur atchogoi d’a lara ge petna,
ang hlan avok burun bei dapa d’i.
26Ni ang ba, läd’u andagad’a avok dedei;
akulod’a ni sun nda ang lat kabonga.
27Aziya, a mba b’lak kei pet,
wani angû, ang mba kak gak didin.
Azi mba mbut adjeud’a d’igi baruna na.
Ang mba vragazi d’igi baruna na;
azi mba mbut ni vama vraka.
28Wani angû, ang nga mbut ti,
bizang mba d’i dap puo mi.
29Azungeî mangâ grozina a mba fe yima kaka,
andjavazi mi mba mi tchol avorong didin mi.
Currently Selected:
Sawal la giled’a 102: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
