Sunda hi suma hi Levi-nid’a 16
16
Bur ma ngol ma zlup yam tchod’ina
1Bugol matna hi Aron grom suma mbà suma a i a ngal dubang ma his djivid’ina ba a bona, 2Ma didina mi de mi Moise ala: Ang i de mi wiyengâ Aron, ar mi kal ata yima a tinim iram vam ma kal tegles ma nga bugol baru d’a ka ira ma nga avok yima we hohou ma nga akulo yam zandu’îna teteu tala mi mit tuo d’a. Kayam an mba ni nde woi kur d’ugula yam yima we hohou ma nga akulo yam zandu’îna.
3Wana ni lovot ta Aron mba mi kal ki kur yima a tinim iram vam ma kal teglesid’a: Mi vamuhl ma azongâ yam vama ngat buzu ma zlup yam tchod’a, mi ve gamlâna yam vama ngat buzu ma ngala. 4Mi mbus tam mbeyo, mi tchuk baru d’a ngol la luluî d’a a tinit irat vata atam ki kalsong ma luluîna, mi djin d’ik ma luluîna furumu, mi d’ut kadamul la luluîd’a kam mi. Wana ni baru ma a tinim iram vam ma mam tchugum atama. 5Mi yo mbekmberena abo ablaud’a hi Israel-lîd’a mbà yam vama ngat buzu ma zlup yam tchod’a, gamlâna tu yam vama ngat buzu ma ngala mi.
6Aron mi hamuhl máma vama ngat buzu ma zlup yam tcho mamba ki d’a hi sum mamid’a. 7Mi yo mbekmbere suma mbà ndazina, mi tcholozi avogon an Ma didina avun zlub’u d’a ngaf tad’a. 8Mi le togina kazi djak á we ni ma lara ba, ni hi an Ma didina, ni ma lara ba, ni hi Azazel-lâ ge? 9Mi he ma togina nde kam á hum mi an Ma didinina vama ngat buzu ma zlup yam tchod’a. 10Mi tchol ma togina nde kam á hum mi Azazel-lâ avogon an Ma didina á zlup yam tchod’a, á digim mbei abagei hur fulâ mi Azazel.
11Aron mi hamuhl mama vama ngat buzuna á zlup yam tcho mamba ki d’a hi sum mamid’a, mi ngat amuhl mama yam tchod’a. 12Mi hle vama yo akud’a, mi oyôm ki gordjo ma hîhîk ma akulo yam yima ngal ahle suma ngat buzuna avogon an Ma didinina, mi yo dubang ma his djivid’a ma a giligima hur abom tutuk mbà, mi i ki sed’em bugol baru d’a ka ira. 13Mi tchugum yam akud’a avogon an Ma didina, kayam andozom mi d’us mi kulup yam yima we hohou ma akulo yam zanduk ma glangâsîna. Hina wani, mam mba mi mit ti.
14Mi go buzuna hamuhlîna, mi yamam ki tchitchid’am tu ata yima we hohoud’a abom ma yorogona, mi yamam ki tchitchid’am yayam yam kid’iziya avok yima we hohoud’a. 15Mi ngat mbekmberena á zlup yam tchod’a hablau sumid’a, mi i ki buzuna bugol baru d’a ka ira, mi le ki va máma d’igi mi le ki buzuna hamuhlîna na, mi yam buzuna yam yima we hohoud’a mi na, mi yamam ata abom ma avoroma mi. 16Ni hina ba, mba mi mbut yima a tinim iram vam ma kal teglesâ yed’et yam ndjendjed’a hi Israel-lîd’a ki murud’um mazid’a ki tcho mazi d’a azi lata pet, mba mi le hina yam zlub’u d’a ngaf ta d’a nga adigazi azi suma ndjendjed’id’a.
