Job 39
39
Alona ni Sala ahle suma ari suma yam andagad’ina
1Ma didina mi de mi Job kua ala:
Ni ang ba, i nduwanda á vigï ahlena mazlod’a zu?
Ni ang ba, nga hop grotna
2ata yima azi nga burâ kä kur domi mazinina,
d’oze ata yima azi nga burâ gumun á ve vanina zu?
3Ni nge ba, mi i hal tena mi gagauna
ata yima groma a nga tchi kan an Alonina,
d’oze ata yima a nga tcha tata abo meid’ina ge?
*
4Ang we yima ahu abeid’a ti vut kuana zu?
Ang we yima duka ti vut kuana mi zu?
5Ang ndum til ma azi zi wirâ kuruzina mi ni ga ge?
Ang we bur ma azi vut kuana mi zu?
6A nga grif kä á vut grozina,
ndak mazi d’a vuta ti kal lei mi.
7Grozina a nga gas sei a nga djengâ,
a nga wal lei ki sed’eziya,
a nga hulongî gevezi d’uo d’a.
*
8Ni nge ba, mi ge koro ma abageina akulo ge?
Ni nge ba, mi but ziyo ma a djinim ki kä na woi mi ge?
9An mbut fulâ ni yam ma kaka,
andaga d’a ndjuvuna ni yam ma kaka mi.
10Nga mi san ad’u gandjau d’a avo hur azì ma ngolîd’a,
nga mi hum ngopa hi salamid’a d’uo mi.
11Nga mi tit yam ahinad’a á fe te mama,
nga mi hal hat ma nguloma mi.
*
12Avünda ti min á lang sunda zu?
Nga d’i mba andjege kur amiyôk mangâ zu?
13Ang ndak á gat dju’â kelet á zumung zu?
Ti ndak á tor asuna woi blogong ki hersena aduk zuma zu?
14Ang mba tin hurung kat kayambala ad’eng mata kal ba,
ang mba arat sun mang nga kau d’a ang lata zu?
15Ang ndak á tin hurung kat ala mba d’i mbangî awu mangâ avo,
ti togongzi kä kur ambid’a’â mi zu?
*
16Arigeta nga d’i yo gigingât akulo ki furîd’a,
gigingât ki tumuzut ni vama djivina mi.
17Ata yima arigeta ti gasena kä andagana,
ti aram lesâ mi gum akud’a ni mamu.
18Ti nga d’i djib’er rala asem sa mba mi tom mbeyo,
d’oze ambur ma abageina mba mi mired’em kä d’a d’i.
19Ti nga d’i le grotna tchod’a,
nga d’i wed’ala ni grotna d’a d’i.
Nga d’i djib’er yam ndak mat ta ndat nga d’i fat á gasenid’a d’uo mi.
20An hat nga ned’a d’i,
an hat nga wad’ud’a d’uo mi.
21Wani ata yima ti tchol ringîna,
ti san ad’u akuluma ki salam ma djangâma mi.
*
22Ni ang ba, hakuluma ad’enga zu?
Ni ang ba, tinim ables ma nga mi fel kelem fifil wana zu?
23Ni ang ba, nga pirim d’igi djera na zu?
Breî mamba nga d’i le suma mandarâ.
24Nga mi djiu andagad’a kasem kur hora,
nga mi le furîd’a yam ad’eng mamba,
nga mi guvut avok azigar mam suma djangûna.
25Mi gol mandarâ ni va d’i, nga mi le mandar ri,
nga mi didak kazigam abo mbigeu d’a fiyaka d’uo mi.
26Yeûd’a nga d’i tchi kur aziyat atamu,
djamba kasapa a nga wile wiwilik kam akulo mi.
27Nga mi djulul kayîna, nga mi tau yina kurum tatau,
nga mi ve tam hina kei ata yima adifa ti tchina d’i.
28Ata yima adifa ti tchina, nga mi to breîd’a,
nga mi hlatchinam akulo, mi ka his ayîna ata yima deina
ki dela hi grang ma dur ayînid’a ki tau d’a ayîna mi.
*
29Ni yam ne manga ba, bolona nga mi pir akulo
nga mi i iram abo ma sutna zu?
30Ni yam vun mang ma hed’a ba, aba’â nga mi pir
mi min aziyam akulo yam yima ndingâ zu?
31Mi min yi mam ma kaka naduk ahinad’a,
mi bur sä nakulo yam ahinad’a yat ta ked’iwurenga.
32Ni kua ba, nga mi hal va mam ma ved’a,
iram nga d’i wezi yina sä woi dei.
33Groma a nga tche buzuna,
ata yima harâ nga kuana, a fum mam kua mi.
Ni Job ba, mi hulong humba
34Ma didina mi de mi Job ala:
35Ang ma tchi tuguyod’a hawa ya’â,
ang ndak á dur ki an Ma ad’engên kal petna zu?
Ang ma tchi tuguyod’a ki an Alonina,
ang hulong zla d’a ded’a d’ang?
36Job mi hulong de mi Ma didina ala:
37An ndak nga va d’i, an dok ni dangî zla me ge?
An duk wa abon avunanu.
38An de zlad’a yan tu,
an mba ni hulong ni de kua d’uo d’a;
á yan á mbàd’a,
an mba ni de zla d’a ding kam kua d’uo mi.
Currently Selected:
Job 39: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
