Gat ta a hat á mbàd’id’a 4
4
Agi tid’igi yam gata hAlonid’a
1Moise mi dazi kua ala: Agi Israel-lâ, agi humugiya! Agi tid’igi yam gata ki vun ma he ma an nga ni hagizina, kayam agi kagagi karid’a, agi kalagi kur ambas sa Ma didina Alona habuyogi ngolona mi hagizid’a mi. 2Agi tinigi zla d’a ding yam vun ma he ma an hagizina d’i, agi pad’agi va woi kua d’uo mi, wani agi tid’igi yam vun ma hed’a hi Ma didina Alo maginina d’igi an hagizi na.
3Agi tagi wagi ahle suma Ma didina mi lazi yam zlad’a halo ma a yum ala Bäl-Peyor-rîd’a. Ma didina Alo magina mi dap suma adigagi suma a kud’or alo ma a yum ala Bäl-Peyor-râ na woyo. 4Wani agi suma zlabagi ki Ma didina Alo maginina pet, agi nga ki iragi ini.
5Agi wagiya, an had’agi gata ki vun ma hed’a d’igi Ma didina Alo mana mi han vuna na kayambala fata agi kalagi kur ambas sa agi mba hlat á kagagi kura, agi tid’igi kaziya d’a. 6Agi ngomoziya, agi tid’igi kazi mi. Hina wani, agi mba mbud’ugi ni suma ned’a ki suma wad’ud’a. Suma ding suma a mba we gat ndata ki vun ma he mama mi na, a mba de kagi ala: Andjaf ma ngol ma wana nandjaf ma ne ma wad’ud’a. 7Nandjaf ma ngol ma lara ma nga kalona go ki sed’em d’igi Ma didina mi nga ki sed’ei ata yima lara ma ei nga yuma na ge? 8Nandjaf ma ngol ma lara ma nga ki gata ki vun ma he ma d’ingêrâ d’igi gata pet ta an nga ni tagagizi ini wanda na ge?
Alona mi nde tam mbei yam ahina d’a Horep-pa
9Moise mi dazi kua ala: Wani agi gologi tagi djivi burâ ki burâ kur kak magi d’a yam andagad’id’a tala ahle suma agi wagizi ki iragi pet wana, agi maragizi d’i, ar a buzuk kei kurugi d’uo mi d’a. Agi had’agizi mi grogina ki grogi ngolona mi. 10Agi djib’eregi yam bur ma agi tchologi avok Ma didina Alo magina yam ahina d’a Horep-pina. Ata yi máma Ma didina mi dan ala: Ang togonï suma; an min ala a hum zla manda tala azi hat á lan mandaran burâ ki burâ yam andagad’a ka hî, a had’at mi grozina mi d’a. 11Agi hud’ugi tchologi kä ad’u ahinad’a. Ahinad’a ti vakud’a, sin akud’a nga d’i ngal gak i akulo hur alona. Nduvunda nga, d’ugula nga, andosâ mi tin d’ugula ndus mi. 12Ma didina mi dagi zlad’a aduk akud’a; agi humum zla mam mba ded’a, wani agi wum nga iram mbi; agi humumî delem mba ded’a hol. 13Mi tagagi vun mam ma djinda woyo, mi hagi vuna ala agi tid’igi kamu, agi gagi yagi kä ad’u vun mam ma he ma dogo ma mi b’irim kä kur ahina d’a bebed’e d’a tchet ta mbàd’ina. 14Ata yi máma Ma didina mi han vuna á had’agi gata ki vun ma hed’a, kayam agi tid’igi kazi kur ambas sa agi nga kalagi kur á hlat djona wanda.
