Esdras 8
8
Suma a i ki Esdras-sâ
1Wana ni suma nglo suma avok ades suma a tcholï Babilon a mbeï ki sed’en Jerusalem ata yima Artazerses nga mi tamulina andjavaziya:
2Ma avok Fines gromina ni Gersom,
ma avok Itamar gromina ni Daniel,
ma avok David gromina ni Hatus,
ma avok Sekaniya gromina ni sana tu.
3Ma avok Paros gromina ni Zakari; suma a mba ki sed’ema andjofâ ni 150.
4Ma avok Pahat-Mowap gromina ni Eliyohenai ma Zeraya goromina; suma a mba ki sed’ema andjofâ ni 200.
5Ma avok Sekaniya gromina ni Jahaziyel goroma; suma a mba ki sed’ema andjofâ ni 300.
6Ma avok Adin gromina ni Ebet ma Jonatan goromina; suma a mba ki sed’ema andjofâ ni 50.
7Ma avok Elam gromina ni Isai ma Ataliya goromina; suma a mba ki sed’ema andjofâ ni 70.
8Ma avok Sefatiya gromina ni Zebadiya ma Mikayel goromina; suma a mba ki sed’ema andjofâ ni 80.
9Ma avok Jowap gromina ni Obadiya ma Jehiyel goromina; suma a mba ki sed’ema andjofâ ni 218.
10Ma avok Selomit gromina ni Josifiya ma Bani goromina; suma a mba ki sed’ema andjofâ ni 160.
11Ma avok Bebai gromina ni Zakari; suma a mba ki sed’ema andjofâ ni 28.
12Ma avok Asgat gromina ni Johanan ma Hakatan goromina; suma a mba ki sed’ema andjofâ ni 110.
13Suma avok Adonikam gromina ni Elifelet, Jeyel ki Semaya ni suma a mba danana; suma a mba ki sed’ezina andjofâ ni 60.
14Suma avok Bigavai gromina ni Utai ki Zabut; suma a mba ki sed’ezina andjofâ ni 70.
Min tad’a yam i d’a Jerusalem-mba
15An togozi avun alum ma nga mi djang iram abo ma Ahava-na, ami vami anguvora kolâ lami burâ hindi. An hal aduk suma ki suma ngat buzuna, an fe nga andjafâ hi suma hi Levi-na tu d’i. 16Ata yi máma an yi suma nglona Eliyezer, Ariyel, Semaya, Elnatan, Jarip, Elnatan, Natan, Zakari, Mesulam ki suma a hat suma gatina Jojarip ki Elnatan. 17An sunuzi gen ma ngolâ Ido ma nga kaka avo Kasifiya-na, an dazi ahle suma ndak azi dazi mi Ido ki b’oziyom suma Netin suma a nga kaka Kasifiya-na tala a sunumï suma sunda yam gong nga kud’ora hAlo meinid’a d’a. 18D’igi Alo meina iram nga tinda kami na, a mbami ki sama ned’a Serebiya Mali gorom ma ad’u andjafâ hi Levi ma Israel goromina zlapa ki groma ki b’oziyoma, azi ni dogo yam klavandi. 19Hasabiya ki Isai ma Merari goromina ki b’oziyoma ki grozina, azi ni dok mbà, 20zlapa ki suma Netin suma David ki suma nglona a tinizi adjeu á le sunda mi suma hi Levi-nina, azi ni 220, a yazi pet ni ki simiyêzi gagang.
21Ata yima ami nga avun alum ma Ahava mámina, an he vuna ala ami d’elemi tami bei te tena, ami gami yami kä avok Alo meina, ami tchenem mi ndjunumi ki gromina kahle mamina pet kur tit mamid’a mi. 22Ni vama zulona iran á de mamulâ tala mi hami azigarâ ki suma djang akulumeina á ngomomi kur tita abo suma djangûna d’a, kayam ami dami mamulâ ala: Alo mamina iram nga tinda kamiya, yam suma pet suma a nga halama. Wani ad’eng mamba kayî mama a nga yam suma a nga noyôm mbeina. 23Ni kayam ndata ba, ami d’elemi tami bei te tena, ami tchenemi Alo meina; mi humumi mi.
24An man suma aduk suma nglo suma ngat buzuna dogo yam mbà, nala, Serebiya ki Hasabiya ki b’oziyoma dogo mi. 25An nga bege d’a hapa ki lora kahle suma amulâ ki mam suma de d’alâ ki mam suma nglona a hazina, zlapa kahlena pet Israel suma a nga ata yi mámina a hazi yam gong nga kud’ora hAlo meinid’a kä woi iraziya. 26An hazi bege d’a hapa tonna#8.26 tonna: Nala, kilona 1000. dok mbà, ahle suma kawei ma hapma tonna hindi, lora tonna hindi mi, 27kop ma lora dok mbà ndak ir bege d’a lora dubu ki duguyo suma a lazi ki kawei ma hleunina mbà, ni ma guzum ngola d’igi lora na na. 28An dazi ala: Agi ni suma a tinigi iragi vagi mi Ma didinina. Ahle suma wana nahle suma a tinizi irazi vazina: Bege d’a hapa ki lora wana ni he d’a hawa d’a suma a hat kur min mazid’a mi Ma didina Alona habuyogi ngolona. 29Agi kagagi ki ndjola, agi gologi tagi djivi kahle ndazina gak agi i ngagizi kä woi ir suma nglo suma ngat buzuna ki suma hi Levi-na ki suma nglona hi Israel-lîna avo Jerusalem kur gong nga kud’ora hi Ma didinid’a.
30Suma ngat buzuna ki suma hi Levi-na a ve bege d’a hapa ki lora kahle suma a ngazizina á i ki sed’ezi Jerusalem kur gong nga kud’ora hAlo meinid’a.
Esdras mi tchol mi mba avo Jerusalem
31Ami tcholomi avun alum ma Ahava-na kur bur ma dogo yam mbàna hi til ma avo’â á i Jerusalem. Alo meina iram nga tinda kami á ngomomi abo mami suma djangûna, abo suma pet suma a nga burumi kä glovotna mi. 32Ami mba mi Jerusalem, ami tugumi tami burâ hindi. 33Kur bur ma fid’ina, ami ngami bege d’a hapa ki lora kahle suma a hazina kä woi kur gong nga kud’ora hAlo meinid’a, ami hazi abo Meremot ma ngat buzuna Uri goroma. Suma a nga ki sed’ema ni Elazar Fines goroma ki suma hi Levi-na, nala, Jozabat Josue goroma ki Nowadiya Binuwi goroma mi. 34A ndum ahle ndazina pet, a ngaziya, a b’irizi anegezi kä kur mbaktumba mi.
35Suma a tcholï kur magomba a mbana, a he he d’a hawa d’a ngala mAlona hi Israel-lîna amuzlei suma andjofâ dogo yam mbà, gamlâna dok zlengâ yam karagaya, gro tumiyôna dok kid’iziya yam kid’iziya, mbekmberena dogo yam mbà ngad’a yam Israel-lâ pet á zlup yam tchod’a. Azi pet a hazi he d’a hawa d’a ngala mi Ma didina. 36A he vun ma hed’a hamulîna mi mam suma nglona ki suma te yam suma sä abo alum ma Efrat-na abom ma fladegenina. Sum ndazina a ndjun Israel suma a nga min gong nga kud’ora hAlonid’ina mi.
Currently Selected:
Esdras 8: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
