Salmos 95
95
Salmo 95
Jín kata sii ini o te jín ndachiñu'u o Su'si ma
1Ne'e koo ni, te ndaka o jín kata sii ini o nuu ya.
Te ni‑yu'u ni‑ini o jín ndachiñu'u o Iya Tátnuni ma,
vaa maa ya kúu toto nuu kuu jin kaku o ma.
2Jín kivi koo o nuu iyo ya ma, te jín kata o nuu ya,
te jín ndakua'a o jayiñu'u ya.
3Vaa maa ya kúu Su'si Iya Tátnuni iya kanuu xeen,
te maa ya kúu Rey tatnuni‑ka
sana ndaka‑ka ja ka xnani ñayii ma su'si i ma.
4Te nuu nda'a maa ya iyo onde nuu kunu kunu‑ka ñuu ñayivi ya,
te kuenda maa ya kúu yuku sukun sukun‑ka ma.
5Te kuenda maa ya kúu mar ma, vaa maa ya ni sa'a,
te maa ya ni sa'a ja iyo ñu'ú yichi ma.
6Ne'e koo ni, te jín kunukoo jiti o nuu Su'si o Iya Tátnuni a,
te jín ndachiñu'u o ya, vaa maa ya ni sa'a ña'a,
7te maa ya kúu Su'si o, te yo'o chi ñuu maa ya ka kuu o,
te kuenda tnu'u ja ndikachi ka kuu o nuu nda'a ya ma.
Te nuna jin koniniso'o o vitna tnu'u ká'an Su'si o ma,
vaa sa'a ká'an ya:
8“Máko jin sa'a ndee ni ini anua ni a,
sukan ni ka sa'a so'o tna'a ni ma nuu nani Meriba ma,
ji'in sukan ni ka sa'a i kivi
nuu ni ka iyo i nuu nani Masah ma
nuu ñatuu kuiti nawa iyo ma.
9Yukan ni ka jitotnuni ña'a yuva ni ma
nú Su'si kúu sa te nú kuu kua'a sa ja ka jiniñu'u de ma,
te ni ka jini maa de ndaka ja ni yo sa'a, ni yo kuu sa ma.
10Te kuechi ja sukan ni ka sa'a ña'a de ma,
te uu xiko kuiya ni ndakiti ini sa nuu ndaka ñayii yukan,
te ni ka'an sa: Ndimaa ka ñu'u ya'a ka ñu'u yukan‑ni
ini ñayii ya'a,
te ni ñatuu ka jini i ichi ndaa káxtnu'u o ya.
11Chukan kúu ja nuu ni ndakiti ini sa ma,
te ni ka'an sa: Másu jin kivi koo i nuu ni satu'va o
ja jin ndatatu i ma”,
kúu ya ká'an ya.
Currently Selected:
Salmos 95: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