17Ar sa mi kak kur zlub’u d’a ngaf tad’a ata yima mam kal á mbut yima a tinim iram vam ma kal teglesâ yed’etna d’uo gak mi nde woi abu tua. Mba mi zlup yam tcho mamba, ki d’a hi sum mamid’a, ki d’a hablau Israel-lîd’a pet mi. 18Ata yima mi nde woi ata yima ngal ahle suma ngat buzu ma nga avogon an Ma didinina, mi mbut yima ngal ahle suma ngat buzuna yed’et, mi go buzuna hamuhlîna ki buzuna hi mbekmberenina, mi yamam akulo keng yima ngal ahle suma ngat buzu ma djedjed’engâ mi nguyum mbei d’uhl. 19Mi yamam ki tchitchid’am ata yima ngal ahle suma ngat buzuna yayam yam kid’iziya, mi mbud’um yed’et, mi tinim iram vam yam ndjendjed’a hi Israel-lîd’a.
20Le mi mbut wa yima a tinim iram vam ma kal teglesâ yed’et ki zlub’u d’a ngaf tad’a ki yima ngal ahle suma ngat buzuna da ni, a mbam mbekmbere ma arâ. 21Mi tin abom ki zla tam djak yam mbekmbere máma, mi de woi yam tchilad’a hi Israel-lîd’a ki murud’um mazid’a ki tcho mazid’a pet, mi tinizi yam mbekmberena. Bugola, mi hum abo sama a manam yam sun ndatina, mi i ki sed’em mi gum sä woi abagei hur fulâ. 22Mbekmberena mba mi hle tcho mazid’a kamu, mba mi i ki sed’et abagei hur ful ma sa nga kua d’uo na.
Ata yima sa máma mi dik mbekmberena sä abagei hur fulâ dana, 23Aron mi kal kur zlub’u d’a ngaf tad’a, mi fok baru ma luluî ma mam tchugum atam mi kal kadjï ata yima a tinim iram vam ma kal teglesîna woyo, mi gabam sä kua. 24Mi mbus tam mbei aduk mbina ata yima ding ma a tinim iram vama, mi hulong tchuk baru mama atamu, mi i he va mam ma ngat buzu ma ngala ki ma hablau sumina, mi zlup yam tcho mamba ki d’a hi sumid’a mi. 25Mi ngal mbul la vama mi ngad’am á zlup yam tchod’ina akulo yam yima ngal ahle suma ngat buzuna.
26Sama mi i ki mbekmberena abagei mi Azazel-lâ, mi mbus baru mama woyo, mi mbus tam mbei aduk mbina tua ba, mi kal kur kangâ. 27A mba kamuhlâ ki mbekmberena suma a hazi vama ngat buzuna yam tchod’a suma a mba ki buzuwazi ata yima a tinim iram vam ma kal teglesâ á zlup yam tchod’ina, a ngalazi bagazi ki hliwizi ki sud’ozi woi bugol kangâ. 28Sama mi ngalazina, mi mbus baru mama woyo, mi mbus tam mbei aduk mbina tua ba, mi kal kur kangâ.
29Wana ni gat ta didin nda kagid’a: Kur bur ma dogona hi til ma kid’iziyana, agi d’elegi tagi bei te tena, agi tugugi tagi bei le sunda, agi tagid’a kangei ma nga kaka adigagina. 30Kayam ni bur ma a mba zlup yam tcho magid’a á mbud’ugi woi yed’et kur tcho magi d’a lara ge pet avogon an Ma didinina. 31Bur máma mba mi mbut ni bur ma sabat ma tuk tagina; agi d’elegi tagi bei te tena kuru. Wana ni gat ta didin nda kagid’a.
32Sama mba mi zlup yam tchod’ina, ni ma ngat buzu ma a manam a vom mbulâ kam á vrak balum abum á le sun nda ngat buzunid’a. Mba mi tchuk baru ma luluî ma a tinim iram vama atamu, 33mba mi mbut yima a tinim iram vam ma kal teglesâ ki zlub’u d’a ngaf tad’a ki yima ngal ahle suma ngat buzuna woi yed’et, mba mi zlup yam tchod’a hi suma ngat buzuna ki tchod’a hablau sumid’a pet mi.
34Wana ni gat ta didin nda agi ngomota. Kur biza d’a lara ge pî agi lagi sun nda zlup yam tchod’a hi Israel-lîd’a yagi tu.
Aron mi lahle suma Ma didina mi he vuna mi Moise kazina mi.
Currently Selected:
Sunda hi suma hi Levi-nid’a 16: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
