2 Korente-na 3
3
Paul azi nazungeîna yam vun ma djin ma awilina
1Na ni ami suburumi tami avorogi kua zu? D’oze djivid’a ami mbami ki mbaktum mba glangâsâ d’igi suma dingâ a nga mba ki sed’et hatagi na, d’oze d’igi suma dingâ a nga vat abogi na mi zu? 2Agi tagid’a ni mbaktum mami d’a nga b’ira kurumid’a. Suma pet a wad’u, a nga ndumut mi. 3Wani suma a wagi woi tetet ala agi ni mbaktum mba Christ mi b’irit ta ami djogot teid’a. Mi b’irit nga ni ki engkrana d’i, wani ni ki Muzu’â hAlo ma arina. Mi b’irit nga ni kur tablo ma ahina d’a bebed’e d’a tcheta d’i, wani ni kur suma.
4Ami dami na kayam ami dengêmi tami ata Alona ni yam Christ. 5Ami ndak á lami va yam tami d’i, wani ad’eng mamid’a ti tcholï nata Alona. 6Ni mam ma mbud’umi suma sunda yam vun ma djin ma awilina, nga ni vun ma djinda hi gatina d’i, wani ni hi Muzuk mamina. Kayam gata ti tchi ni sana woyo, wani Muzu’â hAlonina mi he ni arid’a mi sana.
7Gat ta a b’irit ni kur tablo ma ahina d’a bebed’e d’a tchetid’a, subura hAlonid’a nga d’i b’o kua gak Israel-lâ a ndak á gol ir Moise abo wile d’a iramba d’i. Wani wile ndata nga d’i kal leyo. Le gat ta sun mata i sana kur matnid’a nde ki subura na ni, 8sunda hi Muzu’â hAloninid’a nga d’i nde ki subura kalat tuo zu? 9Le sun nda ka sariyad’a yam sumid’a a nga suburud’u ni, sun nda mbut suma d’ingêr avok Alonid’a a mba suburut kala. 10Vama a suburum adjeuna mi mbut ni vama a nga suburum ka tchetchem mbuo na, kayam vama tchetchema, subur mamba kalamu. 11Le vama kal leina mi mba ki subura ni, vama kak didina, subur mamba mba d’i kal luo zu?
12Kayam ndata, ami nga ki hur ma tinda, ami nga dami zlad’a bei mandarâ ba mi. 13Ami nga ni d’igi Moise ma zlup barud’a iram mbei ala Israel-lâ a we subur ra iram mba nga d’i kal leid’a d’uo na na d’i. 14Wani Israel-lâ a b’al huruzi kiki. Gak ini ata yima a nga ndum kur mbaktumba hi vun ma djin ma adjeunina, baru d’a ka ira nga zlupa yam djib’er mazid’a, kayam ni Christ hol ba, mi hô baru d’a ka ir ndata woyo. 15Gak ini ata yima azi nga ndum mbaktumba hi Moise-sina, baru d’a ka ir ndata nga zlupa yam djib’er mazid’a. 16Wani d’igi mbaktumba hAlonid’a ti de na ala: Sama hulong mi mba gen Ma didinina, baru d’a ka ir ndata a hlat wa woi iramu. 17Zla ndata ala Ma didina d’a, ad’ut ala Muzu’â d’a. Ata yima Muzu’â hi Ma didinina nga kuana, but ta akulod’a nga. 18Wani ei suma a yoi baru d’a ka ira woi ireina, ei nga golei subura hi Ma didinid’a, ni d’igi sana mi gol iram kur kotroma na. Muzu’â hi Ma didinina nga mi mbud’i dedege d’igi Ma didina na kur subura kam kua kam kua kala.
Azumeina Bible © Alliance Biblique du Tchad, 1999.