Sunda hi suma hi Levi-nid’a 18
18
Gat ta yam atchad’a ki mandjufîd’a
1Ma didina mi de mi Moise ala: 2Ang i de mi Israel-lâ ala:
An ni Ma didina Alo magina. 3Ar agi lagi ahle suma suma yam ambas sa Ezipte d’a agi kagagï kata a lazina d’i, d’oze agi lagi ahle suma suma yam ambas sa Kanan nda an nga ni igi kua wanda a nga lazina d’i. Agi tid’igi yam gat mazid’a d’uo mi. 4Agi tid’igi yam vun man ma hed’a, agi ngomogi gat manda, agi tid’igi kaziya, kayam an ni Ma didina Alo magina.
5Agi ngomogi gat manda ki vun man ma hed’a. Sama nga mi tit kazina mba mi kak karid’a ni kaziya, kayam an ni Ma didina.
6Ar sa adigagi mi bur ki sumamamba d’i, kayam an ni Ma didina.
7Ar ang bur kasung á mbut abung zulona d’i. Ang bur ki sed’et ti, kayam ndat nasungû.
8Ar ang bur katchabunga d’i, kayam ang mbut nabung zulona.
9Ar ang bur ki wiyeng nga abunga d’oze wiyeng nga asung nga a vud’ut kä avod’a d’oze d’a a vud’ud’ï woi yam andagad’a dingid’a d’uo mi.
10Ar ang bur ki gorong ngolod’a hi gorongîd’a d’oze gorong ngolod’a hi gorongid’a d’i, kayam azi ni grongâ.
11Ar ang bur katchabunga gorot ta a vud’ut mabunga d’i, kayam ndat ni wiyenga.
12Ar ang bur kabang nga abunga d’i, kayam ndat nabung sum mamba.
13Ar ang bur kabang nga asunga d’i, kayam ndat nasung sum mata.
14Ar ang bur katchad’a habung wiyemid’a d’i, kayam ndat nasungû.
15Ar ang bur kakunong nga gorongâ amambid’a d’i, kayam ndat natchad’a hi gorongîd’a. Ar ang bur ki sed’et ti.
16Ar ang bur ki wiyengâ amamba d’i, kayam ndat natchad’a hi wiyengîd’a.
17Ar ang bur katchad’a azi ki gorota djak ki, ar ang ve gorotna goromba d’oze gorota gorota d’uo mi, kayam azi ni suma taziya. Le ang le hina ni, ni vama ndjendjed’a.
18Ar ang ve amanga wiyeta ata yima amanga nga ki irat tua na d’i, kayam ti tchol ki huneîd’a d’i.
19Ar ang bur katchad’a ata yima buzuna fat mi mbud’ut ndjendjed’ina d’i.
20Ar ang bur katchad’a hi ndrangâ á mbut tang ndjendjed’a ki sed’et ti.
21Ar ang he gorongâ vama ngat buzuna malo ma a yum ala Molo’â á kud’urom á b’lak an Alo mangâ simiyên ndi, kayam an ni Ma didina.
22Ar ang bur ki mandjufâ d’igi sana mi bur katchad’a na d’i, kayam ni sun nda ndjendje d’a kal teglesa.
23Ar ang bur ki d’uwarâ á mbut tang ndjendjed’a ki sed’em mbi. Ar atchad’a ti bur ki d’uwarâ á zlap tu ki sed’em mbi, kayam ni sun nda batranga.
24Ar agi mbud’ugi tagi ndjendjed’a kahle ndazina d’i, kayam ni kahle ndazina ba, andjaf suma an nga ni digizi woi avorogina, a mbut ki tazi ndjendjed’a. 25Ambas ndata ti mbut ndjendjed’a. Ni kayam ndata ba, an ngobot yam tcho mata; ti noî sum matna woyo.
26Ar agi tid’igi yam gat manda ki vun man ma hed’a, ar agi d’oze angei ma nga kaka adigagina sa mi lahle suma ndjendje ndazina tu d’i. 27Kayam suma a kak yam andaga d’a wanda avorogina a lahle ndazina, ambasa ti mbut ki ndjendjed’a wana. 28Ar agi lagi ahle ndazina tala ambas ndata ti noyôgi woi yam ndjendje magid’a d’igi ti noî suma a kak avorogi katna na d’uo d’a. 29Kayam suma pet suma a mba le andjaf ndjendje d’a hina d’ina, a mba pad’azi woi aduk sum mazina.
30Agi tid’igi yam vun man ma hed’a, agi lagi sun nda ndjendje d’a a lat avorogi kuad’a d’i, agi mbud’ugi tagi ndjendjed’a ki sed’et tuo mi, kayam an ni Ma didina Alo magina.
Currently Selected:
Sunda hi suma hi Levi-nid’a 18: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
