2 Pierre 2

Suma hat suma ka zlad’a

1Wani adjeu suma djok vun suma ka zlad’a a nga aduk suma. Hina mi, suma hat suma ka zlad’a a mba kal adigagi ki ngeid’a ki hat ta nga ata yat tuo d’a. Azi mba tin vunazi yam Salazi ma sud’uzina, a mba mba ki b’laka kazi atogo zak. 2Suma ablaud’a a mba i ad’uzi kur sun mazi d’a mizeuna. Kayam sun mazi d’a led’a, suma a mba ngul lovot ta gagazid’a kaziya. 3Yam d’od’ok mazi d’a fe beged’a, a mba mbut abozi ki sed’egi ki zla d’a lop ir mazid’a. Wani Ma kazi sariyad’a kazina mi min tam avok dei kaziya, Ma b’lagazina nga mi bur sen nduo mi.

4Kayam Alona mi ar nga malaika suma a le tchod’ina hawa d’i, wani mi tchuguzi nga kä kur gring ma nduvun ma i’îli’â á ngomozi gak bur ma ka sariyad’a. 5Alona mi ar nga duniya d’a adjeud’a hawa d’i, wani mi sut ni Noe ma tchi wal la d’ingêrîna ki suma kid’iziyana hol ata yima mi kus mbina yam suma tcho suma kur duniya ndatina. 6Alona mi ka sariyad’a yam azì ma Sodom-ma ki ma Gomor-râ, mi ngalam mbei kakud’a, kayam mi arî vama simata mi suma a min le tchod’ina. 7Wani mi pat Lot ma d’ingêr ma hurum b’lak yam gaulangâ hi suma tchonina woyo. 8Kayam sama d’ingêr ma nga kaka adigazi máma, hurum nga mi b’lak burâ ki burâ ata yima nga mi we nga mi hum sun mazi d’a tcho d’a nga ata yat tuo d’ina. 9Kayam Salad’a mi we lovota á pat suma a nga tit blogoma woi kur kuka, á ngom suma tchona gak bur ma ka sariyad’a mi. 10Kal pet mba mi ka sariyad’a yam suma a nga tit bugol djib’er ra ndjendjed’a hi sa mazi ma adjeuna suma a nga gol ad’enga hAlonid’a isâ.

Ni suma a hat hat ta tcho d’a an dagi katina, ni suma bei le mandarâ, ni suma tum didi’â. Azi nga ge yazi kä avok ahle suma ari suma subur suma akulona d’i, wani a nga nguluziya. 11Wani malaika suma a kal suma hat suma ka zla ndazina kad’enga ki gangârangina pî, a tchuguzi nga zla d’a tcho d’a ngula kazi avok Salad’a d’i. 12Wani sum ndazina a nga tit kur djib’er mazid’a d’igi ahle suma abagei suma a vud’uzi á vazi á tchid’ina na. Azi nga ngul vama azi wum nga ad’um mbuo na, azi mba ba woi d’igi ahle suma abageina na mi. 13Wani Alona mba mi wuragazi ki ndak ka azi lat mi suma hiunid’a. A nga le furîd’a kur djib’er mazi d’a tchod’a falei d’ad’ar ata yima azi nga te te magina ki furîd’a ki lop ir mazid’ina. Azi ni vama zulona ki vama dap asema mi. 14Irazi nga tinda yam aropma teteu á le mizeuna ki sed’eziya. Azi ndak á ar tchod’a d’i. Azi nga ve suma amangeîna ki dauna. Djib’er mazid’a nga zud’uzi á le d’od’ok ka fe beged’a. Azi ni suma Alona mi gazi vunina. 15Azi ar lovot ta d’ingêra woyo, a vit tei á tit bugol Baläm Beyor gorom ma hurum min beged’a yam sun mam mba tchod’ina. 16Wani Alona mi ngop ma djok vun máma yam bei hum vun mama; koro ma bei de vuna, mi dum zlad’a ki dela hi sanid’a á d’el sun mam mba lilid’a.

17Azi ni golongeî suma bei lau mbina, azi ni d’igi d’ugul la babarâ nga mi tchat tatad’a na. Alona nga mi ngom zul la nduvun nda yiyika kaziya. 18Azi nga de zla d’a subur tad’a ki zla d’a de d’a hawa yaka, azi nga tit kur d’od’oka á le mizeuna hi hliu tad’a á ve suma a ar go á prut tei aduk suma a nga tit kur batrangina ki dauna. 19Azi hlazi vuna á mbud’uzi gro vuta, wani azi tazid’a ni magumeina hahle suma izi kur b’lakina. Kayam vama kal yam sanina nga mi mbud’um magom mama. 20Le azi prut tei kur tcho d’a d’od’oka hi duniyad’id’a kayam azi we Salei ma suta Jesus Christ, le a hulong kur tcho ndata ti kal kaziya ni, tchi mazi d’a bugola mba d’i kal la avoka. 21Ladjï azi we lovot ta d’ingêr ndata d’uo ni, hotei kal la azi we vun ma he ma djivi ma Alona mi hazizina we ba, azi wal lei ki sed’emba. 22D’ogol zla d’a de d’a a dat kazi ala: Adina mi hulong ata vin ma mam vinim mbeina; kozong nga a mbuzut teid’a, ti hulong aduk dorbopma d’a ni gagazi.

Currently Selected:

2 Pierre 2: BA

Highlight

Copy

Compare