Esdras 9
9
Juif-fâ a vik andjaf suma dingâ
1Bugol ahle ndazina, suma nglona a mba geven a dan ala: Israel-lâ, suma ngat buzuna ki suma hi Levi-na a wal nga kandjaf suma ding suma kur ambas sa wanda ki ndjendje mazi d’a a nga lata d’i, nala, ndjendjed’a hi suma Kanan-nid’a, hi suma Het-nid’a, hi suma Peris-sîd’a, hi suma Jebus-sîd’a, hi suma Amon-nid’a, hi suma Mowap-mid’a, hi suma Ezipte-nid’a ki d’a hi suma Amor-rîd’a mi. 2Kayam azi vigizi grozina, azi vigizi grozina mi grozina mi, a gizeî andjaf ma a tinim iram vama kandjafâ hi suma kur ambas sa wandina. Ni suma avok suma ki suma nglona ba, a le sun nda tcho ndata avogo.
3Ata yima an hum hina na, an haû baru mana ki baru manda ngola woyo, an ndjut yan ndei ki dudumanu, an i kak kä ki hur ma hata ngola. 4Ata yi máma suma a le mandara zlad’a hAlona hi Israel-lîna yam tcho d’a suma a tcholï ata yima magomba a latina, a tok gevenu. An ar kaka ata yi máma ki hur ma hata ngola gak ler ra a ngat ahlena buzuna fladeged’a.
Esdras nga mi tchen yam suma a le tchod’ina
5Kur ler ra fladege d’a a ngat ahlena buzuna kuad’a, an tcholï ata yi man ma an mbut tan hohoud’a kuana ki baru mana ki baru man nda ngola haûd’a woi atan pet, an grif kä, an yo abon akulo avok Ma didina Alo mana, 6an tchenem ala:
Alo mana, an nga kur tcha d’a tatad’a, an nga ki zulona á hle iran akulo á golongû, kayam tcho mamid’a ti kal ngola, ti kal akulo kamiya; tchila mamid’a ti i gak do hur alona. 7Kur atchogoid’a habuyomi ngolod’a dei gak ini zlad’a vamiya. Ni kayam tcho mami ndata ba, ang hami woi kamulei mamina ki mami suma ngat buzuna abo amuleina hi suma dingîna, á tchamiya, á lami magomba, á hurumumi d’igi a nga lami irami houd’a gak ini na mi. 8Wani ki tchetchemba, ang Ma didina Alo mamina, ang wami wa hohowomiya, ang arami mami suma a arâ tcha, ang gahlabang kami kur ambas mang nga ang tinit irat vata, ang b’o yina woi avoromiya, ang tchugumi tami simetna kur magom mamid’a nde. 9Kayam ami ni magumeina, wani ang Alo mamina arami nga woi kur magomba d’i, ang wami wa hohowomi avok amulei suma Perse-na. Kayam ndata, azi arami lovota á min gong mang nga kud’ora, á minimi yima b’lak keina akulo, á fami yima kaka avo Jerusalem yam ambas sa Juda-d’a mi.
10Ki tchetchemba, Alo mamina, ami dami nana yam ahle suma a mba wana ge? 11Kayam ami noyômi vun mang ma he ma ang hamizï avun azungeî mang suma djok vunina woyo, ang dala: Ambas sa agi i kalagi kurut á mbut magid’id’a nambas sa mbut ndjendjed’a abo tchod’a hi suma a nga kurutnid’a. A oyôt tei kahle mazi suma ndjendje suma azi nga lazina tchetchep mi. 12Kayam ndata, ar agi hagi grogi suma aropma mi grozina d’i, agi vigizi grozi suma aropma mi grogina d’uo mi, agi djib’eregi yam halas mazid’a kahle mazi suma djivina d’i. Hina wani, agi mba fagi ad’enga, agi mba tagi vud’ahle suma djivi suma kal tegles suma kur ambas ndatina, agi mba arat djona mi grogina gak didin mi.
13Ang Alo mamina, ndak ndata ti mba kami hina pet ni yam sun nda tcho d’a ami lata ki tchila mami d’a ngol la kal teglesa. Hina pet pî, ang ngobomi nga ngad’a yam tcho mami ndata d’i, wani ang ar suma a arâ adigami ami suma kä wana tcha. 14Ami dok tchilami yam vun mang ma hed’a á vigimi andjaf ma ndjendje ma wana. Tala ang hurung zal kami dabami woi bei ar sama arâ tu ba d’a zu? 15Ang Ma didina Alona hi Israel-lîna, angî Ma d’ingêrâ, kayam ang ar suma a arâ adigami ini tcha. Gola! Ami nga avorong ka hî ki tcho mamid’a, ami ndak á tchol avorong ki tcho ndata d’i.
Currently Selected:
Esdras 9: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
