Salmos 96
96
Salmo 96
Ndaka o jín kata in yaa jaa nuu Su'si Iya Tátnuni ma
1Jín kata o yaa jaa nuu Su'si o Iya Tátnuni ma.
Ndaka o ja ka iyo o ñuu ñayivi a, jín kata o nuu ya.
2Jín kata o nuu Su'si Iya Tátnuni ma, te jín ndachiñu'u o ya,
te ndi‑kivi ndi‑kivi jín ndaka'an o
sukan sa'a ya ja ka kaku o nuu ja u'vi ma.
3Jín ndaka'an jín ndakachi o sukan sa'a sukan kúu ya a
nuu ndaka ñayii ka iyo ni‑ka'nu ñuu ñayivi a,
sukan‑va'a jín kuni i te na koo jayiñu'u ya.
4Vaa Su'si o Iya Tátnuni ma chi iya kanuu kúu ya,
te maa ya iyo ja ni'i ya jayiñu'u,
te maa ya iyo ja jin koyu'u o ya
sana tna'a ja masu Su'si ka kuu ma,
vaa maa ya ndakan kuenda nuu ndaka o.
5Te ndaka‑ka ja ka ka'an sava ñuu ma ja su'si ka kuu ma
chi másu nawa kuu jin sa'a i,
kovaa Su'si o Iya Tátnuni ma kúu iya
ni sa'a ni‑ka'nu andivi ma.
6Suu ya kúu iya iyo ja jin ndakuan‑ta'vi o nuu ya,
te jín ndachiñu'u o ya ini veñu'u ii iyo ya ma,
te nuu maa ya na koo jayiñu'u,
vaa iyo tnu'u ndee tnu'u ndatnu ya ma.
7Ndaka o ja ka iyo o ndi‑in ndi‑in ve'e ma
ja ka iyo o ndi‑in ndi‑in ñuu ma,
jín ndakuan‑ta'vi o nuu Su'si o Iya Tátnuni ma,
te jín ndachiñu'u o ya,
vaa maa ya neva'a tnu'u ndee tnu'u ndatnu.
8Jín ndachiñu'u ndi'i jín ndachiñu'u tu'u o ya,
sukan iyo ja jin ndachiñu'u o ya ma.
Ne'e koo ni ini veñu'u a ji'in nawa jin ndakua'a ni ya.
9Te jín ndachiñu'u o Su'si o Iya Tátnuni ma,
vaa iya vii iya va'a kúu ya, vaa ñatuu na ja u'vi sa'a ya.
Ndaka o ja ka iyo o ni‑ka'nu ñuu ñayivi a,
na jin koyu'u o ya,
vaa ndakan ya kuenda nuu ndaka o.
10Jín kuña'a o nuu ñayii ka iyo ni‑ka'nu ñuu ñayivi a
ja Su'si ma kúu Iya Tátnuni,
te suu ya ni sunkani vava'a ñuu ñayivi a,
te masu kotuu i.
Te maa ya ndakan ndandaa kuenda nuu ndaka ñayii
ka iyo ndaka ñuu a.
11Jín ndusii ini ndaka ja ka iyo andivi a,
ji'in ndaka ja ka iyo ñuu ñayivi a,
te ni‑ka'nu nuu mar ma, kó kuu yu'u i ja iyo sii ini i.
12Te ndaka ja ka iyo yuku ma, jín ndusii ini i,
sani te ndaka tna yutnu ka nukoo ma,
jín ndusii ini xen‑xeen tnu
13nuu maa Iya Tátnuni ma, iya ni kii ñuu ñayivi a
ja ni jito ya naxe ka sa'a ka kuu ñayii ma,
ji'in ndaka ja ka iyo ñuu ñayivi a.
Te maa ya tátnuni nuu ndaka ñayii
ka iyo ni‑ka'nu ñuu ñayivi a,
te ndakan ndaa ya kuenda nuu i.
Currently Selected:
Salmos 96: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