Ge hum mba yam filei ma tuwalid’a
15Moise mi dazi kua ala: D’igi agi wagi nga ir sa kur bur ma Ma didina mi dagi zlad’a aduk akud’a yam ahina d’a Horep-pa d’uo na na, agi gologi tagi djivi 16tala agi mbud’ugi tagi ndjendjed’a á tched’egi fileina d’oze angus vama hle tam d’igi alona na na, d’oze d’igi mandjufâ d’oze atchad’a 17d’oze amburâ d’oze azarâ d’oze d’uwarâ d’oze aleina 18d’oze ahle suma a dram kä na d’oze kulufâ na d’a d’i. 19Ar agi hlagi iragi akulo hur alona á gol afata tilâ ki tchitchiud’a kahle suma akulona pet ba, a lobogi vunagi á kud’urozi á lazi sunda d’i, kayam nahle suma Ma didina Alo magina mi hazi mandjaf ma ding ma nga kaka yam andagad’a petna. 20Wani agiya, Ma didina mi yogi mi buzugugï woi kur aku d’a für ra kaweina hi Ezipte-nid’a kayambala agi kagagi ni sum mama d’igi agi nga ini na d’a.
21Ma didina hurum mi zal kan ni kagi agiya, mi gun tam ala an mba ni djak alum ma Jurdê-na á kal kur ambas sa djivi d’a mam nga mi hagizi djona wanda d’i. 22Kayam ndata, an nga ni mit ni kur ambas sa kä wanda, an nga ni djak alum ma Jurdê-na d’i. Wani agi mba i djagamu, agi mba hlagi ambas sa djivi ndata djona. 23Agi gologi tagi djiviya, agi maragi yam vun ma djin ma Ma didina Alo magina mi djinim ki sed’egina d’i. Ar agi tched’egi va d’oze angus vama lara ma Ma didina Alo magina mi d’elegi kama d’i. 24Kayam Ma didina Alo magina naku d’a ti ngal yinid’a, nAlo ma yungôrâ mi.
25Fata agi kagagiya wa ngola yam ambasa tatâ, agi vud’ugi wa grona, grogina a vut wa grona mi d’a, le agi mbud’ugi tagi ndjendjed’a, agi tched’egi va d’oze agi lagi angus vama lara d’oze agi lagi vama tcho avok Ma didina á zalam hurumu ni, 26an nga ni dagi zlad’a, akulod’a kandagad’a ni glangâs mana ini kagi ala agi mba bogi woi atogo zak kur ambas sa agi nga i kalagi kur sä abo alum ma Jurdê-na woi hid’a, agi mba tagi tatâ d’i, kayam agi mba dabagi woi pet. 27Ma didina mba mi b’rawagi woi aduk andjaf suma, agi mba mbud’ugi nandjaf ma akid’eina aduk suma Ma didina nga mi igi kua wana.
28Ata yi máma agi mba kud’urogi alo ma suma a lum kabozina, nala, aguna d’oze ahinad’a, nalo ma ndak á we d’oze á hum mboze á te va d’oze á his va d’uo na mi. 29Nata yi máma ba, agi mba halagi Alo magina. Le agi halagizi ki hurugi tu ki djib’er magid’a ped’u ni, agi mba fumu. 30Ahle ndazina a mba mba kagiya. Kur yor ta magid’a agi mba hulongôgi gen Ma didina Alo magina, agi mba humum vunam mi. 31Kayam Ma didina Alo magina nAlo ma we hohowa sumina; mba mi aragi woi d’i, mba mi dabagi woi d’i, mba mi mar yam vun ma djin ma mi gun tam kam mabuyogi ngolona d’uo mi.
