Ma tchi wala Wana ni modo zla d’a kuruta
Wana ni modo zla d’a kuruta
Tinï ad’ud’a kur mbaktum mam mba avoka dei, ma b’ir mbaktum ndatina, mi tak tam mbei ala mam mi sama ned’a. Wani ne mamba nga ni d’igi ned’a hi suma kur Mbaktum mba Zla d’a D’ogolid’a na d’i. Ahle suma ablau suma mam lazi ki kak mam mba yam andagad’a ka hina a tagam ala kak ka halasa ni vama amangeîna, so ta d’a sana mi so tam á fata ni vama a nga fum teteu d’uo na mi.
Kayam ndata, mi nga mi djop tam ala na ni kak ka sana mi kak ki iram yam andagad’id’a, zlat nga zu? D’oze ti djivid’a á sana mi kak ki iram zu? Mi nga mi tes sama ndumba á djop tam d’igi mam nga mi djop tam na mi.
D’igi a de kur Mbaktumba hi Job-pa na, zla d’a a hulongôt humbid’a tafefeta. Ni zla d’a suma a nga djop tazi kat heîd’a, wani djib’er mazid’a ni teteng. Job nga mi tchi tuguyod’a yam ndaka hi sana d’a nga mi fat hawa yaka. Wani ma ne ma kur mbaktum ndatina nga mi de zlad’a woi yam djib’er mam mba b’laka, yam kak ka halasa mi sumid’a mi.
Väd’u d’a sama ned’a nga mi vat teid’a ni zla d’a fek ad’ud’a yam ahle suma a nga le ka hî yam andagad’ina. Mi fek ad’ud’a yam furî d’a tetenga ki so ta d’a tetenga hi sumid’a, nala, yam azonga, yam ndjondjoîd’a, yam subura, yam sunda, yam ned’a ki sariya d’a kad’a mi. Wani nga mi de woi kam kua kam kua ala ni zla d’a hawa yaka. Ndaka ki matna ki sariya d’a gunda ki tcho d’a tetenga ki we d’a suma a we nga nga hurâ hAlonina d’uo d’a, ahle ndazina pet a d’el suma á kak ki halasa burâ ki burâ. Väd’u d’a anek ndata nga d’i mba ki djib’er ra tetenga yam andjaf tita hi sana d’a ndak yam kak mamba ki iram yam andagad’a ka hid’a.
Zla d’a teteng nga kur Mbaktumba hAlonid’a nga d’i hulong hum mba dinga yam djop pa yam zla kaka hi sana d’a ki iram yam andagad’a ka hid’a. Wani Mbaktumba hi Ma Tchi Wala ndata nga d’i hulongeî humba yam ta mei d’a tchuk lusa ki gigrit meid’a mi. Ma tchi wal máma nga mi gei humei ala he gagazi d’a irat ta yam Alona d’a bei sana mi wat ad’ut tei tetet yam kaka hi sanid’a nga d’i.
Currently Selected:
Ma tchi wala Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.