1 Sunda Hamuleinid’a 14
14
David mi nga avo Jerusalem
(Gol 3.5-9; 2 Sam 5.11-16)
1Hiram amul ma Tir-râ, mi sunï suma gen David kagu sedrena, suma tchet ahinad’a ki suma tchet aguna á min gong nga amula mi David. 2David mi wala Ma didina nga mi siram á tamula yam Israel-lâ, amul mamba nga d’i i avogovok yam mam suma Israel-lâ mi.
3David mi vik arop suma dingâ kua avo Jerusalem, mi vut gro andjofâ ki gro aropma kua mi. 4Wana ni grom suma mi vud’uzi avo Jerusalem-ma: Samuwa, Sobap, Natan, Salomon, 5Jibar, Elisuwa, Elfelet, 6Noga, Nefek, Jafiya, 7Elisama, Beliyada ki Elifelet.
David mi kus yam Filistê-na
(Gol 2 Sam 5.17-25)
8Kid’a suma Filistê-na a hum ala a vo wa mbulâ yam David á tinim amula yam Israel-lâ ped’u d’a, azigar mazina pet a i á vumu. David mi huma, mi nde woi á ngavazi á durâ. 9Suma Filistê-na a mba a ndjar kä woi kur hor ra Refa-d’a. 10David mi djop Alona ala: An i dur ayîna ki suma Filistê-na zu? Ang mba handji abon ndju?
Ma didina mi de mi David ala: Ang iya! An mba ni hangzi abongû.
11David ki sum mama a mba Bäl-Perasim, mi dur suma Filistê-na, mi kus kaziya. Bugola, mi dala: Alona mi mal lovota avoron aduk man suma djangûna d’igi mbina mi hulut damana na. Ni kayam ndata ba, a yi yi máma ala Bäl-Perasim#14.11 Bäl-Perasim: Nala, Salad’a mi mal lovota.. 12Filistê-na a ar filei mazina woi ata yi máma; David mi he vuna mi sum mama ala a ngalam mbeyo.
13Suma Filistê-na a hulong a ndjar kä woi kua kur hor ra Refa-d’a. 14David mi djop Alona kua. Alona mi hulong dum ala: Ang i ad’uzi d’i! Ang i mbud’ï blogoziya, ang tezezi ngagad’a yam agu murâ. 15Le ang hum asem ma tita mi tchï akulo hum agu murâ ni, ang b’at tang atogo. Ni an Alona ba, nga ni tit avorong á dur azigarâ hi Filistê-nina.
16David mi le d’igi Alona mi hum vuna na, mi dur azigarâ hi Filistê-nina, tinï ad’ud’a Gabawon dei gak mba Gezer. 17Ata yi máma David simiyêm mi nde yina kur ambasa pet. Ma didina mi mbud’um ma suma yam andagad’ina pet a nga lum mandarama mi.
Currently Selected:
1 Sunda Hamuleinid’a 14: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
