2 Korente-na 4
4
Amangeîd’a hi sanid’a kad’enga hAlonid’a
1Alona mi wami hohowomiya, mi hami sun ndata abomiya. Kayam ndata, ami tami nga tchuk lus kat ti. 2Ami arami sun nda zulo d’a nga ngeid’id’a woyo. Ami tid’imi nga kur lemba á lop suma ki zlad’a hAlonid’a d’i, wani ami nga dami zlad’a hAlonid’a woi ki gagazid’a mi suma avok Alona. 3Wani le Zla d’a Djivi d’a ami tchat walata nga ni ngeid’a ni, ni ngeid’a ir suma a nga ba woina hol. 4Azi nga he gagazid’a d’i, kayam alo ma tcho ma kur duniya d’a wandina, mi duguzi irazi woyo. Mi d’elezi á we b’od’a hi Zla d’a Djivi d’a subura hi Christ ma hle tam dedege d’igi Alona na na. 5Kayam ami nga tchami wala ni yam ami tami d’i, wani ami nga tchami wala ni yam Jesus Christ ala mam mi Salad’a. Ami nga dagi ala ami nazungeî magina yam Jesus mi. 6Kayam Alo ma dala: Ar b’od’a ti b’o kur nduvunda na, ni ma nga b’o kuri kayam ei wei subura hAlona d’a nga d’i b’o avok Christ-sa.
7Wani ami ni d’igi dei ma lubu ma nga mi zi ndjondjoîd’a hAlona d’a wanda kuana, á tak kei tetet ala ad’eng nga kal papa ndata ti tcholï nata Alona, nga nata ami d’i. 8Ami nga fami ndaka abo ahlena teteng, wani a kal nga kami d’i; ami nga kur djib’era teteng, wani tami tchuk nga lus suo mi. 9Azi nga djobomi vunamiya, wani Alona arami nga woi d’i; a nga mired’emi kä andaga, wani ami bomi nga d’uo mi. 10Ami nga zimi matna hi Jesus-na kami teteu, kayam ami tagami ari mamba woi abua. 11Kur kak mamid’a, ami navun matna yam Jesus, kayam ami tagami ari mamba woi ata hliwimi ma matna. 12Kayam ndata, ami nga kur matna, wani agi nga kur arid’a.
13Mbaktumba hAlonid’a ti dala: An he wa gagazid’a. Kayam ndata, an de. Ami mi, ami hami gagazid’a d’igi mam na mi. Kayam ndata, yam he gagazi mamid’a, ami nga damiya. 14Ami wami ala mam ma tchol Salad’a Jesus akulo aduk suma matnina, mba mi tcholomi zlapa ki Jesus. Mam mba mi ndami woi avorom zlapa ki agi mi. 15Ahle ndazina pet a le ni kagiya, tala Alona mi ve suma sumad’a avogovok kayam suma a le mersi yam subura hAlonid’a kam kua kam kua d’a.
Tit ta yam he gagazid’id’a
16Kayam ndata, ami tami nga tchuk lus si. Le hliwimi nga mi b’lak kei pî, muzugami nga mi mbut awilid’a burâ ki burâ. 17Ndak ka afefet ta nga d’i lami kä ndjö wanda, mba d’i mba ki subur ra ngol la didinda, kal ndak ka ka tchetchem wanda. 18Kayam ami nga tinimi irami ni yam vama suma a nga wum ki irazina d’i, wani ami nga tinimi irami ni yam vama suma bei wum ki irazina. Kayam vama suma a wuma ni vama kak didina d’i, wani vama suma bei wuma ni vama kak gak didina.
Azumeina Bible © Alliance Biblique du Tchad, 1999.