Ndumba 34
34
Haga d’a Kanan-nda
1Ma didina mi de mi Moise ala: 2Ang he vuna mi Israel-lâ, ang dazi ala: Ma didina mi dala: Fata agi mba kalagi kur ambas sa Kanan-ndid’a, haga mat ta wanda mba d’i arî djo magina. 3Andaga magi d’a abo ma sutnid’a mba d’i tinï ad’uda ni hur ful ma Tisin-na go ki Edom. Hina wani, haga magid’a mba d’i tchol avun dabid’a hapo d’a Matna abo ma yorogona. 4Ti mba d’i kongî abo ma sut ma djak akulo aduk ahina d’a Akrabim-mbina, ti i Tisin, ti kal gak ti i abo ma sutna hi Kades-Barneya-na, mba d’i i Hasar-Adar gak Asmon. 5Ti tchol Asmon, ti kong gak ti i avun toliyon nda Ezipte-d’a á dabï avun alum ma ngol ma Mediterane-na.
6Haga magi d’a abo ma fladegenid’a nalum ma ngol ma Mediterane-na. Ni mam ba, mba mi ar haga magi d’a abo ma fladegenid’a.
7Wana ni haga magi d’a abo ma norîd’a: Tinï ad’ud’a avun alum ma ngol ma Mediterane-na, agi wagat gak i gattcha yam ahina d’a Hor-ra. 8Tchol yam ahina d’a Hor-ra, agi it gak Hamat, agi mbat Sedat. 9Ti mba d’i i gak Zifron, mba d’i dabï Hasar-Enan. Wana ni haga magi d’a abo ma norîd’a.
10Agi wagagi haga d’a abo ma yorogonid’a: Ti tcholï Hasar-Enan, ti mba Sefam. 11Ti tcholï Sefam, ti i irat abo ma Ribla abo ma yorogona hi Ayin-na, ti kal gak ti hleï avun alum ma Kinerot-na abo ma yorogona, 12ti kal i avun alum ma Jurdê-na á i kur apo d’a Matna. Wana nambas magid’a ki haga mat ta nguyuta.
13Moise mi djok vun ma he máma mi Israel-lâ, mi dazi ala: Wana nambas sa agi mba b’rawat ki togina d’a Ma didina mi he vuna kat á hat mandjaf ma zlengâ kabona tuna, 14kayam andjafâ hi Ruben-na kandjafâ hi Gad-na kabo andjafâ hi Manase-na a yo djo mazina ad’u andjafâ habuyozina da’. 15Andjaf ma mbà kabo máma mi yo djo mama abo ma yorogona abo alum ma Jurdê-na woi hî ngagad’a yam Jeriko d’ar.
16Ma didina mi de mi Moise ala: 17Wana ni simiyê suma a mba b’rawagi ambasa adigagina: Ni ma ngat buzuna Elazar ki Josue Nun goroma. 18Agi yogi suma nglona ad’u andjafâ gagang á b’rau ambasa. 19Wana ni simiyê sum ndazina:
Ma ad’u andjafâ hi Juda-nina ni Kalep Jefune goroma:
20Ma ad’u andjafâ hi Simeon-nina ni Samuel Amihut goroma:
21Ma ad’u andjafâ hi Benjamin-nina ni Elidat Kislon goroma;
22Ma ad’u andjafâ hi Dan-nina ni Buki Jogli goroma;
23Aduk Josef groma, ma ad’u andjafâ hi Manase-nina ni Haniyel Efot goroma;
24Ma ad’u andjafâ hi Efraim-mina ni Kemuwel Siftan goroma;
25Ma ad’u andjafâ hi Zabulon-nina ni Elisafan Parnak goroma;
26Ma ad’u andjafâ hi Isakar-rîna ni Paltiyel Azan goroma;
27Ma ad’u andjafâ hi Aser-rîna ni Ahihut Selomi goroma;
28Ma ad’u andjafâ hi Neftali-nina ni Pedahel Amihut goroma.
29Wana ni suma Ma didina mi hazi vuna á b’rau ambas sa Kanan-nda aduk Israel-lîna.
Currently Selected:
Ndumba 34: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
