2 Korente-na 2
2
1Wani an nga hurun á iza hatagi ná zalagi hurugi kua d’uo d’a. 2Le an zalagi hurugiya ni, sama mba mi lan tan djivid’ina ni nge ge? Ni ma an zalam huruma tul li? 3Ni kayam ndata ba, an b’irigi ki mbaktum ndata, tala le an mbaza hatagi agi suma lan tan djivid’ina, ar an fe hur ma zala atagi d’uo d’a. Kayam an wala ata yima an nga ni le furîd’ina, agi nga lagi furîd’a pet mi. 4Kayam an b’irigi mbaktum ndata ni kur ndaka ki hur ma hata ki simina iran ná zalagi hurugi d’i, wani kayam agi wagi ala an nga ni le kagi heî.
Vat hurâ yam sama tchona
5Le sana mi lan vama zal hurâ ni, mi zalan ni an hurun tu d’i, wani mi zalî hur suma hiuna adigagi mi. An b’irigi ná tinigi anek ka ngola kagi d’i. 6Sariya d’a suma ablaud’a a kat yam sa mámid’a, ti ndaga. 7Wani ki tchetchemba, ar agi vad’agi hurugi woi kamu, ar agi b’lengêm hurum mi, kayam hur ma zala kal kam mbi. 8Kayam ndata, an nga ni tchenegi ngola, agi tagam o magid’a. 9Kayam ndata, an b’irigi ki mbaktum ndata á kugugiya, á we na ni agi nga gagi yagi kä ad’u ahlena pet suma an nga ni had’agizina ko zu? 10Le agi vad’agi hurugi yam sa ni, an vat hurun ndei kam mi. Le an vat hurun ndei yam sa ni, an vat hurun ndei kam ni yam agi avok Christ, 11kayam ar Seitan mi kus kei d’i, kayam ei wei lem mamba.
Djib’era hi Paul-la avo Trowas
12Kid’a an mba avo Trowas á tchi wal Zla d’a Djivid’a hi Christ-sid’a, Salad’a mi mal lovota avoron á le sunda ngola. 13Wani tan lan nga djivi d’i, kayam an fe nga wiyeina Tit sä hî d’i. Kayam ndata, an gazi depa, an arazi ni i Maseduwan.
Kus sa yam ad’enga hi Christ-sid’a
14An le mersi mAlo ma mi yomi d’igi azigar suma a yozi avun ayînina na ad’u Christ á tak kusa hi Christ-sa woi burâ ki burâ. Mi tinimi á tak Christ woi ata yina pet, d’igi his ma afufuîna mi b’rau woi ata yina pet na. 15Kayam ami ni d’igi his ma djivi ma afufuîna hi Christ-sâ na avok Alona, aduk suma a nga fe sutina, aduk suma a nga ba woina mi. 16Ir suma a nga ba woina, ami ni his ma tcho ma tchi matna. Ir suma a nga fe sutina, ami ni his ma djivi ma sut sumina. Sama ndak á le sun ndata ni nge? 17Kayam ami nga ni d’igi suma hiu suma a nga mbut abona ki zlad’a hAlonid’ina na d’i. Wani Alona mi sunumi ni mamu, ami nga dami zla d’a irata avorom d’igi azungeîna hi Christ-sâ na.
Azumeina Bible © Alliance Biblique du Tchad, 1999.