Ezekiyel 13
13
Alona mi ngop suma djok vun suma ka zlad’a
1Ma didina mi dan ala: 2Ang gor sana, ang djok vuna mi suma djok vun suma Israel suma a nga djok vuna yam djib’er ra kuruzid’ina, ang dazi ala: Agi humugi zlad’a hi Ma didinid’a. 3Salad’a Ma didina mi dala: Ni zla d’a hohoud’a yam suma djok vun suma lili suma a nga tit bugol djib’er mazid’a bei we va ba na. 4Agi Israel-lâ, magi suma djok vuna a ni d’igi arau ma nga mi tchi hur djonina na. 5Agi igi nga á min ir gulumun ma hulut teina d’i, agi gagi nga gulumuna yam azì ma Israel-lâ tala mi tchol ad’enga ata yima durâ kur bur ma ayîna hi an Ma didinina d’a d’uo mi. 6Ahle suma a nde tazi irazina nahle suma hawa ya’â. Zla mazi d’a azi nga djogota ni zla d’a kad’a. A nga dala: Wana ni zlad’a hi Ma didinid’a, wani an Ma didina ni sunuzi nga d’i. A nga tin huruzi yam zla mazid’a ala mba d’i ndak vun sun mata! 7Ahle suma a nde tazi iragina nahle suma hawa ya’â. Zla d’a agi nga djogogi vuna kata ni zla d’a kad’a mi d’uo zu? Agi nga dagi ala: Wana ni zla d’a ded’a hi Ma didinid’a, wani an ni de nga d’uo ko! 8Ni kayam ndata ba, an Salad’a Ma didina ni dala: Kayamba zla magid’a ni zla d’a hawa yaka, ahle suma a nde tazi iragina ni zla d’a kad’a mi d’a, an nga ni ngobogiya. Ni an Salad’a Ma didina ba, ni de na.
9An mba mi hlabon kan akulo á ngop suma djok vun suma ahle suma hawa ya’â nga nde tazi irazi suma a nga djok vun ma ka zlad’ina. Azi mba kal kur toka hi sum manid’a d’i, a mba b’irizi simiyêzi kä kur mbaktumba hi Israel-lîd’a d’i, a mba hulong yam ambas mazi d’a Israel-la d’uo mi. Hina wani, agi mba wagi ala an ni Salad’a Ma didina.
10Suma djok vun ndazina a nga vit sum mana woyo, kayam a dala: Halasa nga, wani halasa nga d’uo ko! Sum mana a min gulumuna, a nga gulud’um ki lasod’a. 11Ang de mi suma a nga gulud’um ki lasod’ina ala: Alo ma se ma tchona mba mi mba, mogoi ma nglona mba mi yak kä, babar ma ngolâ mba mi mba. Gulumun máma mba mi to kä woyo. 12Ata yima gulumuna mi dris kä na, a mba dagi ala: Laso d’a agi gulud’ugizi ki d’a, ti nga ni lara ge d’uo zu? 13Ni kayam ndata ba, an Salad’a Ma didina ni dala: Kur hur man ma zala, an mba ni mba ki babar ma ngolâ. Kur ayî mana, an mba ni mba kalo ma se ma tchona. Mogoi ma nglona mba mi yak kä kad’enga, mba mi b’lak ahlena woi pet. 14An mba ni to gulumun ma agi gulud’ugizi ki lasod’ina kä woyo, an mba ni drizim kä woi andaga. Ad’um mba ged’a mba d’i ar rei pid’agi, mba mi dris kä woyo. Agi mba dabagi woi kurumu, agi mba wagi ala an ni Ma didina. 15An mba ni ndak vun hur man ma zala á ngop gulumuna, á ngop suma a gulud’um ki lasod’ina mi. An mba ni dagi ala: Gulumuna nga d’uo d’a! Suma a gulud’uma pî, sa nga d’uo mi! 16An mba ni dap suma djok vun suma Israel suma a nga djok vuna yam Jerusalem suma a nga dala ahlena a nde tazi irazi woi ala halasa nga ba, wani halasa nga d’uo ko na woyo. Salad’a Ma didina mi de na.
Alona mi ngop arop suma djok vun suma ka zlad’a
17Ma didina mi dan kua ala: Ang gor sana, ang mbut irang ata arop suma Israel suma a nga djok vuna yam djib’er ra kuruzid’ina, ang djogozi vuna. 18Ang dazi ala: Ni zla d’a hohoud’a yam arop suma a nga gan ganda del abo suma suma a nga tchil lafaina yam suma ata wul mazid’a teteng á vik karid’a hi sumid’a. Agi nga lagi hina á vigigi karid’a hi sum mana á ngomogi kari magid’a tata zu? 19Agi nga mbud’un zulona aduk sum mana yam awu ors ma a nga hagizi abogi ngiyeûna kavungô ma mbruka. Ata yima agi nga kagi zlad’a mi man suma a nga hum zla d’a kad’ina, agi nga tchagi suma a ndak nga á tchid’a d’uo na, agi nga aragi suma a ndak á tchid’ina karid’a. 20Ni kayam ndata ba, an Salad’a Ma didina ni dala: Gola! An nga ni yo gan magi d’a agi nga vigigi karid’a hi suma d’igi suma a vik aluweina na d’a woyo, an nga ni tchalat tei del abogiya, an nga ni tchuk arid’a hi suma agi vigizi d’igi suma a vik aluweina na na akulo. 21An nga ni haû lafai magina woyo, an nga ni tchuk sum mana akulo woi abogiya. A mba mbut ni d’igi vama agi vum ki daunina na hur abogi d’uo d’a. Hina wani, agi mba wagi ala an ni Ma didina. 22Agi b’lagagi hur suma d’ingêr suma an tan b’lagazi nga huruzi d’uo na ki zla magi d’a kad’a, agi nga hagi ad’enga mi suma asa’atna á d’elezi tala a hulongî woi ata tit mazi d’a tchod’a á kak karid’a d’a. 23Ni kayam ndata ba, ahle suma hawa ya’â a mba nde tazi iragi d’uo d’a, agi mba djogogi vun ma ka zlad’a bugol luo mi. An mba ni sut sum mana woi abogiya. Agi mba wagi ala an ni Ma didina.
Currently Selected:
Ezekiyel 13: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
