Salmos 97
97
Salmo 97
Su'si ma chi iyo tnu'u ndee tnu'u ndatnu ya
1Su'si ma kúu iya tátnuni nuu o a.
Jin ndusii ini ndaka ni ja ka iyo ni nuu ñu'ú a,
ji'in ndaka ni ja ka iyo ni yu'u mar ma.
2Vaa Su'si o a chi ni ndakonduu viko ma ya,
te ni masu kuu kuni o ya,
te tnu'u ndaa tnu'u ndija ma iyo nuu núkoo ya
ja ka'nde ya tniñu ñayii ka sa'a ja u'vi ma.
3Te ñu'u i'ni ma yoxtnuu nuu ya,
te xnaa i ndaka ñayii ñatuu ka kunimani nuu ya ma.
4Te sa'a ya ja jándute ichi kua'an ya ñuu ñayivi a,
te ja ni jini ñu'ú ma ya, te ni yu'u i.
5Te yuku ma, ja ni ka jini i Su'si iya tátnuni
ni‑ka'nu ñuu ñayivi a,
te ni ka ndatnana i sukan ndátnana xe'en ma nuu ñu'u i'ni ma.
6Te ndaka andivi ma ni ka ndaka'an
sukan sa'a ndaa sa'a ndija ya ma,
te ndaka ñayii ka iyo ndaka ñuu ma,
ni ka jini i jayiñu'u ya ma.
7Jin ndakukan‑nuu ni, ndaka ni ja ka ndachiñu'u ni tna'a
ja ni ka sa'a ñayii ma te ka jani ini ni ja su'si ni ka kuu ma.
Te ka kuvixi ni ja ka kukanu ini ni ja su'si ni kúu chukan ma.
Nute nuu Su'si ma ve koo i ma
chi onde maa i jin kunukoo jiti nuu Su'si ndija ma,
vaa maa in‑ni Su'si ma iyo ja jin ndachiñu'u o.
8Te ni jiniso'o ñuu Sion ma, te ni ndusii ini i,
te ni ka jiniso'o sasi'i ñayii ka iyo ñuu Judá ma,
te ni ka ndusii ini i ja ni sa'a ndaa, ni sa'a ndija ni ma, vi Su'si.
9Vaa maa ni kúu Iya Tátnuni,
iya kanuu‑ka sana ndaka ja iyo ñuu ñayivi ya.
Te maa in‑ni ni iyo ja ni'i ni jayiñu'u ma
sana ndaka‑ka ja masu Su'si ka kuu ma.
10Ndee ni ka kutoo Su'si Iya Tátnuni ma,
jin saxiko ni ja u'vi ma,
vaa maa ya chi jito va'a ya ndaka anua ñayii
ñatuu‑ka na ja u'vi ka sa'a i ma,
te ka ndayaa i nuu nda'a ñayii ka sa'a ja u'vi ma.
11Te xtnuu ya ñu'u maa ya ma nuu ka iyo ñayii
ka sa'a ja va'a ja ndaa ma,
te sa'a ya ja ka iyo sii ini ñayii ka iyo ndaa nuu ya ma.
12Jin koo sii ini ndaka ni ja ka sa'a ni
ja va'a ja ndaa ma nuu Su'si Iya Tátnuni ma,
te jin ndaka'an ni ja iya ii kúu ya,
te jin ndachiñu'u ni ya.
Currently Selected:
Salmos 97: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
