Gat ta a hat á mbàd’id’a 2
2
1Bugola, ei hulongeî kazigei i hur fulâ ki lovot ta avun alum ma ngol ma Tchereunid’a d’igi Ma didina mi dan na. Ei nguyui ahina d’a Seir-ra ngungui, ei lei burâ ngola.
Israel-lâ a kal kur Edom, Mowap ki Amon
2Moise mi de mi Israel-lâ kua ala: Ma didina mi dan ala: 3Agi nguyugi yam ahina ndata ndaga; agi hulongôgi iragi abo ma norâ. 4Ang he vuna mablau suma, ang dazi ala: Agi nga halagi ir hagad’a hi b’oziyogina Esau grom suma a nga kaka Seir-râ. A mba lagi mandaragiya, wani agi gologi tagi djivi ped’et. 5Agi ndazi ayîna d’i, kayam an mba ni hagi ambas ndata d’oze yima tin asema nde pî kua d’i, kayam an hahina d’a Seir ndata djona mi Esau da’. 6Te ma agi mba tuma, agi mba guzum abozi ni ki beged’a; mbiyo ma agi mba tchuma pî, agi mba guzum abozi ni ki beged’a mi.
7Kayam Ma didina Alo magina mi b’e vunam kagi yam sun nda pet ta agi nga lata, mi we tit magi d’a abagei hur ful ma ngol ma wanid’a mi. Gola! Bizad’a wan dok fid’i Alo magina mi nga ki sed’egiya. Va tu pî kid’agagi nga d’uo mi. 8Ei hlei woi dei ki b’oziyoina Esau grom suma a nga kaka Seir-râ woi dei ki lovot ta Araba-d’a ki d’a Elat-ta ki d’a Esiyon-Geber-ra mi. Bugola, ei hulongeî kazigei hlei lovot ta abo ma hur ful la Mowap-pid’a.
9Ma didina mi dan ala: Ang nde suma Mowap-ma ayîna d’i, ang duruzi d’uo mi, kayam an mba ni hagi va yam ambas mazid’a d’i. Ni Lot groma ba, an hazi ambas sa Ar-ra djona.
10(Suma Em-ma a kak kua avogo. Ni suma ad’eng suma ablauna, ni suma fuyogeid’a d’igi suma Ana’â na na. 11A golozi ni d’igi suma Refa-na d’oze suma Ana’â na, wani suma Mowap-ma a yazi ala suma Em-ma. 12Ambas sa Seir-ra, suma a kak kat avo’â ni suma Hor-râ. Wani Esau groma a mba, a digizi woi kua, a kak blangâzi d’igi Israel-lâ a hle ambas sa Ma didina mi hazizi djonid’a na.)
13Ma didina mi dan kua ala: Ki tchetchemba, agi tchologi akulo, agi djagagi toliyon nda Zeret-ta. Ni hina ba, ei djagei toliyon nda Zeret-ta mi. 14Kid’a ei tcholei Kades-Barneya-d’a, ei lei bizad’a ni dok hindi yam klavandi gak ei djagei toliyon nda Zeret-ta. Suma dur ayî suma kur atchogoi ndatina a dap bod’a woi kur kangâ d’igi Ma didina mi gunuzi tam na. 15Ma didina tamba mi mbut iram irazi á dabazi woi kur kangâ.
16Kid’a suma dur ayîna a bo woi aduk sum ndazina peta, 17Ma didina mi dan ala: 18Ini agi mba ndagi sä woi ir haga d’a Mowap-pa avo Ar. 19Agi mba mbagi yam ambasa hi suma Amon-na, wani agi ndazi ayîna d’i, agi duruzi d’uo mi, kayam an mba ni hagi djo nde pî yam ambasa hi suma Amon-nid’a d’i. An ni he yi máma ni mi Lot groma djona.
20(A gol ambas ndata ni d’igi ambas sa Refa-d’a na. Suma Refa-na a kak kat avogo, wani suma Amon-na a yazi ala suma Zamzum-ma. 21Ni suma ad’eng suma ablauna, ni suma fuyogeid’a d’igi suma Ana’â na na. Wani Ma didina mi dabazi woi avok suma Amon-na, a digizi woyo, a kak blangâziya. 22Ma didina mi le ki Esau grom suma a nga kaka Seir-râ ni hina dedege ata yima mi dap suma Hor-râ woi avorozina. A digizi woyo, a kak blangâzi gak ini. 23Suma Af suma a nga kaka kur azì ma gureina gak Gaza-na, suma tcholï Kaftor-râ a tchaziya, a kak blangâziya.)
24Bugola, Ma didina mi he vuna ala: Agi tchologiya, agi igiya, agi djagagi alum ma Arnon-na. Gola! An hagi Sihon amul ma Hesbon ma Amor-râ kambas mamba abogiya; agi durumu, agi hlagiziya. 25Ini an nga ni mbut suma yam andagad’ina mandarâ avorogiya; a mba zlak avorogi mi. Ata yima a mba humugi simiyêgi ma nde yinina, a mba zlak avorogiya, a mba tcha tata mi.
A hle leud’a hi Sihon-nda
26Moise mi dazi kua ala: Hur ful ma Kedemot-na, an sun suma gen Sihon amul ma Hesbon-na ki zla d’a halasa. An dum ala: 27Ang arami ami kalami yam ambas manga. Ami tid’imi ni kur lovot ta ngola teteu bei d’ezemi abo ma ndjuf foze abo ma gula ba. 28Avu ma ami mba tuma, ami mba guzum abogi ni ki beged’a; mbiyo ma ami mba tchuma, ami mba guzum abogi ni ki beged’a mi. Ami kalami ni kasemi akulo go. 29Wana nahle suma Esau grom suma a nga kaka Seir-râ ki suma Mowap suma a nga kaka Ar-râ a lazi ki sed’emina. Ang lami hina mi, gak ami djagami alum ma Jurdê-na á kalami yam ambas sa Ma didina Alo mamina mi hamizid’a.
30Wani Sihon amul ma Hesbon-na, mi arei nga á kala kur ambas mamba d’i, kayam Ma didina Alo magina mi b’alam hurum ad’enga ngingi, kayambala mi hagizi abogi ini d’igi agi tagi wagi na d’a. 31Ma didina mi dan ala: Ki tchetchemba, an hang wa Sihon kambas mamba abongû; ang tchola, ang hlad’u.
32Sihon ki azigar mama pet a buzugï atei á durâ avo Jahas. 33Ma didina Alo meina mi heizi aboi ki groma ki azigar mama pet; ei kuzi kam mi. 34Ata yi máma ei yoi azì mam ma nglona pet, ei tchi suma kurâ woi pet, nala, andjofâ, aropma ki kemba bei sa sut tu ba. 35Wani ei hurumi ni d’uwarâ kahle suma kur azì ma nglo ma ei hluma hol. 36Tinï ad’ud’a avun Arower avun alum ma Arnon-na dei gak mbei kur azì ma ngol ma kur horina gak mba Galät, azì ma ngol ma hlei abod’ina nga d’i. Ma didina Alo meina mi heizi pet aboya.
37Wani ei tchilei nga yam ambasa hi suma Amon-nid’a ki yima avun alum ma Jabo’â ki azì ma nglo ma yam ahinad’ina ki yima teteng ma Alo meina mi d’elei kama d’i.
Currently Selected:
Gat ta a hat á mbàd’id’a 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.