Ezekiyel 14
14
Israel-lâ a tchuk filei mazina woyo
1Bur tu suma nglo suma Israel suma hiuna a mba gevenu, a kak kä avoronu. 2Ma didina mi dan ala: 3Ang gor sana, sum ndazina a tin huruzi ni yam filei mazi ma nga mi zud’uzi á le tchod’ina. An mba ni arazi á djobon zlad’a zu? 4Kayam ndata, ang dazi ala: Salad’a Ma didina mi dala: Ma Israel ma lara ma mi tin hurum yam filei ma nga mi zud’um á le tchod’ina, le mi mba á djop ma djogon vunana ni, ni an Ma didina ba, mba ni hulongôm humba yam filei mam ma ablau máma. 5Hina wani, zlad’a mba d’i ve Israel suma a wal ki sed’en yam filei mazi ma tetengâ kuruzi krovo. 6Kayam ndata, ang i de mi Israel-lâ ala: Salad’a Ma didina mi dala: Agi mbud’ugi hurugiya, agi hagi azigagi mi filei magina, agi aragi sun magi d’a ndjendje d’a lara ge pet tei mi.
7Kayam ma Israel ma lara d’oze angei ma nga kaka aduk Israel-lâ ma mi wal lei ki sed’en ma mi tin hurum yam filei ma nga mi zud’um á le tchod’ina, le mi mba gen ma djogon vunana ala mi djobon kamu ni, ni an Ma didina ba, mba ni hulongôn humba ni an tanda. 8An mba ni mbut iran ni ngop sa máma, an mba ni mbud’umî vama taka ki vama ndala, an mba ni pad’am mbei aduk sum mana. Hina wani, agi mba wagi ala an ni Ma didina.
9Wani le ma djok vuna mi lobom mi dum zla d’a dinga ni, ni an Ma didina ba, mba ni lop ma djok vun máma, an mba ni hlabon kan akulo á ngobomu, an mba ni pad’am mbei aduk man suma Israel-lâ mi. 10Ma djok vun máma ki ma mba mi djobom zlad’ina djak, a mba zi aneka hi tcho mazid’id’a kaziya, 11kayambala Israel-lâ a vit a wal lei dei ki sed’en ba, a mbut tazi ndjendjed’a ki tcho mazid’a d’uo d’a. Hina wani, azi mba mbut ni sum mana, an mba ni arî Alo mazina mi. Ni an Salad’a Ma didina ba, ni de na.
Vama mba mi d’el sariya d’a kad’a hAlonid’ina nga d’i
12Ma didina mi dan ala: 13Ang gor sana, le suma kur ambasa a le tchod’a avoronu, le a he tazi á le sun nda batranga, le an zi abon kazi akulo, le an yo te mazina woyo, le an sun baktarad’a kaziya, le an tchi suma woi ki d’uwarâ adigaziya, 14le suma a nga kur ambas ndata hindi d’igi Noe ki Danel#14.14 Danel: Danel máma nga ni Daniel ma nga kur Mbaktumba hi Daniel-lina d’i. ki Job na pî, a mba sut tei ni yam d’ingêr mazid’a hol. An Salad’a Ma didina ni de na.
15Le an ni tchuk amburei suma ayîna kur ambas ndata, a ngui kurut a dap suma woyo, le ti mbut djona d’oze sa nga mi kal kua d’uo abo amburei suma kurutna, 16le suma hindi ndazina a nga kurud’u ni, an Salad’a Ma didin ma bei matna nga ni de, azi mba sut gro andjof foze gro arop puo mi. Ni azi tazi hol ba, a mba sud’a, ambas ndata mba d’i ar djona.
17D’oze le an mba kayî ma durâ yam ambas ndata, le an ni dala: Ar ayî ma durâ mi b’rau woi hurud’u, le an tchi suma woi ki d’uwarâ, 18le suma hindi ndazina a nga kurud’u ni, an Salad’a Ma didin ma bei matna nga ni de, azi mba sut gro andjof foze gro arop puo mi. Ni azi hol ba, a mba sud’a.
19D’oze le an sunï tugud’ei d’a tcho d’a tchi matna kur ambas ndata, le an ngobozi ki hur man ma zal ma gugulu’â á tchi suma woi ki d’uwarâ, 20le Noe ki Danel ki Job a nga kurut pî, an Salad’a Ma didin ma bei matna nga ni de, azi mba sut gro andjof foze gro arop puo mi, a mba sut tei ni yam d’ingêr mazid’a hol.
21Salad’a Ma didina mi de kua ala: Ladjï an sunï ngop man nda fid’id’a, nala, ayî ma durâ ki baktarad’a kamburei suma ayîna ki tugud’ei d’a tcho d’a tchi matna á ngop Jerusalem, á tchi suma woi ki d’uwarâ ni, 22suma a mba ar kurutna a mba mba ki gro andjofâ ki gro aropma. Gola! A mba buzugï woi a mbeï gevegi kur magomba. Agi mba gologi tit mazid’a ki sun mazi d’a led’a, hurugi mba mi b’leng yam ndak ka an mbat yam Jerusalem-mba, yam ahlena pet suma an mbattchi katna mi. 23Fata agi golozi tit mazid’a ki sun mazi led’id’a, hurugi mba mi b’lengâ, agi mba wagi ala ahle suma an mbazi yam Jerusalem petna ni hawa d’i. An Salad’a Ma didina ni de na.
Currently Selected:
Ezekiyel 14: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
