Sunda hi suma hi Levi-nid’a 17
17
YED’ETA HI ISRAEL-LÎD’A
(17—27)
Gat ta yam yima ngal ahle suma ngat buzunina
1Ma didina mi de mi Moise ala: 2Ang i de mi Aron azi ki groma ki Israel-lâ pet ala:
Wana ni vun ma hed’a hi an Ma didinina: 3Le ma Israel-lâ mi ngat amuhlâ d’oze timina d’oze b’ëd’a kur kangâ d’oze bugol kangâ ba, 4le mi mbam nga avun zlub’u d’a ngaf tad’a á hum he d’a hawad’a avogon an Ma didina ata yima a tinim iram vama d’uo ni, an mba ni ndum buzuna hi va mámina ni yam sa máma. Kayam mi vo ni buzuna woyo, a mba pad’am mbei aduk sum mama. 5Ni kayambala Israel-lâ a ngat ahle mazi suma ngat buzuna kä woi abagei kel luo a mbazi ni mi ma ngat buzuna avogon an Ma didina, avun zlub’u d’a ngaf tad’a, a hazi mi an Ma didina vama ngat buzu ma zlap darigïd’a d’a. 6Ma ngat buzu máma mi yam buzuna akulo yam yima ngal ahle suma ngat buzuna hi an Ma didinina avun zlub’u d’a ngaf tad’a, mi ngal mbulâ d’ala mi his afufuîd’a avogon an Ma didina d’a. 7Ar azi ngat ahle mazi suma ngat buzuna mi filei ma mi hle tam dedege d’igi mbekmberena na na d’i. Ar azi mbut tazi ndjendjed’a ki sed’em mbi. Gat ndata ti arî gat ta didinda kazi kandjavaziya.
8Le ma Israel-lâ d’oze angei ma nga kak adigagina, mi he vama ngat buzu ma ngala d’oze vama ngat buzuna, 9le mi im nga avun zlub’u d’a ngaf tad’a á hum vama ngat buzuna mi an Ma didina d’uo ni, a mba pat sa máma woi aduk sum mama.
10Le ma Israel-lâ d’oze angei ma nga kaka adigagina, mi te buzuna hi vama lara ni, an mba ni mbut iran ni kak djangûna ki sama te buzu mámina, a mba pad’am mbei aduk sum mama. 11Kayam arid’a hi vana ni kur buzuna, an hagizi yam yima ngal ahle suma ngat buzuna; ni kayambala mi zlup yam tcho magid’a d’a. Kayam ni buzu ma djang ngeina ba, mi zlup yam tchod’a, mi ar sana mi kak karid’a mi. 12Ni kayam ndata ba, an de mi Israel-lâ ala: Ar sa adigagi mi te buzuna d’uo ni na, ar angei ma nga kaka adigagina mi te buzuna d’uo mi.
13Le ma Israel-lâ d’oze angei ma nga kaka adigagina, mi veï azarâ d’oze alei ma ndak á ted’ina kur nduwan mamba ni, mi ngad’amu, ar buzuwam mi djang kä woi andaga, mi tok andagad’a kamu. 14Arid’a hahlenid’a pet ni kur buzuwaziya. Ni kayam ndata ba, an de mi Israel-lâ ala: Ar agi tagi buzuna hi va tu d’i, kayam arid’a hahlenid’a pet ni kur buzuwaziya. Sama lara ma mi te buzunina, a mba pad’am mbei aduk sum mama.
15Le ma Israel ma lara d’oze angei ma nga kaka adigagina, mi mut vama mitna d’oze ma vana mi vuma ni, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege. Ni hina tua ba, mi mbut yed’et. 16Le mi mbus nga baru mama ki tam mbei d’uo ni, tcho mamba arî kam na.
Currently Selected:
Sunda hi suma hi Levi-nid’a 17: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
