1 Sunda Hamuleinid’a 13
13
David mi min á mba ki zandu’â Jerusalem
(Gol 2 Sam 6.1-11)
1David mi ndjak vunam ki suma avok azigar suma dudubuna ki suma avok azigar suma kikisâ zlapa ki suma nglo suma avok sumina pet mi. 2David mi de mi tok ka Israel-la pet ala: Le agi minigiya, le zla ndata ti tcholï nata Ma didina Alo meina mi ni, ei tchugi sunda yam andaga d’a pet ta b’oziyoi Israel-lâ a nga kaka kuad’a, ata suma ngat buzuna, ata suma hi Levi suma kur aziyazi ki yima huyogomina, kayam a mba zlap tu ki sed’eya. 3Ei hulongeî zandu’â hAlo meinina gevei go, kayam kur atchogoid’a hi Saul-la ei tini nga irei kam mbi.
4Suma toka ki zla tazi pet a nga huruzi á le hina, kayam zla ndata ti le suma tazi djivid’a pet. 5David mi tok Israel-lâ pet, tinï ad’ud’a avun toliyon nda Ezipte-d’a dei gak mba avun agrek ma Hamat-na á hleï zandu’â hAlonina Kiriyat-Jarim á hulongôm avo. 6David azi ki Israel-lâ pet a i Bäla, nala, Kiriyat-Jarim-mba hi suma Juda-nid’a á hleï zandu’â hAlona ma a nga yi simiyê Ma didina avoroma. Ni zanduk ma Ma didina mi nga kaka kam aduk tcherebênina. 7Azi hleï zandu’â hAlonina avo hi Abinadap, a tinim kur pus ma awilina hamuzleinina. Uza azi ki Ahiyo a nga tit avok pusâ mi. 8David ki Israel-lâ pet a nga lü avok Alona kad’engêzi pet, a nga hle sawala kandjaf ahle suma bud’a teteng, nala, ading ma nglona ki ma gureina, daliyâd’a, tchuguyod’a, ndendeta kadifa mi. 9Wani kid’a azi mbaza kur ambid’a’â hi Kidon-nid’a, Uza mi mat abom mi ve zandu’â, kayam amuzleina a nga lengêm á ged’a kä. 10Ma didina hurum zal ngola yam Uza, mi tumum ata yi máma kayam mi mat abom mi ve zandu’â. Uza mi mit ata yi máma avok Alona.
11David hurum zal yam tchi d’a Ma didina mi tchi Uza-d’a. A nga yi yi máma gak ini ala Peres-Uza. 12Kur bur máma David mi le mandara Alona, mi dala: Ni nana ba, an mba ni kal zandu’â hAlonina avo hatan nge?
13David mi i nga ki zandu’â hAlonina avo hatam kur aziyam ma ngolâ d’i, mi hlumza vunam mbei avo hi Obet-Edom ma Gat-na. 14Zandu’â hAlonina mi le tilâ hindi avo hi Obet-Edom ma Gat-na. Ma didina mi b’e vunam yam Obet-Edom ki sum mama kahle mama pet mi.
Currently Selected:
1 Sunda Hamuleinid’a 13: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
