Sunda hi suma hi Levi-nid’a 15
15
Gat ta yam mandjuf ma mbut tam ndjendjed’ina
1Ma didina mi de mi Moise azi ki Aron ala: 2Agi dagi mi Israel-lâ ala:
Sama lara ma mi hle mbilîna, mi mbut ni ndjendjed’a. 3Ni kayam mbil mama ba, mi mbut ndjendjed’a. Le mbil mama nga mi djang mbina atam mboze nga mi djang nguo pî, mi ni ndjendjed’a. 4Azang ma lara ma mam bur kama mba mi mbut ni ndjendjed’a, vama lara ma mam kak kama mba mi mbut ndjendjed’a mi.
5Sama mi do azang mámina, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
6Sama lara ma mi kak yam vama sama mbil máma mi kak kama, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
7Sama lara ma mi do hliwa sama mbil mámina, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
8Le sama mbil máma mi tuvo ayôna ata sama yed’etna ni, sa máma mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
9Vama lara ma sama mbil máma mi nga kama, va máma mba mi mbut ni ndjendjed’a. 10Sama lara ma mi do vama ad’um kä na, mba mi mbut ndjendjed’a gak fladege. Sama mi hle va mámina, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
11Sama lara ma sama mbil máma mi doma, le mi hok nga abom mbusa woi aduk mbina d’uo ni, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
12Dei ma lubu ma sa máma mi doma, a tom mbeyo. Le ni buguruna ni, a hegem mbusa woi ki mbina.
13Le sama mbil máma mi mbut tei yed’et kur mbiyo ma djang atama ni, mi ndum burâ kid’iziya yam mbut ta mam mba mi mbut yed’eta, mi mbus baru mama woyo, mi mbus tam mbei aduk mbiyo ma laud’a; mba mi mbut yed’et. 14Kur bur ma klavandina mi yo gugu bed’egera mbà, d’oze gugu d’a avo d’a gureid’a mbà, mi mba ki avogon an Ma didina avun zlub’u d’a ngaf tad’a, mi hazi mi ma ngat buzuna. 15Ma ngat buzu máma mi he tu yam vama ngat buzu ma zlup yam tchod’a, mi he tu yam vama ngat buzu ma ngala, mi zlup yam tchod’a hi sa mámid’a avogon an Ma didina yam mbiyo ma mi djang atama.
16Le sana sumurum mba vut grona djang atamu ni, mi mbus tam mbei aduk mbina, wani mba mi kak ki ndjendjed’a gak fladege. 17Baruna d’oze baka suma sumur ndata do atazina, a mbuzuzi woi aduk mbina, wani a mba ar ndjendjed’a gak fladege.
18Le mandjufâ mi bur katchad’a ni, azi djak a mbus tazi woyo, wani a mba kak ki ndjendjed’a gak fladege.
Gat ta yam atcha d’a mbut tat ndjendjed’id’a
19Le atchad’a buzuna fat nga mi djang atad’u ni, ti mba d’i kak ki ndjendjed’a gak burâ kid’iziya.
Sama lara ma mi dotna, mba mi kak kur ndjendjed’a gak fladege. 20Azang ma lara ma ndat ti bur kam ki buzu matnina, mba mi mbut ndjendjed’a; vama lara ma ndat ti kak kama, mba mi mbut ndjendjed’a mi.
21Sama lara ma mi do azang matnina, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege. 22Sama lara ma mi do vama ndat kak kama, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
23Le va nga yam azang matna d’oze vama lara ma ndat ti kak kama, sama mi doma mba mi mbut ndjendjed’a gak fladege.
24Le sana mi bur ki sed’et ba, buzu matna mi do atamu ni, mba mi mbut ndjendjed’a gak burâ kid’iziya; azang ma lara ma ndat bur kama, mba mi mbut ndjendjed’a mi.
25Le atchad’a buzuna mi djang atat burâ ablaud’a kal lei yam yima buzuna mi ka kuana d’oze buzu mat ma djangâ mi kal lei yam bur ma buzuna mi fat teteuna ni, mba d’i kak ki ndjendjed’a ata yima buzuna nga mi djang atatna d’igi ata yima buzuna mi fatna na mi. 26Azang ma lara ma ndat ti bur kam ata yima buzuna nga mi djang atatna, mba mi mbut ndjendjed’a d’igi azang ma buzuna mi fat ndat bur kama na; vama lara ma ndat kak kama, mba mi mbut ndjendjed’a d’igi kur bur ma buzuna mi fat ndat ti mbut ndjendjed’ina na mi.
27Sama lara ma mi do ahle ndazinina, mi mbus baru mama woyo, mi mbus tam mbei aduk mbina, wani mba mi kak ki ndjendjed’a gak fladege.
28Le buzu mat ma djangâ ka wa ni, ti ndum burâ kid’iziya. Bugol bur máma mba d’i mbut yed’et. 29Kur bur ma klavandina, ti yo gugu bed’egera mbà d’oze gugu d’a avo d’a gureid’a mbà, ti izi mi ma ngat buzuna avun zlub’u d’a ngaf tad’a. 30Ma ngat buzu máma mi he tu yam vama ngat buzu ma zlup yam tchod’a, mi he tu yam vama ngat buzu ma ngala, mi zlubut yam tcho mata yam buzu mat ma mbud’ut ndjendjed’ina.
31Agi walagi Israel-lâ woi ki ndjendje mazid’a, tala azi mbut yi man ma kak ma adigazina ndjendjed’a mbut ba, a bo d’a d’i.
32Wana ni gat ta yam sama mi hle mbilâ d’oze yam sama sumura djang atam ti mbud’um ndjendjed’ina, 33yam atcha d’a ti fe buzunid’a, yam atcha d’a buzuna mi djang atata, yam mandjuf ma mi bur katchad’a ti mbud’um ndjendjed’ina mi.
Currently Selected:
Sunda hi suma hi Levi-nid’a 15: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
