Ndumba 35
35
Ambasa hi suma hi Levi-nid’a
1Ma didina mi de mi Moise hur ful la Mowap pa go kalum ma Jurdê-na d’a ngagad’a yam Jeriko d’ara mi dala: 2Ang i de mi Israel-lâ a he azì ma nglona aduk djo ma azi tuma mi suma hi Levi-na kayambala a kak kua d’a. Ang dazi ala: Agi hazi yina bugol azì ma nglo máma mi. 3Ar azi fe azì ma nglona á kak kua, huyok azina ni yam d’uwar mazina mi. 4Yima agi mba aram huyok azina mi suma hi Levi-nina, mba mi tinï ad’ud’a ata gulumuna hazì ma ngolîna i iram abo ma abuna ndak metred’a kikis vahl ngui woi d’uhl. 5Agi ngagi huyok azì ma ngolâ abo ma yorogona metred’a dubu, abo ma sutna metred’a dubu, abo ma fladegena metred’a dubu, abo ma norâ metred’a dubu mi, azì ma ngolâ mi arî adugu. Wana ni yima huyok aziyazina.
6Azì ma nglo ma agi mba hum mi suma hi Levi-nina, agi hazi azina karagaya nazì ma le sana mi tchi matna ba mi i ngei tam kuana zlapa kazì ma nglo ma dok fid’i yam mbàna mi. 7Azì ma nglo ma agi mba hum mi suma hi Levi-nina pet ni dok fid’i yam klavandi ki huyok azì mazina mi. 8Azì ma agi mba hum mi suma hi Levi-na aduk djona hi Israel-lîna, suma ablau suma a fe yina ngolina, a hazi yina ngola, suma akid’ei suma a fe yina akid’eid’ina, a hazi yina akid’eid’a mi. Nge pî mba mi he azina mi suma hi Levi-na nata djo ma mam fuma.
Azì ma nglo ma ngei tad’a
9Ma didina mi de mi Moise ala: 10Ang i de mi Israel-lâ ala: Ma didina mi dala: Fata agi djagagi alum ma Jurdê-na á kalagi yam ambas sa Kanan-ndid’a, 11agi tinigi azì ma nglona kagi á ngei tagiya. Nazì ma le sana mi tchi matna bei min mamba ba mi ring kuana. 12Azì máma mba mi ndjunugi á ngei tagi abo sama mi min hlatchugulina kayambala sama mi tchi matnina a tchum mbei avok bei im avok ablaud’a á ka sariyad’a kam mbuo d’a. 13Aduk azì ma nglo ma agi mba huma, ma ngei tad’a ni karagaya. 14Agi hagi azì ma nglona hindi abo alum ma Jurdê-na woi hî, hindi yam ambas sa Kanan-nda mi. Wana nazì ma nglo ma ngei tagina. 15Azì máma mba mi ndjun Israel-lâ kangeina ki ma lara pî ma nga kaka adigagina á ngei tamu. Ni kur azì máma ba, sama mi tchi matna bei min mamba ba na, mba mi ring kua.
16Le sana mi tum ndrama ki vama kaweina ba, mi mid’a ni, ni sama tchi matna. A tchi ma tchi mat máma woi mi. 17Le mi tumumî kahinad’a ba, mi mid’a ni, ni sama tchi matna. A tchi ma tchi mat máma woi mi. 18Le mi tumumî kaguna ba, mi mid’a ni, ni sama tchi matna. A tchi ma tchi mat máma woi mi. 19Sama hlatchugula le mi fe sama tchi mat máma ni, mi tchum mbeyo.
20Le sana mi ve ndrama kurumu, mi gum vana kam ir d’ugura ba, mi mid’a, 21d’oze le mi tumum ki hur ma sulu’â ba, mi mid’a ni, sama mi tumuma a tchum mbeyo; ni sama tchi matna. Le sama hlatchugula mi fumu ni, mi tchum mbeyo.
22Wani le sana mi zut ndrama kad’enga bei adigazi djangûna ba, d’oze mi gumî va kam bei d’ugura aduk taziya, 23d’oze mi gumî ahinana kam bei mi we ba, mi mit bei mam vum kurum bei mi halam ki zla d’a tcho ba mi ni, 24wana ni gat ta ablaud’a ti ka ki sariyad’a aduk sama mi tchi matnina ki sama hlatchugulina: 25Ablaud’a mba d’i prut sama tchi mat máma woi abo sama hlatchugula, ti hulongôm kur azì ma ngei ta ma mi ring kuana. Mam mba mi kak sä kua gak matna hi ma ngol ma ngat buzuna ma a vom mbul ma a tinim iram vama kamina.
26Le sama tchi matna mi nde woi kur ambasa hazì ma ngei tam ma mi ring kuana ba, 27sama hlatchugula mi fum mbei bugol azì ma ngei tad’a ba, mi tchumu ni, zla nga kam yam tchid’a mi tchumba d’i, 28kayam ma tchi matna mi ndak á kak kur azì ma ngei tad’a gak matna hi ma ngol ma ngat buzunina. Ni bugol mat mama tua ba, mi hulong yam andaga mamba.
29Wana ni vun ma he ma ngad’a kagi agi kandjavagi ata yima lara ma agi mba kagagi kuana: 30Le sana mi tchi sana ni, a mba tchi ma tchi mat máma ni yam glangâsâ hi suma tetengâ, wani glangâs ma tuna ndak nga á ka sariyad’a yam sana á tchum mbi. 31Agi vagi wuraka yam sama tchi mat ma ndak á tchid’ina d’i, kayam mi ndak á tchid’a. 32Agi vagi wuraka abom tala mi ring kur azì mam ma ngei tad’a á hulong kur ambas mamba bugol matna hi ma ngol ma ngat buzuna d’a d’i. 33Ar agi mbud’ugi ambas sa agi mba kaka kata ndjendjed’a d’i, kayam buzuna mi mbut ambasa ndjendjed’a. Buzu ma ding ma ndak á zlup yam ambasina nga d’i, ni buzuna hi sama mi tchi matnina hol. 34Ar agi mbud’ugi ambas sa agi mba kagagi kua d’a an mba ni kak adigagid’a ndjendjed’a d’i, kayam an ni Ma didin ma nga kaka adigagina.
Currently Selected:
Ndumba 35: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
