Job 40
40
Job mi hat ni me yam Alona ge?
1Ma didina mi hulong zla d’a ded’a mi Job aduk babar ma ngolâ ala:
2Ang djin d’i’â furungû, ang kak mandjufâ.
An nga ni djobongû, ar ang van ad’ud’a!
3Gagazi, na ni ang min tchan sariya manda woi zu?
Ang min mbud’un ma ka zlad’a á mbut zla manga d’ingêr zu?
4Ang nga kad’enga d’igi an Alona na zu?
Deleng nga breîd’a ni d’igi manda na mi zu?
5Le ni na ni, ang min tang ki subura ki hud’a,
ang tchuk wiled’a ki ngola atang mi.
6Hur mang ma zal ma kal kang heîna, ang zalam yam suma,
ang gol suma yam mba ad’enga pet, ang hulongôzi yazi kä.
7Ang gol suma yam mba ad’enga pet, ang homozi yazi kä,
ang hahl suma asa’atna woi ata yi máma wat mi.
8Ang ngeyezi kä aduk andaga d’a gugud’upa ki zla tazi pet,
ang djinizi kä kur nduvunda.
9Ata yi máma an mba ni hang ngola,
kayam abong ma ndjufâ mi ndak á sud’ungû.
Alona mi de yam gariyamid’a
10Alona mi de mi Job kua ala:
Ang gola! Gariyam ma an lum d’igi ang na na
nga mi te hatna d’igi amuhlâ na.
11Gola! Ad’engêm nata furumu,
sib’igim nata hliwim krovo mi.
12Andjawam mbad’enga d’igi agu sedrena na,
sidei ma giglangâma mi nga zlapa ata yima tuna á hum ad’enga,
13Asogomî d’igi kawei ma murguli ma hleuna na,
asok ma pepeyema mi ni d’igi kawei ma murguli ma wurana na mi.
14Mam mi vama an Alona ni lum avok kikidji avok ahle suma an lazina,
an salam ma luma ni deyêm nga adi ma siyama fuyogeid’a d’i.
15Ahuniyôna a nga hum te mama
ata yima azurei suma abageina pet a nga dub’ar kuana.
16Mi nga mi bur kä ad’u mumurugumba,
aduk tchereuna, aduk dorbopma mi.
17Mumurugumba nga d’i dugum kä kanguzad’u,
agu ma avun mbinina mi nguyum kä.
18Le aluma mi hop akulo tivilik pî,
mi nga mi le mandar ri.
Le alum ma Jurdê-na nga mi sulul lei huhubup pî,
va nga mi lum mbuo.
19Le mi mal iram mbeyo ni, sama ndak á vuma nga zu?
Na ni sana mi ndak á vum á tchom atchinam zu?
Ambur ma a yum ala Leviyatan-na na
20Alona mi de mi Job kua ala:
Ang ndak á ve ambur ma a yum ala Leviyatan-na ki tunglîd’a zu?
D’oze ang mba djinim sinam ki ziyona mi zu?
21Ang mba nigim ziyona atchinam zu?
Ang mba tchom pepelengêm ki kawei ma vunam gundina zu?
22Mba mi dang zlad’a ki del la djivid’a zu?
Mba mi dang zla d’a djivid’a mi zu?
23Mba mi djin vunam ki sed’eng
á mbut magom mangâ gak didin ndju?
24Ang mba lü ki sed’em
d’igi sana mi lü kaleina na zu?
ang mba djinim kä
kayambala grong suma aropma a lü ki sed’emu d’a zu?
*
25Suma tchiuna a mba mbut abozi ki sed’em zu?
A mba b’rawam hliwim aduk suma mbut abozina zu?
26Ang mba tchogom kasapa yang ablaud’a zu?
Ang mba tchogom yam ki b’ageina zu?
27Ang tin abong atam go,
ang mba djib’era, ang mba hulong dom kua d’uo d’a!
28Gola! Ang tin hurung ala ang kus kamu ni, ni hawa yak.
Nata iram mba gol la ang golota go ba, ang puk kä d’uo zu?
Currently Selected:
Job 40: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
