Gat ta a hat á mbàd’id’a 3
3
A hle leud’a hi Ok-ka
1Moise mi dazi kua ala: Ei hulongeî kazigei hlei lovot ta Basan-nda. Ok amul ma Basan-na mi buzugï atei ki azigar mama pet á duri avo Edrei. 2Ma didina mi dan ala: Ang ringîm mandaram mbi, kayam an hangzi ki azigar mama kambas mamba pet abongû. Ang le ki sed’em d’igi ang le ki Sihon amul ma Amor ma nga kaka Hesbon-na na.
3Ata yi máma Ma didina Alo meina mi hei Ok amul ma Basan-na ki azigar mama pet aboi kua d’ei; ei kuzi kam bei sa mam sut tu ba. 4Kur bur máma ei yoi azì mam ma nglona pet. Azì ma ngol tu pî ar nga aboi bei hled’a d’i zlapa kazì mam ma nglo ma dok karagaya ma kur Argop pa Basan nda mam nga mi te kata. 5Azì ma nglo máma pet nazì ma ad’engâ, gulumun mama mi fuyogeid’a, vun agrek mama mi ni ki bapma mi. Azì mam ma gurei ma bei gulumunina nablaud’a mi.
6Ei b’lagei azì ma nglona woi pet, ei tchi suma kuruma woi pet, nala, andjofâ, aropma ki kemba d’igi ei lei ki Sihon amul ma Hesbon-na na. 7Wani ei hurumi ni d’uwarâ kahle suma kur azì ma nglonina hol.
B’raud’a hambas sa Galät-ta
8Moise mi dazi kua ala: Ni hina ba, kur atchogoi ndata ei yoi ambasa abo amulei suma Amor suma mbà suma sä abo alum ma Jurdê-na woi hina, tinï ad’ud’a avun alum ma Arnon-na dei gak mba yam ahina d’a Hermon-nda. 9(Suma Sidon-na a yi ahina d’a Hermon-nda ala Siriyon, wani suma Amor-râ a yat ala Senir.)
10Ei yoi azì ma nglo ma hur fulîna pet, Galät pet ki Basan pet gak mba Salka ki Edrei kur azì ma nglo ma Basan ma Ok nga mi te kama. 11(Ok amul ma Basan-na ni ma mi ar danan ad’u andjafâ hi suma Refa-nina. Azang mam ma kaweina a fumî kur Raba azì ma ngolâ hi suma Amon-nina. Fiyagam kal metred’a fid’i, bubuwam metred’a mbà mi.)
12Ata yi máma ei hlei ambasa. An he suma hi Ruben-na ki suma hi Gad-na ambasa tinï ad’ud’a Arower avun alum ma Arnon-na, kabo ahina d’a Galät-ta kazì mat ma nglona. 13An he nus andjafâ hi Manase-na abo ambas sa Galät ta ara ki leud’a hi Ok ma Basan-na ki yima Argop-ma ki Basan pet. Ni yima a yum ala Ambas sa Refa-d’a na. 14(Jayir Manase goroma, mi hle yima Argop-ma pet gak mba avun hagad’a hi suma Gesur-rîd’a ki hagad’a hi suma Mäka-nid’a mi, mi yi simiyêm kazì ma Basan-na pet. Gak ini a nga yum ala Azì ma Jayir-râ.)
15An he Galät mi suma hi Makir ma Manase goromina. 16Suma hi Ruben-na ki suma hi Gad-na, an hazi abo azì ma Galät-na tu gak mba avun alum ma Arnon ma hurumî hagad’ina gak mba avun alum ma Jabok ma hagad’a ki suma Amon-nina, 17zlapa ki Araba d’a hagad’a kalum ma Jurdê-nid’a, tinï ad’ud’a avun apo d’a Kinerot-ta dei gak mba avun alum ma Araba-na gak mba avun apo d’a Matna ad’u ahina d’a Pisga-d’a abo ma yorogona.
18Ata yi máma an hagi vun ma he ma wana ala: Ma didina Alo magina mi hagi ambas sa wanda abogi kayambala agi hlad’u d’a. Kayam ndata, agi suma gangrang suma durâ pet, agi yogi ahle suma sïna, agi kalagi avok b’oziyogi Israel-lâ. 19Wani amiyôgina, grogina ki d’uwar magi ma an wala agi nga ki sed’em ngola na, a mba ar kur azì ma nglo ma an hagizina ni azi hol, 20gak Ma didina mi hazi yima tuk tad’a d’igi mi hagizi mi agi na, gak a hlambas sa Ma didina Alo mazina mi hazizi sä abo alum ma Jurdê-na woi hid’a mi. Ni hina tua ba, agi nge nge pî mi hulong kur ambas sa an hagizid’a tua.
21Kur yi máma an he vuna mi Josue ala: Ang tang wahlena pet suma Ma didina mi lazi kamulei suma mbà ndazinina ki irangû. Ni hina ba, mba mi le ki leud’a pet ta agi mba igi latata. 22Agi lazi mandarazi d’i, kayam ni Ma didina Alo magina ba, mba mi dur kagiya.
Moise mi kal nga Kanan ndi
23Moise mi dazi kua ala: Ata yi máma an tchen Ma didina ni dum ala: 24Salad’a Ma didina, ang nde tagan an azong mangâ ngol manga ki sib’ik manga. Nalo ma lara ma kur akulod’a d’oze ma yam andagad’a ma ndak á le sunda kahle suma ndandalâ d’igi suma ang nga lazi wa na na ge! 25An nga ni tchenengû, ang aran an i wambas sa djivi d’a sä abo alum ma Jurdê-na woi hid’a kahuniyô suma djivi ndazina ki Liban mi.
26Wani Ma didina hurum zal kan ni kagiya, mi humun nga d’i, mi dan ala: Ndagan da’! Ang dan zla d’a hina d’a d’uo d’a! 27Ang djak akulo yam ahina d’a Pisga-d’a yat ta ked’iwurenga, ang gol irang abo ma fladegena, abo ma norâ, abo ma sutna kabo ma yorogona, ang golî yina ki irang go, kayam ang mba djak sä abo alum ma Jurdê-na woi hî d’i. 28Ang he vuna mi Josue, ang hum ad’enga, ang siramu, kayam ni mam ba, mba mi tit avok sum ndazina, mba mi hazi ambas sa ang wat wanda djona. 29Ata yi máma ei arei kaka kur hor ra ngagad’a yam Bet-Peyor d’ara.
Currently Selected:
Gat ta a hat á mbàd’id’a 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.