1 Sunda Hamuleinid’a 15
15
David mi min tam á hleï zandu’â
1David mi min gongîyona kur aziyam ma ngolâ, mi min yina yam zandu’â hAlonina, mi ve zlub’ud’a kam mi. 2Ata yi máma David mi dala: Ni suma hi Levi-na hol ba, a nga ki lovota á hle zandu’â hAlonina, kayam Ma didina mi manazi á hlumu, á lum sunum burâ ki burâ mi.
3David mi tok Israel-lâ pet avo Jerusalem á hleï zandu’â hi Ma didinina ata yima mi minimzi kama. 4David mi tok suma hi Aron-na ki suma hi Levi-na. 5Aduk suma hi Kehat-na, ma avorozina ni Uriyel ki b’oziyoma. Azi pet ni 120. 6Aduk suma hi Merari-na, ma avorozina ni Asaya ki b’oziyoma. Azi ni 220. 7Aduk suma hi Gerson-na, ma avorozina ni Joel ki b’oziyoma. Azi ni 130. 8Aduk suma hi Elisafan-na, ma avorozina ni Semaya ki b’oziyoma. Azi ni 200. 9Aduk suma hi Hebron-na, ma avorozina ni Eliyel ki b’oziyoma. Azi ni 80. 10Aduk suma hi Uziyel-lâ, ma avorozina ni Aminadap ki b’oziyoma. Azi ni 112.
11David mi yi suma ngat buzuna, Sadok ki Abiyatar ki suma hi Levi-na, Uriyel, Asaya, Joel, Semaya, Eliyel ki Aminadap. 12Mi dazi ala: Agi suma avok suma hi Levi-nina, agi ki b’oziyogina, agi mbud’ugi tagi yed’et, agi i hlagï zandu’â hi Ma didina Alona hi Israel-lîna ata yima an minimzi kama. 13Kayam fata avok agi nga kua d’i, Ma didina Alo meina mi tchi matna adigamiya, kayam ami lami nga ata lovod’ot ti.
14Suma ngat buzuna ki suma hi Levi-na a mbut tazi yed’et á hleï zandu’â hi Ma didina Alona hi Israel-lîna. 15Suma hi Levi-na a hleï zandu’â hAlonina kelezi ki karangâli mama d’igi Ma didina mi he vuna mi Moise na. 16David mi de mi suma avok suma hi Levi-nina ala: A ndjar b’oziyozi suma hle sawala kandjaf ahle suma bud’a teteng, nala, ading ma nglona kading ma gureina ki tchigiyeud’a, ar a hle sawala ki delezi akulo á tak furî mazid’a woyo.
17Suma hi Levi-na a ndjaraziya, a tin Heman Joel goroma; aduk b’oziyoma, a tin Asaf Berekiya goroma; aduk b’oziyom suma hi Merari-na, a tin Etan Kusaya goroma mi. 18B’oziyozi suma a ngom vun agre’â hi gong nga kud’ora hAlonid’a suma a ndjar kazi á mbàd’ina ni Zakari, Ben, Jäziyel, Semiramot, Jehiyel, Uni, Eliyap, Benaya, Mäseya, Matitiya, Elifele, Mikneya, Obet-Edom ki Jeyel. 19Suma hle sawala Heman, Asaf ki Etan a nga ki tchigiyeu d’a kawei ma hleuna abozi á bud’a. 20Zakari, Aziyel, Semiramot, Jehiyel, Uni, Eliyap, Mäseya ki Benaya a nga kading ma a minim delem á hle ki sawalina. 21Matitiya, Elifele, Mikneya, Obet-Edom, Jeyel ki Azaziya a nga kading ma ziyom klavandina á tak lovot ta hle sawala. 22Kenaniya ni ma avok suma hi Levi-nina, ni ma tak lovota á hle sawalina, kayam mam mi ma tak lovot ta hle sawalina, kayam mam mi ma d’al ma we lovot ta hle sawala heîna. 23-24Berekiya ki Elkana zlapa ki Obet-Edom ki Jehila ni suma ngom zandu’â hAlonina. Sebaniya, Josafat, Nataniyel, Amasai, Zakari, Benaya ki Eliyezer suma ngat buzuna, a nga bu aduveina avok zandu’â hAlonina mi.
A mba zandu’â Jerusalem
(Gol 2 Sam 6.12-19)
25David azi ki nglo suma Israel-lâ ki suma avok azigar suma dudubuna, a i á hleï zandu’â hi Ma didinina avo hi Obet-Edom dei ki furîd’a gandjau. 26Ni ki ndjunda hAlonid’a ba, suma hi Levi-na a hleï zandu’â hi Ma didinina. A ngat amuzleina buzuna kid’iziya ki gamlâna kid’iziya mi. 27David mi tchuk baru d’a ngol la luluîd’a atamu, zlapa ki suma hi Levi suma hle zandu’â ki suma hle sawala ki Kenaniya ma avok suma hle sawalina mi. David mi nga ki baru d’a efo d’a luluîd’a atam mi. 28Israel-lâ pet a hleï zandu’â hi Ma didinina ki siwela gandjau, a nga bu aduvei suma nglona ki suma gureina ki tchigiyeud’a, a nga bu ading ma nglona ki ma gureina mi.
29Ata yima a kal zandu’â hi Ma didinina avo kur azì ma ngolâ hi David-nina, Mikal Saul goromba ti gol ir fenetred’a, ti wamulâ David nga mi gal akulo ki ndjongâ. Ata yi máma ti golom is kurut krovo.
Currently Selected:
1 Sunda Hamuleinid’a 15: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
