Job 38
38
MA DIDINA NGA MI DE ZLAD’A
(8.1—42.6)
1Ma didina mi hulong zla d’a ded’a mi Job aduk babar ma ngolâ ala:
2Ni nge ba, mi mbud’un nga hur mana nduvunda
ki zla d’a de d’a bei wat ad’ut babad’a ge?
3Ang djin d’i’â furungû, ang kak mandjufâ.
An nga ni djobongû, ar ang van ad’ud’a!
Alona ni Sala ahle suma a nga ki arid’a d’uo na
4Ma didina mi de mi Job kua ala:
Ata yima an gäd’u andagad’ina, ang nga ni lara ge?
Le ang we woi teted’u ni, ang vandji ad’ud’a.
5Ni nge ba, mi ngat bubuwat ke? Ang wum zu?
Ni nge ba, mi veza ziyona woi á ngat ke?
6A pat ad’ut kä ni kur me ge?
Ni nge ba, mi tin ahina d’a djigit akulod’a kä ge?
7Nata yi máma ba, tchitchiu d’a yorogod’a ti hle sawala abo tat tu,
malaika mana pet a hle sawala ki furîd’a ki delezi akulo mi.
*
8Ni nge ba, mi duk vuna yam alum ma ngolâ
ata yima nga mi buzuk kei abu ata yama ge?
9Nata yi máma ba, an zlubum ki d’ugula,
an zlubum nduvunda atam d’igi baruna na mi.
10Nata yi máma ba, an tinim gat manda tila mi tchila kat tuo d’a,
an nigim kawei ma murgulina ki bapma avunam á d’elem mi.
11Nata yi máma ba, an dum ala:
Ang mba i gak tchol ka hî na, ang kal lei kam mbi,
abil mang ma ang sululum kad’engina mi kal lei kam mbuo mi.
*
12Dedei d’a ang nga kur duniyad’id’a, ang he wa vuna mi yorogod’a zu?
Ang tak wa pipira yi mat ma fod’a
13tala ti i veï vun dabid’a handagad’id’a,
ar suma asa’atna a zlaga d’a zu?
14Andagad’a ki zla tat pet ti mbut ni vat zenen
d’igi lubu ma ab’lori ma a tumum tampongîna na,
ahlena pet a mbut djifâ d’igi baru ma a d’udjoma na.
15Suma asa’atna b’o mazid’a nga d’i b’o kazi d’uo d’a,
abozi ma a hlum akulona, mi kus seyo.
*
16Ang kal gak i ata yima alum ma ngolâ mi tcholï kuana zu?
Ang i dabi ata ad’um mba zul la yiyika mi zu?
17Na ni a tagang vun agre’â hi Matnina zu?
Ang we vun agre’â hambasa hi Matnid’a zu?
18Ang we bubud’a handagad’id’a pet mi zu?
Le ang wahle ndazina ped’u ni, ang vandji ad’ud’a.
19B’od’a ti nga kaka nabo ma lara ge?
Yima kaka hi nduvundina mi nga ni lara mi ge?
20Ang ndak á i halazi ata yazi ma kaka,
d’oze ang we lovot ta i ata yazi ma kakid’a mi zu?
21Gagazi, ang we, kayam bur máma a vud’ung wa da’.
Ang le wa burâ ablaud’a tatâ yam andagad’a da mi!
*
22Ang kal gak i ata yima a ngom nesâ kuana zu?
Ang we yima a ngom mogoina kua
23ma an tinim nga vam yam yima ndaka,
yam yima huneîd’a kayî ma durîna zu?
24Ang we lovot ta b’od’a ti b’rawï woi kuad’a zu?
Ang we yima simet ma abo ma yorogona mi b’rawï woi kua yam andagad’ina mi zu?
25Ni nge ba, mi wak lovota akulo malo ma sed’a ge?
Ni nge ba, mi ge lovota mi wiled’a ki breîd’a
26tala mi se yam andaga d’a sa nga kua d’uo d’a
d’oze hur ful ma sa nga kua d’uo na
27tala andaga d’a gangras sa abagei hur fulîd’a,
ti tche mbina ar ahlena a deyâ, asuna mi d’uva d’a ge?
28Alo ma sed’a abum nga zu?
Ni nge ba, mi vut tola hi mbad’ïd’id’a ge?
29Nasu d’a lara ba, glasâ mi ndei kurut ke?
Ni nge ba, mi vut mbad’ï d’a ab’leng nga ngungub’unga ge?
30Mbina nga mi zigat ad’enga d’igi ahinad’a na,
mbiyo ma galileina yam mba akulod’a nga d’i b’al abo ab’lenga na mi.
*
31Ang ndak á djin ziyo ades tchitchiu d’a a yat ala Gro azungeîna,
d’oze ang ndak á but ziyo ades tchitchiu d’a a yat ala Gro yuguneina d’a woi zu?
32Ang ndak á buzugï ades dumusa woi ata yi matna,
d’oze ang ndak á tak lovota mades tchitchiu d’a nglo d’a a yat ala Avevelâ d’a ki grotna zu?
33Ang we gat ta akulod’a zu?
Ni ang ba, tagazi sun nda azi nga lat yam andagad’a ka hid’a zu?
34Ang ndak á de ki deleng akulo mi d’ugula
tala mbina mi seï kä kang ngola d’a zu?
35Ang ndak á sun wiled’a ala ti iya zu?
Ti ndak ti dang ala: Ami kä wana zu?
36Ni nge ba, mi tin ned’a kur sana krovo ge?
Ni nge ba, mi he wad’ud’a kur muzu’â hi sanina ge?
37Ni nge ba, mi ndak á ndum d’ugula ki ne mamba ge?
D’oze mi but ni vun bud’omei suma akulona kä,
mi vo mbiyo ma kuruzina woi
38tala andaga d’a gugud’upa ti d’idje,
ar andaga d’a zigata ti reî ata tad’u d’a ge?
Currently Selected:
Job 38: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
