2 Pierre 3

Vun ma hled’a yam mbad’a hi Saleinid’a

1Buniyôn suma od’a, wana ni mbaktum mba mbà d’a an b’irigizid’a. Kurut djak an zlid’igi akulo kur djib’er magi d’a djivid’a á gagi humagi yam hat ta an had’agizid’a. 2An min agi djib’eregi yam zla d’a suma djok vun Alona suma mi tinizi irazi vazina a dat adjeud’a ki vun ma hed’a hi Salei ma sut ma magi suma a sunuzina a had’agizina. 3Ar agi wagi woi avok tua, kur bur ma danana suma las suma a mba mba á las suma, a mba tit kur d’od’oka hi hliu tazid’a kur min mazid’a. 4Azi mba dala: Mi hle vunam ala mam mba mba d’uo zu? Mi nga ni lara ge? Kayam kad’u tinda hi simiyeî suma a bona ei deid’a, ahlena pet a nga nata yazi d’igi a lazï adjeu dei na. 5Kur min mazid’a azi mar yam ahle ndazina tala adjeu dei Alona lakulod’a kandagad’a ni ki zla d’a de d’a avunamba d’a. Andagad’a ti nde naduk mbina, mi minit ni ki mbina mi. 6Hina mi, Alona mi b’lak duniya d’a adjeud’a woi ni ki mbiyo ma kus ma ngolâ mi. 7Wani akulod’a kandaga d’a tchetchemba a nga ngomozi ki zlad’a hAlonid’a tu ndata á b’lagazi woi kakud’a kur bur ma a mba ka sariyad’a yam suma tchona á b’lagazi woina.

8Wani buniyôn suma od’a, agi maragi yam zla d’a tu d’a wanda d’i: Bur tu ir Salad’a ni d’igi bizad’a dubu na, biza d’a dubud’a ni d’igi burâ tu na mi. 9Salad’a nga mi le lilinga á le vama mam hle vunam kama d’igi suma dingâ a djib’er na d’i. Wani mi ve tamî kagiya, kayam mi min ala sa tu mi ba woi d’i, wani mi min ala suma pet a mbut huruzi yam tcho mazid’a.

10Wani burâ hi Salad’ina mba mi mba ni d’igi sama kula na. Kur bur máma akulod’a mba d’i kal lei ki siwel la ngola, ahle suma akulona pet akud’a mba d’i b’lagazi woyo. Andagad’a kahle suma kurutna pet a mba ngal lei mi. 11Le ahle ndazina pet a mba b’lak kei hina ni, djivid’a agi tid’igi ni tit ta irata á le mandara Alona. 12Ar agi djubugi bur ma mbad’a hAlonina, agi b’ad’agi tagi á zut mbad’a hi bur mámid’a mi. Ni bur ma akulod’a mba d’i vakud’a, mba d’i b’lak keina, ahle suma akulona pet a mba lau woi abo aku d’a ngala. 13Wani Alona mi hle vunam yam akulo d’a awilid’a kandaga d’a awilid’a ni yima d’ingêra mba d’i kak kuana. Wana ni vama ei nga djubizina.

14Kayam ndata, buniyôn suma od’a, kur djup pa agi nga djubugi bur mámid’a, agi b’ad’agi tagi á kagagi suma yed’etna bei zlad’a kagi ba avok Alona, á kagagi ki sed’em kur b’leng nga halasa mi. 15Agi djib’eregi ala ve tad’a hi Saleinid’a ni sut magid’a d’igi wiyei ma od’a Paul mi b’irigizi kur ne d’a Alona mi humzid’a na. 16Ahle suma mi b’irizi kur mbaktumba yam ahle ndazina petna, kur mbaktum mamba, ahle suma ding suma ad’enga heî á wazi ad’uzina a nga. Suma bei wed’a suma ad’engêzi ndak kuo na, a nga gun zla ndata d’igi a nga gun zla d’a ding nga a b’irit kur mbaktumba hAlonid’a na mi. Azi le hina á b’lak azi tazid’a woyo.

17Wani agi buniyôn suma od’a, ki tchetchemba, agi wagi ahle ndazina da’. Agi gologi tagi djiviya, ar suma tchona á vid’igi woi kur tchila mazid’a kur tchol magi d’a ngingringa d’i. 18Wani agi wulugi akulo kur sumad’a ki wed’a hi Salei ma suta Jesus Christ-sa. Ar ei suburizi ki tchetchemba gak didin. Amin!

Currently Selected:

2 Pierre 3: BA

Highlight

Copy

Compare