Alona mi man Israel-lâ kal andjaf ma dingâ
32Moise mi dazi kua ala: Agi djobogi tagi yam ahle suma a le kur atchogoi d’a kala ata yima Alona mi le sana yam andagad’a dei gak inina. Agi djib’eregi yam ahlena pet suma a le yam andagad’ina, tinï ad’ud’a avun dabid’a handagad’id’a dei gak nde sä woi abo hî. Agi wagi vama ndandal hina mi le woi yam tu, d’oze agi humugi zla vama yoyou ma hina na woi yagi tu zu? 33Andjaf ma ding ma yam tu ma hum dela hAlonid’a aduk akud’a d’igi agi humut na ma kak karid’ina nga zu? 34Alo ma ding ma mba, mi prut andjaf ma ding ma nga aduk andjaf ma dingâ á mbud’um sum mama kahle suma kuka, kahle suma simata, kahle suma yoyouna, kayî ma durâ, kabom ma ad’engâ ki bigam mba zid’a kam akulo zid’a, kahle suma ndandal suma mbut suma mandarâ hina pet d’igi Ma didina Alo magina mi le ki sed’egi avo Ezipte hina na nga zu? 35Agi wagi ahle ndazina woi tetet, nala, agi wagi woi tetet ala Ma didina tu nAlona. Ma ding ma d’igi mam na na nga d’i. 36Ei akulo mi tagagï delem mbei á had’agiya. Yam andagad’a ka hî mi tagagï aku mamba ngola. Agi humum zla mam mba ded’a aduk akud’a mi. 37Mi le yam abuyogi ngolo, mi managi agi andjavazi ma bugolâ. Kayam ndata, mi buzugugï wa woi avo Ezipte ki sib’ik mamba. 38Mi dik andjaf ma kalagi kablaud’a kad’engina woi avorogi á kalagi kur ambas mazid’a á tat djona d’igi agi wagi ini na. 39Agi wagi ini woi tetet, agi vagi zla ndata kurugi ala Ma didina tu nAlona; sä akulo hur alona d’oze yam andagad’a ka hî, alo ma ding nga d’i. 40Agi ngomogi gat mamba ki vun mam ma he ma an nga ni hagizi inina kayambala agi ki grogi suma blogogina, agi kagagi ki furîd’a tala agi tagi kagagi tatâ yam andaga d’a Ma didina Alo magina nga mi hagizi ki iragi fafat wanda d’a.
Azì ma ngei ta ma hindi ma abo alum ma Jurdê-na woi hî
41Ata yi máma Moise mi man azì ma nglona hindi sä abo alum ma Jurdê-na woi hî abo ma yorogona 42tala mi ka’î azì ma ngei tad’a yam sama mba mi tchi ndrama bei min mamba bei mi vum kurum avok ba kayambala mi ring ngei kur azì ma ding tu á sut tamu d’a. 43Azì máma ni Beser hur ful ma papana na kur yina hi suma hi Ruben-nina, azì ma Ramot ma Galät ma kur yina hi suma hi Gad-nina, kazì ma Golan ma kur Basan ma kur yina hi suma hi Manase-nina mi.
ZLA D’A DE D’A MBÀD’A HI MOISE-SA
(4.44—11.32)
44Wana ni gat ta Moise mi djogot tei mi Israel-lîd’a. 45Wana ni gata ki vun ma hed’a suma Moise mi djogozi woi mi Israel-lâ bugol buzuk ka a buzugï woi kur Ezipte-d’a. 46Nabo alum ma Jurdê-na woi hî kur hor ra ngagad’a yam Bet-Peyor d’ar ra yam ambasa hi Sihon amul ma Amor ma nga kaka Hesbon ma Moise azi ki Israel-lâ a durum bugol la azi buzugï woi Ezipte-d’a. 47A hlambas mamba ki d’a hi Ok amul ma Basan-nid’a. Amulei suma Amor suma mbà ndazina a ni kaka sä abo alum ma Jurdê-na woi hî abo ma yorogona. 48A hlambas mazid’a, tinï ad’ud’a Arower avun alum ma Arnon-na dei gak mba yam ahina d’a Siyon nda a yat ala Hermon-nda, 49a hleï Araba pet avun alum ma Jurdê-na woi abo ma yorogona gak mba avun apo d’a Matna ad’u ahina d’a Pisga-d’a kä.
Currently Selected:
Gat ta a hat á mbàd’id’a 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.